Алдарт Лэброн Жэймс замналынхаа турш №23 дугаараа хоёр дахь удаагаа солих болов. Тэрбээр Энтони Дэвист энэ дугаараа “бэлэглэж”, өөрөө №6 дугаартай талбайд гарна.

“Лос Анжелес Лэйкерс” баг албан ёсоор Энтони Дэвисийг авлаа. “Нью Орленс Пеликанс” солилцоог хүлээн зөвшөөрөөд хоёр долоо хоногийн дараа албан ёсоор баталсан юм. Учир нь тэр дор нь наймааг хийсэн бол “Лэйкерс”-ийн цалингийн цэс дахин нэг од тоглогч авчрахад хүрэлцэхгүй байлаа.

Мо Вагнер, Исаак Бонга, Жемеррио Жонс нарыг “Вашингтон Визардс” руу илгээж, үүн дээр 2022 оны хоёрдугаар бүсийн эрх нэмэгджээ. Харин “Визардс” дээрх гурван тоглогчийг аваад “Пеликанс” руу бэлэн мөнгө илгээснээр гурван багийн хооронд солилцоо явагдаж, Э.Дэвис албан ёсоор “Лэйкерс”-ийн бүрэлдэхүүнд багтлаа. Солилцоог долдугаар сарын 6-нд албан ёсоор батлах болно.

Үүн дээр нэмээд Э.Дэвис солилцооноос ирэх 4 сая “ногоон”-оо авахгүй байх тохироо хийснээр “Лэйкерс” 32 сая ам.долларын цалингийн зай гаргав. Үүний ачаар тэд макс гэрээ буюу цалингийн дээд хязгаарыг тоглогчдод санал болгох боломжтой болсон. Кавай Леонард, Кайри Өрвинг, Жимми Батлер нарт 32.7 саяыг, Д’Анжело Расселлд 27.3 саяыг өгөх боломжтой гэсэн үг.

Шинэ тоглогчтой болох аян зөвхөн од тоглогчоор хязгаарлагдахгүй. Одоогоор “Лэйкерс”-ийн бүрэлдэхүүнд албан ёсны гэрээтэй дөрвөн тоглогч бий. Үүн дээр энэ жилийн драфтын №46-гаар сонгож авсан Тален Хортон Такер нэмэгдэнэ.

Э.Дэвисийн солилцоо нааштай болсон энэ үед Лэброн Жэймс өөрийн №23 дугаараа шинэхэн хамтрагчдаа өгч, өөрөө №6 дугаартай тоглох гэнэ. Э.Дэвис ахлах сургуулиасаа хойш №23 дугаартай талбайд гарсан. Харин Л.Жэймсийн хувьд “Майами Хит” багт дөрвөн жил болохдоо №6 дугаартай байлаа.

Нэгэн цагт NBA-гийн хамгийн өндөр тоглогч гэгдэж байсан Манут Болын төрсөн хүү Бол Бол энэ жилийн NBA-гийн драфтад нэр дэвшсэн. Шинжээчид 218 см өндөртэй, 107 кг жинтэй төвийн тоглогчийг топ 10-аар багтах тоглогчийн нэг гэж үзэж, драфтын сонгон шалгаруулалтад уригдсан 20 тоглогчийн нэг болсон юм. Гэвч багууд түүнийг сонгосонгүй. Бүр эхний бүсээс унаж, хоёрдугаар тойргийн №44-өөр “Майами Хит” баг сонгоод “Денвер Наггетс” руу солилцоонд явуулсан билээ.

АНУ-ын Нью-Йорк хотод байрлах Бруклин дүүргийн “Barclays Center”-т ирээдүйн NBA-гийн одод чуулж байлаа. Энд ирээдүйгээ тодорхойлох авьяаслаг 20 тоглогч хуран цугласан юм. Хэдхэн хормын дараа тэд лигийн шинэ тоглогчид болж, амьдралынхаа нэгэн хуудсыг нээх байв.

