Tag: fiba

Индонезид тивийн АШТ болно

Цар тахлын улмаас хойшлогдоод байсан сагсан бөмбөгийн Ази тивийн АШТ-ийг ирэх жил Индонезийн Жакарта хотод зохион байгуулахаар боллоо.

Ази болон Номхон далайн орнуудын шилдэг 16 баг өрсөлдөх 30 дахь удаагийн тивийн АШТ ирэх оны наймдугаар сарын 16-28-нд Индонезийн Жакартад болно.

Олон үндэстний өлгий болсон Индонез улсад сагсан бөмбөг эрчтэй хөгжиж буй. Тус улс анх 1993 онд тивийнхээ аваргыг зохион байгуулсан бол ирэх жил хоёр дахиа хүлээн авах гэнэ.

Нийт 267 сая хүн амтай, тэдгээр нь 700 гаруй хэлээр ярьдаг онцлогтой индонезчууд 2023 оны сагсан бөмбөгийн ДАШТ-ийг Япон болон Филиппин улстай хамтран зохион байгуулахаар төлөвлөж байгаа билээ.

Одоогоор Ази тивийн АШТ-д оролцох эрхээ Ливан, Бахрейн улс авсан бол ийнхүү Индонез зохион байгуулагч орноор тодорч, гурав дахь улс нь боллоо.

Манай улсын сагсан бөмбөгийн шигшээ багийн хувьд энэ удаагийн Ази тивийн АШТ-ий урьдчилсан шатанд өрсөлдөөгүй юм.

АНУ-ын шигшээ баг урьдчилсан бүрэлдэхүүнээ танилцуулав

АНУ-ын шигшээ багт өмнө нь дуудагдаж байсан 29 тоглогч дахин багтжээ.

“Токио 2020”-д АНУ-ын сагсан бөмбөгийн шигшээ багийг төлөөлөх урьдчилсан бүрэлдэхүүн тодорчээ. Сүүлийн дөрвөн олимпод дараалан түрүүлсэн америкчууд өнгөрсөн жилийн ДАШТ-ээс медальгүй хоцорсон билээ. Тэд энэ амжилтандаа дүгнэлт хийж, Токиод түрүүлэх эсэх нь олны анхаарлыг татаж буй нь гарцаагүй.

Өнгөрсөн жилийн ДАШТ БНХАУ-д болсон тул олон тамирчид шигшээдээ зүтгэхээс татгалзсан. Тэгвэл энэ удаагийн олимп ч бас Ази тивд болно.

NBA-гийн улирлаас шалтгаалж, эцсийн байдлаар 12 тоглогчийг шигшээд дуудах аж.

АНУ-ын шигшээ багт уригдсан тоглогчид:

  • Лэброн Жэймс (Лос Анжелес Лэйкерс)
  • Бам Адебайяо (Майами Хит)
  • ЛаМаркус Олдриж (Сан Антонио Спэрс)
  • Харрисон Барнс (Сакрамэнто Кингс)
  • Брэдли Бийл (Вашингтон Визардс)
  • Девин Бүүкер (Финикс Санс)
  • Малколм Брогдон (Индиана Пэйсерс)
  • Жайлен Браун (Бостон Селтикс)
  • Донован Мичелл (Юта Жазз)
  • Крис Мидлтон (Милоуки Бакс)
  • Жимми Батлер (Майами Хит)
  • Майк Конли (Юта Жазз)
  • Стефен Карри (Голден Стэйт Уорриорс)
  • Энтони Дэвис (Лос Анжелес Лэйкерс)
  • ДеМар Дерозан (Сан Антонио Спэрс)
  • Андре Драммонд (Кливлэнд Кавальерс)
  • Кэвин Дюрант (Бруклин Нэтс)
  • Пол Жорж (Лос Анжелес Клиппэрс)
  • Дрэймонд Грин (Голден Стэйт Уорриорс)
  • Жэймс Харден (Хьюстон Рокитс)
  • Монтрезл Харрелл (Лос Анжелес Клиппэрс)
  • Жо Харрис (Бруклин Нэтс)
  • Тобаис Харрис (Филадельфи 76)
  • Гордон Хэйвард (Бостон Селтикс)
  • Дуэйт Ховард (Лос Анжелес Лэйкерс)
  • Брэндон Инграм (Нью Орленс Пеликанс)
  • Кайри Өрвинг (Бруклин Нэтс)
  • Кайл Кузма (Лос Анжелес Лэйкерс)
  • Кави Леонард (Лос Анжелес Клиппэрс)
  • Дамиан Лиллард (Портлэнд Трэйлблазерс)
  • Брук Лопес (Милоуки Бакс)
  • Кэвин Лов (Кливлэнд Кавальерс)
  • Кайл Лоури (Торонто Рэпторс)
  • Виктор Оладипо (Индиана Пэйсерс)
  • Крис Пол (Оклахома Сити Тандер)
  • Мэйсон Пламли (Дэнвэр Наггетс)
  • Маркус Смарт (Бостон Селтикс)
  • Жэйсон Татум (Бостон Селтикс)
  • Клэй Томпсон (Голден Стэйт Уорриорс)
  • Майлс Тюрнэр (Индиана Пэйсерс)
  • Кэмба Уолкер (Бостон Селтикс)
  • Рассэл Уэйстбрук (Хьюстон Рокитс)
  • Дэррик Уайт (Сан Антонио Спэрс)
  • ЖаВайл МакГий (Лос Анжелес Лэйкерс)

