Улирлын хоёр дугаар хэсэг эхэлж солилцооны цонх хаагдсанаар багуудын бүрэлдэхүүн эцсийн байдлаар тодорсон билээ.

Энэ улиралд аваргын төлөө өрсөлдөөнд дээгүүр “гүйх” магадлалтай 10 багийн давуу болон сул талыг танилцуулья.

Бруклин Нэтс

Аварга авах шалтгаан: “Гурван толгойтой мангас”-ын довтолгоог хэн ч зогсоож чадахгүй

Улирлын дундуур лигийн элит хэмжээний оноо авагч Жеймс Харденг солилцоогоор авснаар “гурван толгойтой мангас” бүрдүүлээд байсан билээ. Үүгээр ч зогссонгүй нэгэн цагт бүх одод тоглогч байсан Блэйк Гриффин, Ламаркус Алдриж нарыг багтаа нэгтгэснээр сэлгээний оноо авалт болон туршлага нэмэгдлээ.

Их гурвал болох Кевин Дурант, Кайри Өрвинг болон Жеймс Харден нар эрүүл байж чадвал долоон тоглолтын цувралд их гурвалыг зогсоох баг байхгүй болов уу.

Аварга авахгүй шалтгаан: Хамгаалалтад тийм ч их хүч зарцуулдаггүй

Энэ улиралд 17 тоглолтод 120-оос дээш оноо алдсан бөгөөд мөн гурван ч тоглолтод эсрэг багтаа 140 оноо өгсөн нь Нэтсийн хамгаалалт 30 багаас 26-р байранд бичигдэх шалтгаан.

Даллас Mаверикс

Аварга авах шалтгаан: Лука Дончич багаа өндөр төвшинд хөтөлнө

Ердөө 22 настай ч улирлын үнэ цэнэтэй тоглогчийн шагналд өрсөлдөж буй Лука багийнхаа тоглолтыг удирдан дээд төвшиний тоглолт үзүүлж байгаа нь гайхалтай. Дончичыг талбайд байх үед багийн довтолгоо лигт тавдугаар байранд байгаа нь амжилтад хүргэх гол үзүүлэлт юм.

Аварга авахгүй шалтгаан: Хамгаалалт дундаж бас супер  довтолгоотой баг биш

Улирлын өмнө солилцоогоор Жош Ричардсоныг нэгтгэж хамгаалалтаа илүү сайжруулсан гэгдэж байсан ч өнгөрсөн улиралд 18-р байранд байсан хамгаалалтын үзүүлэлт нь 22 луу ухраад байна. Далласын довтолгоо Дончичийг талбай дээр байхад тавдугаар байранд байдаг ч нийлбэр дүнгээр довтолгоо нь 10-р байранд явж байна.

Денвер Наггетс

Аварга авах шалтгаан: Довтолгооны гурав дахь сонголт болон жигүүрийн хамгаалагч авчирсан

Өнгөрсөн жил Леброн Жеймс, Кавай Леонард мэтийн хүчирхэг довтлогчдыг хамгаалах тоглогчгүй байсан нь тэдний сул тал болж байв. Харин энэ жил Аарон Гордоныг солилцооны цонх хаагдахын өмнөхөн авснаар энэ сул талаа нөхсөн.

Аварга авахгүй шалтгаан: Залуу тоглогчдын довтолгооны орон гаран тоглолт

Жамал Mюррей болон Mайкл Портер Жуниор нарын энэ жилийн орон гаран тоглолтууд олон удаа давтагдсан юм. Mюррей таван тоглолтод 10-аас доош оноо аваад байгаа бол Mайкл Портерийн хувьд бүр ч дор үзүүлэлттэй.

Лос Анжелес Клипперс

Аварга авах шалтгаан: Авьяастны цуглуулга

Өнгөрсөн зуны хамгийн том шуугиан болон нэгдсэн Кавай Леонард болон Пол Жорж нар талбайд цуг гарахдаа эсрэг багтаа айдаст автуулдаг. Хамгаалалт болон довтолгоонд идэвхтэй байж чаддаг хоёр супер тоглогч нь эрүүл байвал тэдэнд ашигтай.

Аварга авахгүй шалтгаан: Өнгөрсөн жилийн хасагдах шатны уналт болон холбон тоглогчийн асуудал

Бүрэлдэхүүнээ эрс өөрчилж дасгалжуулагчаа хүртэл сольсон ч хүсч байсан сайн холбогч авч чадаагүй. Өнгөрсөн жил тэд бүсийн хагас шигшээ цувралд эхний дөрвөн тоглолтоос гурав хожсон ч дараалан гурван тоглолтод хожигдсоноор олны итгэлийг хөсөрдүүлсэн.

Лос Анжелес Лейкерс

Аварга авах шалтгаан: Леброн Жэймс болон Энтони Дэвисийн хослол

Бүх цаг үеийн шилдэг тоглогчид нэр дэвшигч “Хаан” Жэймс болон Дэвис энэ улиралд хамтдаа талбай дээр байх үед баг нь 100 довтолгоо тутамд өрсөлдөгчөөсөө 14.6 оноо илүү авч байгаа нь аваргын цомоо хамгаалахад тус болно.

Аварга авахгүй шалтгаан: Гэмтэл

Энэ улирлыг аваргууд маш том гарзтай үргэлжлүүлж байна. Энтони Дэвисийг удаан хугацааны бэртэлд алдсан бол Леброн Жэймс шагайгаа гэмтээсэн нь тэдний хувьд нөхөж баршгүй том хохирол юм.