Аз одтой аавын хөвгүүдийн дотроос нэгэн нэр олны анхаарлыг татаж байлаа. Энэ бол Бол Бол. Үнэндээ энэ нэр бол NBA-д хэдийнэ танил болчихсон. Бол Болын эцэг Манут Бол 1990-ээд оны үед лигт мөрөө тамгалж, 1985 оны драфтын хоёрдугаар бүсийн 31-ээр “Вашингтон Буллетс” багт данслагдсан нэгэн. М.Бол 231 см өндөртэй, үүгээрээ тэр лигт тоглож байсан хамгийн өндөр хоёр тоглогчийн нэг болсон түүхтэй. NBA-д өнгөрүүлсэн 11 жилийн хугацаанд М.Бол дундажаар нэг тоглолт хийсэн хаалтаараа хоёрдугаарт, нийт хаалтаар 15-д бичигдэж байлаа.

Харин түүний хүү Бол Бол ааваасаа дутахгүй авьяастай. Ахлах сургуулийн таван одтой тоглогч байсан ч Орегон их сургуульд өнгөрүүлсэн анхны жилээ есөн тоглолтод оролцоод 21 оноо, 9.6 самбар, 2.7 хаалт гүйцэтгэсэн нь чамлахаар үзүүлэлт биш. Харамсалтай нь, хөлөндөө хүнд бэртэл авснаар улирал дуустал тоглох боломжгүй болсон юм.

Гэхдээ шинжээчид түүнийг өндөр үнэлж байлаа. Ааваасаа илүү тоглогч болох магадлалтай гэж үзээд драфтад дээгүүр дэвшүүлсэн. Тэр ч бүү хэл NBA-гийн хамгийн доминант төвүүдийн нэг явсан Шакил О’Нил түүнийг Зайон Уильямсоноос ч илүү амжилтад хүрэх тоглогч хэмээн үнэлж байв. Гэхдээ багийн менежерүүд ингэж бодсонгүй. Түүнийг NBA-гийн нэгэн цаг үеийн золиос боллоо гэж үзэхэд буруудахгүй. Өмнө нь өндөр нуруутай, ур чадвар сайтай төвийн тоглогчид лигт ус агаар мэт хэрэгцээтэй байлаа. Ур чадварын хувьд шалихгүй боловч том биетэй тоглогчид драфтад дээгүүр байр эзэлдэг байсан юм. Харин одоо Б.Бол шиг тоглогч хоцрогджээ.

Харин Б.Бол бусдын буруу байсныг батлах зорилготой гэдгээ ярив. “Денвер Наггетс” шиг чадварлаг багт очиж байгаадаа баяртай байгаагаа илэрхийлсэн судан эр “Өөрийнхөө биеийн өндөртэй харьцуулахад хангалттай ур чадвартай гэж боддог. Би бөмбөгийг ямар ч байрлалаас шидэж чадна, дамжуулалт өгнө, хүссэнээрээ залж дөнгөнө. Над шиг өндөртэй хүмүүст баймгүй ур чадвартай гэдгээ харуулна” гэж ярьжээ.

Б.Бол ийн хойгуур сонгогдсон бас түүний гэмтлийн түүхтэй холбоотой. Хөлөндөө бэртэл авахаас өмнө драфтын эхний тавд багтахад гайхах зүйлгүй байлаа. Харин түүнд эрсдэл гаргах дуртай “Денвер” боломж олгохоор шийдсэн юм.

Өнгөрсөн жилийн драфтад мөн л дээгүүр нэрлэгдэж байсан ч гэмтлийн улмаас доошоо унасан Майкл Портэр Жуниорыг сонгож авсан “Шижир алтнууд” дахин нэг эрсдэлтэй сонголт хийсэн нь энэ юм. Тус багийн сагсан бөмбөг хариуцсан ерөнхийлөгч Тим Коннели хийсэн сонголтондоо сэтгэл хангалуун байгаа аж.