Жич: Тодруулсан тоглогчид олимпод тоглох хүсэлтэй байгаагаа илэрхийлсэн. Харин Кави Леонард төлөвлөж байгаа ч хараахан шийдээгүй байгаа аж.

АНУ-ын шигшээ багийн ахлах дасгалжуулагчаар Грэг Попович (Сан Антонио Спэрс), туслахаар Стив Кэрр (Голден Стэйт Уорриорс), Ллойд Пирс (Атланта Хоукс), Жая Врайт (Вилланова их сургууль) нар ажиллах юм.

FIBA: АНУ-ын шигшээд тоглох хүсэлтэй хүн алга

Өнгөрсөн сард АНУ-ын сагсан бөмбөгийн шигшээ баг 20 тоглогчид улсынхаа төлөө зүтгэх боломж олгосон. Үүнийг зарласан цагаас хойш одоогоор зургаан тоглогч шигшээ багтаа тоглохоос татгалзав.

“Лос Анжелес Лэйкерс” багийн тоглогч болсон Энтони Дэвисийн агент Рич Пол өөрийн мэдлийн тоглогчдоо ДАШТ-д оролцохоос татгалзсан юм. Үүнд Леброн Жэймс, Энтони Дэвис, Бэн Симмонс, Тристан Томпсон зэрэг олон одод багтана. Удалгүй “Хьюстон Рокитс”-ын хамгаалагчид болох Жэймс Хардэн, Эрик Гордон, “Портлэнд Трэйлблазерс”-ийн хамгаалагч Си Жи МакКоллум нар энэ жагсаалтаас сайн дураараа хасагдлаа. Тэдний араас “Вашингтон Визардс”-ын Брэдли Бийл, “Филадельфи 76”-гийн довтлогч Тобиас Харрис нар нэмэгдэв.

Тэдний ихэнх нь шинэ улиралд илүү анхаарал хандуулж буйгаа уламжилсан. Харин Брэдли Бийлийн хувьд наймдугаар сарын сүүл, есдүгээр сарын эхэнд аав болох тул шинэ хүнээ угтаж авахаар шигшээ багаасаа завсарлага авахаар шийджээ.

Ном ёсоор бол ирэх наймдугаар сард Лас Вегас хотод болох бэлтгэлийн цуглаанд нэр дурдагдсан 20 тоглогч оролцож, тэднээс 12 нь ДАШТ-д оролцох ёстой. Тэр ч бүү хэл энэ жилийн драфтыг тэргүүлсэн Зайон Уильямсон шигшээ багийнхаа урилгаас татгалзсан юм.

Дээрх зургаан тоглогчийн оронд “Бостон Селтикс”-ийн хамгаалагчид болох Маркус Смарт, Жайлен Браун, “Голден Стэйт Уорриорс”-ын Де’Энжило Рассэлл, “Орландо Майжик” багийн довтлогч Аарон Гордон нарыг дуудаж магадгүй аж.

Одоогоор Дамиан Лиллард, Кэмба Уолкер, Крис Мидлтон, Пи Жэй Такер нар шигшээ багийнхаа бэлтгэлд хамрагдахаа мэдэгдсэн байна. Харин Кэвин Лоув тэргүүтэй бусад тоглогчид шийдвэрээ хараахан гаргаагүй байгаа аж.