Өнгөрсөн жил хасагдах шатанд багийн хоёр лидерээс бусдаар ганц л тоглогч 10-аас дээш оноо дундажласан нь тэдний бусад тоглогч нар довтолгоонд ямар муу байсныг харуулж байна. 

Mилуаки Бакс 

Аварга авах шалтгаан: Яннис Антетокумпогийн гайхамшиг болон Крис Mиддлетоны үр нөлөө

Одоогоор дэлхий дээр байгаа хамгийн шилдэг сагсан бөмбөгийн тоглогч хэн бэ гэвэл Яннис Антетокумпог нэрлэнэ. Хоёр ч улирал дараалан үнэ цэнэтэй тоглогч болсон тэрбээр сүүлийн улиралдаа шилдэг хамгаалан тоглогч болсон билээ.  

Өнгөрсөн зун Жрү Холидей “Бакс”-д нэгдсэнээр гуравдагч одоо авчирсан нь тус багийн урд шугамын хамгаалалтыг сайжруулсан юм.

Аварга авахгүй шалтгаан: Tоглолт нь маш ойлгомжтой мөн бүрэлдэхүүн хангалтгүй

Сүүлийн хоёр хасагдах шатанд өрсөлдөгч багууд нь Яннис Антетокумпо дээр сайн хамгаалалт хийснээр ядах юмгүй буулгаж авсан. 

Энэ жил Жрү Холидей болон ПЖ Tакер нарыг нэгтгэж чадсан ч сэлгээний хувьд тун тааруу байгаа нь аваргын цомоос хол байлгах том шалтгаан юм.

Филадельфи Севенти Сиксерс 

Аварга авах шалтгаан: Жөэл Эмбийдийн эзэрхэг тоглолт болон маш сайн хамгаалалт

Энэ улиралд лигийн 29 багт хэрхэн эрүүл саруул Эмбийдийг зогсоох вэ гэсэн асуулт тулгарсан.

Долоон тохой өндөр төвийн тоглогч Эмбийд MVP-д өрсөлдөж байгаа бөгөөд энэ улиралд түүний довтолгоо болон хамгаалалтын идэвх сайжирчээ.

76-гийн довтолгоо ганц Эмбийдээс хамааралтай биш. Бэн Симмонс болон Tобайс Харрис нар түүнд хань болж байна. Филигийн нягт хамгаалалт аваргын аялалд нь тус хүргэнэ.

Аварга авахгүй шалтгаан: Эмбийдийн гэмтэл

Багийн супер од Жөэл Эмбийд замналдаа улиралд 64-өөс дээш тоглолтод оролцож үзээгүй нь тэдний шүдний өвчин болж байна. Гол тоглогчоо бэртэлд алдвал тэдний аваргын төлөөх өрсөлдөөн өндөрлөнө.

Финикс Санс

Аварга авах шалтгаан: Төгс бүрэлдэхүүн

Өнгөрсөн жил Орландод үргэлжилсэн баблд нэг ч хожигдол амсаагүй “Санс” Крис Полыг багтаа нэгтгэснээр жинхэнэ аюулыг тарих баг болсон юм. 

Крис Пол найруулж Девин Бүүкэр довтлон Де’Андрэ Эйтон самбарт тоглож Mикал Брижес хамгаалалтыг хариуцана гэх зэрэг бүх тоглогчидын үүрэг болон байрлал нь тодорхой байгаа нь магтууштай.

Нарнуудын довтолгоо лигт наймдугаар байранд мөн хамгаалалт тавд жагсаж байгаа нь ямархуу хүчирхэг баг вэ гэдгийг нь илтгэнэ.

Аварга авахгүй шалтгаан: Tуршлага

Гарааны чухал гурван тоглогч болох Эйтон, Бүүкэр, Брижес нар хасагдах шатны нэг ч тоглолтод оролцож үзээгүй байгаа нь хамгийн том сул тал. 

Портлэнд Tрэйл Блэйзерс

Аварга авах шалтгаан: Дамиан Лиллардийн довтолгооны нөлөө

Энэ улиралд 47 тоглолт хийсэн Блэйзерсийн гарааны тоглогчид болох СиЖей Mакколум, Юсуф Нүркич нар ихэнх тоглолтод оролцоогүй ч Портленд лигт довтолгоогоор дээгүүрт жагсаж байгаа нь Лиллардын гавьяа.

Аварга авахгүй шалтгаан: Хамгаалалт 

Гайхалтай довтолгоотой улирал үргэлжлэн байгаа ч хамгаалалт довтолгооны зөрүү нь хасах үзүүлэлттэй байна. 100 довтолгоо тутамд 116 оноо алддаг нь мөн лигийн хамгийн муу үзүүлэлттэй хоёр дахь баг болгож байна.

Юта Жазз

Аварга авах шалтгаан: Лигийн шилдэг баг

Улирлын амжилтаар лигийг тэргүүлж байгаа Жазз хамгаалалт, довтолгооны үзүүлэлтээр эхний тавд яваа цор ганц баг. 

Бүрэлдэхүүндээ энэ улирлын гурван бүх одод тоглогчтой Солт Лэйк хотын багт шилдэг зургаа дахь тоглогчид нэрлэгдэж буй Жордан Кларксон тус багийн гол зэвсэг юм.

Аварга авахгүй шалтгаан: Туршлага

Донован Мичелл багаа удирдан аваргын зиндаанд хүрэх эсэх нь асуулт болж байна. Улиралд үзүүлж буй амжилтаа хасагдах шатанд хадгалах эсэхээс тэд хэр хол зам туулах нь тодорхой болно.