Зайон Уильямсон, Жа Морант, Р.Жэй Барретт нар албан ёсоор NBA-гийн шинэ тоглогчид боллоо.”Forbes” сэтгүүлээс шинэ тоглогчдын цалингийн жагсаалтыг гаргажээ.

Олон хүн таамаглаж байсны дагуу Дюк их сургуулийн авьяаслаг довтлогч Зайон Уильямсон “Нью Орленс Пеликанс” багийн тоглогч болж, драфтыг тэргүүлсэн бол саяхан Майк Конлигоо солилцоонд явуулсан “Мэмфис Гриззлис” Мюррэй Стэйт их сургуулийн багийн холбогч Жа Морантыг сонгосон юм.

“Нью Йорк Никс” баг солгой тоглолттой, хамгаалагч Р.Жэй Барреттэд итгэл хүлээлгэсэн билээ.

Энэ жилийн драфтын №1 Зайон Уильямсон анхны гэрээгээр дөрвөн жилийн хугацаанд 44.2 сая “ногоон” халааслах юм. Үүнээс хоёр жилийн 20 сая ам.доллар нь баталгаат гэрээ аж.

Сонирхуулахад, 1994 оны драфтын №1-ээр сонгогдсон Глэн Робинсон 10 жилийн 68 сая ам.долларын гэрээ байгуулсан нь одоог хүртэл шинэ тоглогчтой хийсэн хамгийн том гэрээгээр тооцогддог. Г.Робинсоны гэрээний дараагаас багийн эзэд шаардлага тавьж, шинэ тоглогчдын цалинд хязгаар тогтоосон билээ.

2019 оны шинэ тоглогчдын цалингийн хүснэгт

Холливудын цуврал кино хийх шахсан Энтони Дэвис өөрийнхөө хүсч байсан багтаа очлоо. “Лос Анжелес Лэйкерс” түүнийг өөрийн болгохдоо Лонзо Болл, Брэндон Инграм, Жош Харт болон драфтын нэгдүгээр тойргийн гурван эрхийг “Нью Орленс Пеликанс” руу шилжүүллээ. Тэд 2019 оны драфтын №4 болон 2021, 2024 оны драфтын нэгдүгээр тойргийн эрхтэй болсон юм.

Энэ солилцоо хоёр талд ашигтай боллоо гэхэд буруудахгүй болов уу. Кэвин Дюрант болон Клэй Томпсоны бэртэл “Голдэн Стэйт”-ийн ноёрхол унах дохио болж өгсөн бол Өрнөдийн бусад багуудад ашигтай. Нэгэнт лигийн шилдэг хоёр тоглогчтой болсон тул “Лэйкерс” багаа илүү сайжруулахыг хүсч буй нь лавтай.

Кэвин Дюрант, Клэй Томпсоны бэртэл энэ жилийн “хүн зах”-ын барааг ч эрс өөрчилсөн. Нэгэнт тэд хуучин багтаа үлдэх магадлалтай болсон тул “Нью Йорк Никс”, “Лос Анжелес Клиппэрс” зэрэг том зах зээлтэй багууд Кавай Леонард руу анхаарлаа төвлөрүүлж байна.

Харин “Лэйкерс” гурав дахь од тоглогчоо хайж сууна. “The New York Times”-ын сэтгүүлч Марк Стейний мэдээлснээр бол Кэмба Уолкерийг эгнээндээ элсүүлэхийг хүсч байгаа аж. Харин К.Уолкерийн хувьд “Чарлотт Хорнетс”-ийг орхиж явбал 80.7 сая ам.доллар алдах юм.