FIBA: Хуульч Андреас Загклис ерөнхий нарийн бичгийн даргаар томилогдлоо

Олон улсын сагсан бөмбөгийн холбооны хуул зүйн албаны захирал Андреас Загклис өнгөрсөн Залуучуудын олимпийн үеэр нас барсан Патрик Бауманны оронд ерөнхий нарийн бичгийн даргаар томилогдлоо.

Өдгөө 38 настай Андреас Загклис 2016 оноос хууль зүйн албаны дарга, холбооны хууль хариуцсан ерөнхий зөвлөхөөр ажиллаж байна. Гэхдээ сүүлийн есөн жилийн хугацаанд холбоонд янз бүрийн албан тушаал хашиж байсан аж.

Өнгөрсөн аравдугаар сарын 13-нд Аргентиний Буэнос Айрес хотод болсон Залуучуудын олимпийн үеэр ерөнхий нарийн бичгийн даргаар 16 жил ажилласан Патрик Бауманны зүрх нь ажиллагаагүй болж, өөд болсон юм. Андреас цаашид П.Бауманны хийж байсан бүх үйл ажиллагааг үргэлжлүүлэх бодлого барихаа амлажээ.

Андреас Загклис

Залуудаа сагсан бөмбөгчин байсан Андреас Загклис Грект дасгалжуулагчийн сургалтад суусан. Тэрбээр таван хэлээр ярьдаг аж. Олон улсын сагсан бөмбөгийн холбоонд орохоосоо өмнө 2004-2008 онд гурван олимпод Спортын арбитрын шүүхэд туслах хуульчаар ажиллаж байв.

Патрик Бауманн зүрхний шигдээсээр өөд болжээ

Сагсан бөмбөгийн ертөнцөд том гарз учирч, Олон улсын сагсан бөмбөгийн холбооны ерөнхий нарийн бичгийн дарга ноён Патрик Бауманн Аргентинийн Буэнос-Айрес дахь зочид буудлынхаа өрөөнд өөд болжээ. Аргентинийн нийслэлд Залуучуудын гуравдугаар олимп болж байгаатай холбогдуулан спортын зүтгэлтнүүд цуглараад байсан юм.

Олон улсын олимпийн хорооны гишүүн, Томас Бахын дараа Олон улсын олимпийн хорооны тэргүүнээр сонгогдох магадлалтай хүний тоонд орж байсан П.Бауманн 51 насандаа бурхны оронд одов.

Талийгаач 51 настай байсан юм

Швейцарийн иргэн П.Бауманн идэр залуудаа сагсан бөмбөгийн тоглогч, дараа нь шүүгч, дасгалжуулагч болсон юм. Харин 1994 оноос Олон улсын сагсан бөмбөгийн холбоонд зүтгэж эхлэснээр спортын зүтгэлтний гараагаа эхлүүлсэн. Улмаар Олон улсын олимпийн хорооны гишүүн болж, Олон улсын спортын холбоодын тэргүүнээр ажиллаж байлаа.

Тэрбээр сүүлийн үед хурдацтай хөгжиж буй 3х3 сагсан бөмбөгийг ихэд дэмжиж, “Нанжин 2014” залуучуудын олимпод багтахад их үүрэг гүйцэтгэсэн юм.

П.Бауманн 3х3 сагсан бөмбөгийг идэвхтэй дэмжигч байв

Талийгаач сагсан бөмбөгийн холбооны генсикээр 2002 оноос хойш ажилласан. Харин 2007 онд Олон улсын олимпийн хорооны гишүүнээр сонгогдсон юм.

Тэрбээр “Лозанн 2020” Залуучуудын өвлийн гуравдугаар олимпийн зохион байгуулах хорооны дарга, “Лос-Анжелес 2028” зуны олимпийн зохицуулах хорооны тэргүүнээр ажиллаж байлаа.

Монголын баг Залуучуудын ДАШТ-д оролцоно

Сүүлийн үед эрчимтэй хөгжиж буй сагсан бөмбөгийн 3х3 төрөлд энэ жилээс анх удаа U23 буюу залуучуудын ДАШТ зохиогдох болсон билээ. Анхны тэмцээнийг БНХАУ-ын Шиань хотод зохион байгуулахаар болж, эрэгтэй, эмэгтэй тус бүр 20 баг өрсөлдөхөд бэлэн болов.

Хэсгийн шатны тэмцээн өнөөдөр нээлтээ хийж, энэ сарын 6-нд хүртэл үргэлжлэх бөгөөд хэсэг тус бүрээ тэргүүлсэн хоёр баг хасагдах шатанд шалгарч, шөвгийн наймаас шигшээ тулаан хүртэл өрсөлдөнө. Хасагдах шатны тоглолт энэ сарын 7-нд болох аж.

Эрэгтэй баг

  • Хэсэг А: Латви, Монгол, Эстони, Унгар, Индонез
  • Хэсэг Б: ОХУ, Нидерланд, Франц, Кыргыз, Египет
  • Хэсэг С: Серб, Словен, БНХАУ, Туркменистан, Филиппин
  • Хэсэг Д: Япон, Румын, Украин, Чех, Тайвань

Эмэгтэй баг

  • Хэсэг А: БНХАУ, Унгар, Румын, Герман, Уганда
  • Хэсэг Б: Украин, Нидерланд, Индонез, Казахстан, Беларусь
  • Хэсэг С: Франц, Монгол, Япон, Чех, Аргентин
  • Хэсэг Д: ОХУ, Андора, Иран, Шри Ланк, Малайз

Манай эрэгтэй шигшээд Ариунбаатарын Сүхбат, Очирбатын Эрдэнэцогт, Онолбаатарын Энхбаатар, Пүрэвсүрэнгийн Мөнх-Оргил нар багтсан бол эмэгтэй шигшээд Батсүрэнгийн Нандинцэцэг, Ганбатын Минжин, Мөнхсайханы Цэрэнлхам, Онолбаатарын Хулан нар оролцох юм.

Эрэгтэй шигшээ баг чансаагаар зургаад, эмэгтэй баг чансаагаар дөрөвдүгээрт жагссан.

Эрэгтэй багийн хуваарь:

X/3 – 14:20 цагт Монгол – Унгар

X/3 – 16:00 цагт Монгол – Латви

X/5 – 13:40 цагт Монгол – Эстони

X/5 – 15:40 цагт Монгол – Индонез

Эмэгтэй багийн хуваарь:

X/4 – 14:20 цагт Монгол – Аргентин

X/4 – 16:00 цагт Монгол – Франц

X/6 – 14:20 цагт Монгол – Япон

X/6 – 16:00 цагт Монгол – Чех

Эмэгтэй сагсчид Тайландын багт хоёр дахиа хожигдлоо

Азийн наадмын сагсан бөмбөгийн хасагдах шатанд шалгарсан Монголын эмэгтэй баг өнөөдөр Тайландын эсрэг тоглов. Хожсон нь тавдугаар байрын төлөө үзэлцэх тус тоглолтод 80:51-ээр Тайландын баг илүүрхлээ.

Монголын шигшээ багаас М.Булбул 11, Б.Өнөрзаяа 10, А.Хулан 10 оноо авч тэргүүлсэн бол Тайландаас Пенпан Ютанан 14, Супира Кланбут 14, Канокван Пражуапсук 14 оноо авчээ.

Хэдийгээр хожигдсон ч манай тамирчдын хувьд тэмцээн дуусах болоогүй. Одоо долдугаар байрны төлөө Казахстан – Индонезийн хожсонтой нь ирэх наймдугаар сарын 31-нд 11:00 цагаас өрсөлдөх юм.

Эмэгтэй сагсан бөмбөгчид хасагдах шатанд Тайванийн багтай өрсөлдөнө

Сагсан бөмбөгийн эмэгтэй шигшээ баг хэсгийн сүүлийн тоглолтоо Тайландын эсрэг хийж, 62:39-өөр ялагдлаа. Ингэснээр Монголын эмэгтэй шигшээ баг хэсэгтээ дөрөв тоглоод нэг хожиж, гурав ялагдсан үзүүлэлттэй болов.

Энэ тоглолтод манайхаас М.Булбул 11 оноо+8 самбар, Б.Өнөрзаяа 10 оноо+5 бөмбөг тасалсан ч бусад нь хангалтгүй тоглоллоо. Багаараа холын зайнаас 38 шидэж, тавыг л оруулжээ.

Тайландаас Супира Кланбут 11 оноо+9 самбар, Тидапорн Майхом 11 оноо+8 самбар авчээ.

Гэхдээ манай тамирчдын тэмцээн дуусаагүй. Тэд хасагдах шатанд Тайванийн багтай өрсөлдөх юм.

Тайванийн шигшээ баг энэ удаагийн тэмцээнд дөрөв дараалан хожиж, хэсгээ тэргүүлсэн хүчтэй баг.