К.Уолкерт хоёр боломж бий. Эхнийх нь “Хорнэтс” багтайгаа таван жилийн 221.8 сая ам.долларын гэрээ байгуулж, ирэх жил хасагдах шатанд өрсөлдөх эрхийн төлөө тэмцэх, эсвэл “Лос Анжелес Лэйкерс”-тай дөрвөн жилийн 140.6 сая “ногоон”-ы гэрээ үзэглэж, аваргын төлөө тэмцэх.

Харин К.Уолкер “Лэйкерс”-ийг сонговол тус багийн цалингийн цэсэнд дундаж гэрээ буюу 4.76 сая ам.долларын гэрээ үлдэнэ.

“Лэйкерс” аваргын төлөөх эхний дайралтаа хийсэн бол “Пеликанс”-ын ирээдүй гэрэлтэж байна.

NBA-гийн драфтын нэгдүгээр бүсийн эхний эрхийг авсан “Пеликанс” энэ драфтын онцгой сонголт гэгдэж буй Зайон Уильямсоныг авчрах магадлалтай. Довтолгоонд Лонзо болон Зайоны хослолыг хараад зогсохгүй хүчирхэг хамгаалалттай баг бүрдэх юм. Л.Болл бол хэдийнэ лигийн шилдэг хамгаалагчдын тоонд орох болсон. Энэ багийн лидер Жруй Холидэй лигийн шилдэг хамгаалагчдын нэг билээ.

Мөн энэ жил тэд драфтын №4-өөр сонгоно. Одоогоор шинжээчид Виржиниагийн их сургуулийн довтлогч Де’Андре Хантерыг сонгох болов уу гэж таамаглаж байна.

NBA-гийн шигшээ цувралын зургаа дахь тоглолтын гол баатрууд бол Кайл Лоури болон Фред ВанФлийт нар байлаа. Гэхдээ энэ цуврал төдийгүй хасагдах шатанд Кавай Леонард шиг тэгш, супер тоглолт үзүүлсэн хүн байсангүй. Ингээд К.Леонардын онцлох 11 баримтыг сонирхуулья.

Тайлбар: Зөвхөн энэ жилийн плей-оффын үзүүлэлтийг хамруулав. 1984 онд 16 баг хасагдах шатанд өрсөлдөх болсон үеэс хойш багадаа 10 тоглолтод оролцсон тоглогчдын үзүүлэлт хамрагдсан юм.

.1. Дорнод бүсийн хагас шигшээд “Филадельфи 76” багийн эсрэг цувралын долоо дахь тоглолтод оруулсан түүний хожлын шидэлт NBA-гийн түүхэнд нэгэн шинэ хуудас нээсэн билээ. Бүх цаг үеийн хамгийн олон оноо авсан Карим Абдул Жаббар, нэг тоглолтод 100 оноог бүртгүүлсэн Уилт Чэмбэрлэйн, агуу Майкл Жордан, алдарт Коби Брайант, “Хаан” Лэброн Жэймс гээд бүх цаг үеийн хамгийн шилдэг гэх тодотголтой тэдний хэн нь ч цувралын долоо дахь тоглолтод хожлын шидэлт оруулж байсангүй.

2. Кавай Леонард хоёр өөр багийн өмсгөлтэй шигшээ цувралын МВП буюу үнэ цэнэтэй тоглогч болсон гурав дахь эрхэм. Түүнээс өмнө Карим Абдул Жаббар (Бакс, Лэйкерс) болон Леброн Жэймс (Хит, Кавальерс) ийм амжилтад хүрсэн.

3. К.Леонард “Торонто Рэпторс”-ыг хасагдах шатны бүх цувралын турш “чирсэн”. Үүнийг нотлох хамгийн том баримт бол нэг тоглолтод авсан оноо. Кавай энэ плей-оффт 30.5 оноо дунджилсан бол 1984 оноос хойш түрүүлсэн багаас түүнээс олон оноо дунджилсан тоглогчдын жагсаалтыг сонирхуулья.

• Майкл Жордан, 1993 (35.1 оноо)
• Майкл Жордан, 1992 (34.5)
• Хаким Олажувон, 1995, (33.0)
• Майкл Жордан, 1998 (32.4)
• Майкл Жордан, 1991 (31.1)
• Майкл Жордан, 1997 (31.1)
• Шакил О’Нил, 2000 (30.7)
• Майкл Жордан, 1996 (30.7)

4. Сэтгүүлч Жон Холлинжерийн санаачилсан тухайн тоглогчийн үзүүлэлтийг математикийн аргачлал руу шилжүүлсэн тоон баримтаар Кавай Леонард 24.2 оноо авчээ. Аваргалсан багт түүнээс илүү өндөр оноо авсан тохиолдол өмнө нь тун цөөхөн гарч байв. Тодруулбал, Ларри Бөрд (1984, 1986), Майкл Жордан (1991, 1992, 1993), Хаким Олажувон (1995), Шакил О’Нил (2000) нар энэ жилийн Кавайгаас илүү үзүүлэлттэй байлаа.

5. 1984 оноос хойш хасагдах шатанд багадаа 10 тоглолт хийсэн тоглогчдоос нэг тоглолтод авсан оноогоороо тэргүүлсэн жагсаалтыг Майкл Жордан эсвэл Лэброн Жэймс найм ба түүнээс олон удаа тэргүүлж байв. Харин энэ жил энэ жагсаалтад шинэ нэр нэмэгдсэн билээ.

6. Шидэлтийн хувийг илүү нарийвчилсан заалтаар үзүүлдэг “True shooting percentage” гэх үзүүлэлтээр Кавай хасагдах шатанд 62 хувьтай байлаа. Дундажаар 30 оноо авахдаа 60-аас дээш хувьтай шидсэн нь мөн л домгуудын эгнээнд багтах үзүүлэлт аж. Түүнээс өмнө Адриан Дэнтли (1984), Бернард Кинг (1984), Алекс Энглиш (1985), Майкл Жордан (1989), Шакил О’Нил (1998) болон Лэброн Жэймс (2009, 2017, 2018) ийм үзүүлэлттэй байлаа.

7. Гэхдээ дээрх долоон тоглогч тухайн жилдээ түрүүлж чадаагүй юм.

8. Кавайгийн багийнхаа ялалтад нөлөөлөх үзүүлэлтийг 4.9 хувь гэж үнэлжээ. Энэ үзүүлэлтээр тэр зургадугаарт жагсана. Тим Данкан (2003), Дирк Новицки (2006), Лэброн Жэймс (2012, 2013, 2018) нар түүнээс илүү үзүүлэлттэй байв.

9. Кавай Леонард “Торонто Рэпторс” дахь анхны улиралдаа аварга аваад зогсохгүй, финалын үнэ цэнэтэй тоглогч болсон юм. Ийм амжилтыг 1984 оноос өмнө “Шидэт” Жонсон 1980 онд шинэ тоглогч байхдаа, Мозес Малоун 1983 онд “Филадельфи 76” багт анх ирсэн жилээ аварга авсныг түүх гэрчилдэг. Харин хамгийн сүүлийн жишээ гэвэл 2017 оны Кэвин Дюрант.

10. Тоо баримт хөтөлдөг нэгэн компанийн мэдээлснээр Кавай эхний улиралдаа хасагдах шатанд багийнхаа хожилд нөлөөлсөн хувиар тэргүүлсэн гэнэ. Энэ үзүүлэлтийг сонирхуулья:

• Кавай Леонард, 2019 Торонто Рэпторс (4.9%)
• Чарлес Баркли, 1993 Финикс Санс (4.6)
• Кэвин Гарнэтт, 2008 Бостон Селтикс (4.1)
• ЛэБрон Жэймс, 2011 Майами Хит (3.8)
• Дикембэ Мотомбо, 2001 Филадельфи 76 (3.8)
• Чонси Биллапс, 2009 Дэнвэр Наггетс (3.2)
• Кэвин Дюрант, 2017 Голдэн Стэйт Уорриорс (3.1)
• Рэй Аллен, 2008 Бостон Селтикс (3.1)

11. К.Леонард энэ зун чөлөөт агент болох боломжтой. Хэрвээ тэр багаа орхивол нэг жил зүтгэхдээ финалын үнэ цэнэтэй тоглогчийн шагнал хүртсэн болсон анхны тамирчин болох юм.