Тайанчууд хэсэгтээ Казахстаныг 72:42, Солонгосын шигшээ багийг 87:85, Энэтхэгийг 84:61, Индонезийг 115:51-ээр илүүрхсэн аж. “А” хэсгийн сүүлийн тоглолт Энэтхэг – Индонезийн тоглолтын дараа хасагдах шатанд өрсөлдөх багууд эцсийн байдлаар тодорно.

 

Японы сагсан бөмбөгийн холбоо дөрвөн тоглогчоо хөөжээ

Азийн наадамд өрсөлдөж буй Японы сагсан бөмбөгийн эрэгтэй шигшээ баг дөрвөн тоглогчоо хөөж, гэрт нь буцаасан байна. Энэ талаар өнөөдөр хэвлэлд мэдэгдсэн бөгөөд Такүяа Хасимото, Кэйта Имамүра, Юяа Нагаёоши болон Такүма Сато нарыг орон нутгийн биеэ үнэлэгчтэй нэг оройг хамт өнгөрүүлсэн хэмээн буруутгасан байна.

Японы шигшээ баг хэсгийн шатанд Катарыг 82:71-ээр буулган авсны дараа дээрх явдал болсон бөгөөд хийсэн хэрэгтээ гэмшиж байгаагаа тоглогчид хүлээжээ.

Эх сурвалжийн мэдээлснээр тоглогчид шар айраг уухаар орон нутгийн бааранд очсон бөгөөд тэр үедээ эмэгтэйчүүдтэй танилцаж, “тохиролцсон” аж.

“Бидэнд заавал дагах ёстой ёс зүй гэж байдаг. Эдгээр дөрвөн тамирчин уг журмыг зөрчсөн. Тамирчид зөвхөн спортын талбарт төдийгүй олон нийтийн газарт ч биеэ зөв зохистой авч явах шаардлагатай” гэж Японы шигшээ багийг даргалж буй Ясүхиро Ямашита шийдвэрээ тайлбарласан байна.

Японы олимпийн хороо тэмцээнээс өмнө буцаж ирэх дөрвөн тоглогчийг зардлаа өөрсдөө гаргах ёстой хэмээн мэдэгдсэн аж.

Одоо Японы шигшээ баг ердөө найман тоглогчтой үлдсэн. Хэсгийн дараагийн тоглолтоо Хонконгийн багтай хийх юм. Япончууд Азийн наадамд тамирчдаа тэмцээнээс нь өмнө буцаасан түүх ганц энэ биш юм. Дөрвөн жилийн өмнө тус улсын усанд сэлэгч Нао Томита БНСУ-ын сэтгүүлчийн гар утсыг хулгайлсан хэрэгт буруутгагдаад гэртээ харьсан билээ. Үр дүнд нь Нао Томита ажлаасаа халагдаж, Японы усанд сэлэлтийн холбоо түүнийг 980 ам.доллароор торгоод, 18 сар тэмцээнд оролцохыг нь хориглосон юм.

Эмэгтэй сагсан бөмбөгчид Японы багт хожигдов

Хэсгийн эхний тоглолтод Хонконгийг 83:79-өөр хожиж, гараагаа амжилттай эхлүүлсэн Монголын эмэгтэй сагсан бөмбөгчид өнөөдөр Японы багтай хоёр дахь тоглолтоо хийлээ.

Харамсалтай нь, манай тамирчид япончуудын эсрэг юу ч хийж чадсангүй. Тоглолтын эхнээс олон удаа бөмбөгөө алдаж байсан нь нөлөөлж, улмаар Японы баг онооны давуу байдал олж авсан. Хэдийгээр тоглолтын үр дүн ойлгомжтой болсон ч хэсгээс хэдээр гарах эсэх нь онооны зөрүүнээс их зүйл шалтгаалах учир эцсээ хүртэл тэмцсэн. Гэхдээ хоёр багийн хооронд ур чадвар, ойлголцол гээд их зөрүү байлаа.

Эхний тоглолтод багаа хожилд хөтөлсөн М.Булбул энэ удаа 16 оноо авлаа. Харин бусад тоглогчдоос 10 оноо авсан хүн тодорсонгүй.

Харин Японоос дөрвөн тоглогч 10-аас дээш оноо авч, талбайд гарсан бүх тоглогчид оноо авсан аж. Япончууд тоглолтын турш 37 оновчтой дамжуулалт өгсөн бол манай баг 30 удаа бөмбөгөө алджээ.