Өдгөө NBA-гийн ертөнцөд хамгийн их яригдаж буй тоглогч бол Кавай Леонард юм. Тэрбээр “Торонто Рэпторс” багт ирсэн эхний жилдээ багаа аваргын төлөө шалгаруулсан нь нэгэн үе мартагдсан Кавайг сагсан бөмбөг сонирхогчдод дахин сануулсан гэхэд болно. Тэгвэл К.Леонардын хувийн амьдрал тун нууцлаг. Түүний ийм нууцлаг амьдралтай салшгүй холбоотой хүн бол Кишел Шиплэй гэх эмэгтэй юм.

Өнгөрсөн гуравдугаар сарын сүүлээр Кавай Леонардын найз бүсгүй Кишел Шиплэй Канадад хоёр дахь хүүхдээ төрүүлсэн юм. Олны анхаарлыг хамгийн их татсан зүйл нь олон сэтгүүлчдийн хэн нь ч Кишелийг бие давхар гэдгийг мэдээгүй явдал. Үнэндээ К.Леонард болон түүний хамтрагч К.Шиплэй нарын амьдрал тун нууцлаг байдаг. Өдгөө торонточуудын хайртай хүү болоод буй К.Леонардын зүрх сэтгэлийг татсан энэ эмэгтэй хэн бэ?

1. Кишел Шиплэй гэж хэн бэ

Кишел 1989 оны дөрөвдүгээр сарын 10-нд Кеннет болон Катигийн гэр бүлд мэндэлсэн юм. Тэр ирээдүйн найз залуугаасаа хоёр насаар эгч (Кавай 1991 оны зургадугаар сарын 29-нд төрсөн). Кишел айлын ганц охин биш. Түүнээс гадна Кассандра, Кениша хэмээх хоёр эгч, дүүс бий.

2. Тэд яаж танилцсан бэ?

Кишел Сан Диегогийн их сургуулийг 2012 онд төгссөн. Их сургуулиа төгсөөд мэргэжлээрээ хэсэг ажиллаж байсан аж. Харин Кавай NBA-д хөл тавихаасаа өмнө Сан Диегогийн их сургуулийн тоглогч байлаа. Хосуудыг их сургуульд суралцаж байхдаа танилцсан гэж таамагладаг. Ямартай ч Кавайг “Сан Антонио Спэрс”-т драфтаар очих үед Кишел Техас руу нүүсэн байдаг.

3. 2016 онд охиноо төрүүлжээ

Кавай 2016 оны долдугаар сард охинтой болсон. Калия охин төрсөн нь багаасаа эцгээсээ өнчирсөн Кавайгийн амьдралд том нөлөө үзүүлсэн гэдэг.

4. Гэрлэсэн эсэх нь тодорхойгүй

Хэдийгээр 2014 оноос хойш таван жилийн хугацаанд хамт амьдарч байгаа ч тэдний харилцаа ямар түвшинд байдаг нь одоог хүртэл тодорхойгүй. Учир нь хосууд албан ёсоор гэрлэсэн тухай бүртгэлгүй, сүй тавьсан эсэх нь ч тодорхой биш байдаг. Ойрын эх сурвалжийн мэдээлснээр бол тэд тун удахгүй хуримаа хийхээр төлөвлөж байгаа гэнэ.