Манай шигшээ баг хоёр дахиа хожигдов

Азийн наадмын 5х5 сагсан бөмбөгийн эрэгтэйчүүдийн төрөлд Монголын шигшээ баг өнөөдөр хоёр дахь тоглолтоо аваргаа хамгаалж буй БНСУ-ын багийн эсрэг хийж, 108:73-аар ялагдлаа. Эхний тоглолтод Тайландын багт 87:86-гаар хожигдсон манай залуусын хувь заяа наймдугаар сарын 20-нд болох Тайланд – Индонезийн тоглолтоор шийдэгдэж магадгүй юм. Учир нь тайландчууд энэ тоглолтод талбайн эзэн багийг хожвол Солонгосчуудын хамт хасагдах шатанд өрсөлдөх эрхтэй болно.

БНСУ-ын багаас америк гаралтай, өнгөрсөн нэгдүгээр сард Гуулин улсын иргэншилтэй болсон Рикардо Ратлифф эхний хагаст талбайд гарч, 19 оноо, 14 самбараас бөмбөг авчээ. Түүнчлэн энэ тоглолтын турш 20 оноо авсан довтлогч Хео Ил Юн эхний үед 17 оноо авсан юм. Тэрбээр холын зайнаас зургаан удаа оновчтой довтолсон аж.

Тоглолтын эхний үе эн тэнцүү эхэлсэн. Тооны харьцаа 12:12 байхад аваргууд тоглолтын санаачилгыг гартаа авч, 14 оноо дараалан авснаар хожих үндсээ тавьсан юм. Энэ 14 онооны 12-ыг Хео Ил Юн холын зайнаас гурван удаа дараалан оруулснаар “түүсэн” билээ. Харин түүнийг сэлгээнд суух үеэр америк легионер Р.Ратлифф хоёрдугаар үед 17 оноо авч, баг нь 30:17-гоор илүүрхсэн.

Гуравдугаар үед Монголын шигшээ баг 24:23-аар давамгайлсан ч дөрөвдүгээр үед Солонгосын багийн Жён Жюн Бом холын зайнаас дөрвөн удаа оруулсан юм. БНСУ-ын шигшээ баг бүх 12 тоглогчоо ашигласан аж.

Манай тоглогчдоос ганцаараа 20-оос дээш оноо авсан хүн байсангүй. Н.Батбаяр 15 оноо авсан бол Т.Санчир 13 оноо авч, Б.Билгүүн, П.Болортулга, Б.Болдбаатар нар ижил 11 оноо авлаа.

 

 

Индонезийн эрэгтэй шигшээ баг 56 жилийн дараа Азийн наадамд өрсөлдөв

Индонезийн эрэгтэй сагсан бөмбөгийн шигшээ баг 56 жилийн дараа Азийн наадамд эргэн ирлээ. Энэ улсын шигшээ баг 1962 оноос хойш анх удаа шар тивийн олимпод өрсөлдөж буй юм. Тэр үед Индонезийн Жакарта хотод Азийн наадам болсон билээ.

Тэд хэсгийн шатны эхний тоглолтоо дөрвөн жилийн өмнө түрүүлсэн БНСУ-ын шигшээ багтай хийсэн юм. БНСУ-ын баг өнгөрсөн нэгдүгээр сард АНУ-ын иргэн Рикардо Престон Ратлиффийг эгнээндээ элсүүлж, төвдөө улам хүчирхэг болсон билээ. Р.Ратлифф ч үүргээ онц гүйцэтгэж, 30 оноо, 19 самбар авсан юм. Р.Ратлифф 2012 оны NBA-гийн драфтад нэрээ өгсөн ч сонгогдож чадаагүй. Тэр жилээ БНСУ-ын лигийн драфтад нэр дэвшиж, сонгогдсон анхны америк тоглогч болсон түүхтэй.

Индонезийн шигшээ багт ч мөн америк тоглогч бий. Тэр нь Жамарр Жонсон. Тэрбээр 2011 онд NBA-гийн драфтад нэр дэвшсэн ч сонгогдоогүй. Улмаар 2015 оноос Индонезийн лигт тоглох болсон аж.

Ж.Жонсон энэ тоглолтод 16 оноо, 8 самбараас бөмбөг авчээ.

Манай эрэгтэй шигшээ багийн дараагийн тоглолт наймдугаар сарын 16-нд 17:00 цагаас БНСУ-ын эсрэг тоглоно. Харин Индонезийн баг наймдугаар сарын 20-нд 19:30 цагаас Тайландтай өрсөлдөх юм.