5. Нууцлаг нэгэн

Кавай Леонард бол бусад NBA-гийн одуудтай харьцуулахад тун нууцлаг нэгэн. Тэрбээр твиттер, фэйсбук, инстаграм зэрэг цахим хуудас ашигладаггүй. Тэгвэл Кишел ч мөн адил цахим хуудас ашигладаггүй. Мөн түүний гэр бүлийнхэн нь охин болон Кавайгийн зургийг цахимд байршуулах дургүй байдаг гэнэ.

“Даллас Маверикс”, “Нью Йорк Никс”-ийн хооронд томоохон солилцоо боллоо.

ESPN-ий сэтгүүлч Адриан Вожнаровски энэ долоо хоногт хоёр том мэдээллийг цацлаа. Эхнийх нь Энтони Дэвисийг гэрээгээ сунгахгүй, солилцоонд орох хүсэлт тавьсан гэсэн бол дараагийнх нь “Никс”, “Маверикс”-ын солилцоо болов.

“Никс” баг Деннис Смит ЖР, ДеАндре Жордан, Уэйсли Матьюс нарыг эгнээндээ элсүүлж, Трей Бөрк, Кортни Лий болон Тим Хардуай ЖР, Кристапс Порзингис нарыг “Даллас Маверикс” руу явуулсан юм.

Үүнээс гадна “Даллас” драфтын эхний бүсийн хоёр эрхийг солилцоонд өгчээ.

Кристапс Порзингис: Ашигтай

Хэзээ нэгэн цагт Кристапс Порзингис “Никс”-ийг орхиж, шинэ багт очих нь тодорхой байлаа. КП 2017 онд “Никс”-ийн сагсан бөмбөг хариуцсан ерөнхийлөгч Фил Жексонтой уулзахаас татгалзсан юм. Хүнд бэртэл авсныхаа дараа гэрээгээ сунгахгүй гэдгээ мэдэгдэж байв. Харин одоо тэр хүссэн багтаа очсон. “Даллас Маверикс”-т түүн шиг тоглогчийг яаж ашиглах арвин туршлага бий. Учир нь энэ багт сүүлийн 20 жил Дирк Новицки тоглож байгаа юм.

Деннис Смит ЖР: Ашигтай

“Даллас Маверикс” энэ жилээс Лука Дончич хэмээх шинэ “зэвсэгтэй” болсон. Энэ “зэвсэг” өөр нэгэнд ашиггүй байлаа. К.Порзингисийг багтаа авчрах болсон гол шалтгаан Деннис Смитийг явуулах байсанд гайхах зүйлгүй. Л.Дончич, Д.Смитийн тоглолт хоорондоо зохицдоггүй, хэн нэгнийг нь сэлгээнд суулгах тааруухан шийдвэр байсан юм. Харин “Никс”-т тэр илүү үр дүнтэй тоглолт үзүүлж мэднэ. Тиймээс Лука Дончич тэр хоёрт хоёуланд нь ашигтай солилцоо юм.

Харин Фрэнк Нтиликинад энэ солилцоо ашиггүй.

Бусад

“Никс” шинээр авсан хоёр ахмад тоглогч болох Уэйсли Матьюс, ДеАндре Жорданг ашиглахгүй байх магадлалтай. Тэд тус хоёр тоглогчийн гэрээг цуцлах магадлал өндөр. Дүрэм ёсоор гуравдугаар сарын 1-нд уг хоёр тоглогчийн цуцлах боломжтой.

“Никс” энэ солилцоогоор 73 сая ам.долларын цалингийн цэс гаргах боломжтой болсон. Энэ нь Кевин Дюрантад жилд 38.2 саяыг шууд өгөх боломжтой гэсэн үг. К.Дюрантад макс гэрээг өгөхөд эхний жилдээ 38.2 саяыг авна. Үүний цаана дахиад 35 сая “ногоон”-ы цалингийн зай үлдэнэ. К.Өрвинг гэх мэт ирэх жил сулрах оддоос аль нэгийг нь авчрах бүрэн боломжтой.