Кевин Дюрант өнгөрсөн даваа гаригт сэтгүүлчидтэй уулзах үеэр ирээдүйнхээ талаар ярилцжээ. Ирэх есдүгээр сард 30 нас хүрэх К.Дюрантын “Голден Стэйт Уорриорс”-той одоо хүчин төгөлдөр байгаа гэрээ нь дуусгавар болж, ирэх долдугаар сард чөлөөт тоглогч болох юм. Хэрвээ “Дайчид”-тай урт хугацааны гэрээ байгуулвал энэ нь түүний хувьд хийх хамгийн сүүлийн гэрээ байх магадлалтай аж.

Учир нь Дюрант ахиад таван жил буюу 35 нас хүртлээ лигт зүтгэх бөгөөд үүний дараа гавьяаныхаа амралтад гарах талаар бодно гэж ярьжээ.

КД одоогоор 20,913 оноог улиралд авсан амжилтаараа 36-д жагсдаг. Түүний хувьд Карим Абдул Жаббарын 38,387 оноог эвдэхийн тулд дор хаяж 10 улирал хэрэгтэй.  Гэхдээ Дюрант үүнд санаа зовохгүй байгаагаа илэрхийлж, цаашид бүх хүч чадлаа дайчилж тоглох болно. Гэхдээ рекорд эвдэхийн тулд лав биш гэсэн юм.

Мөн “Голден Стэйт”-д байгаадаа сэтгэл хангалуун байгаагаа мэдэгдсэн.

 

“Кливлэнд”-“Индиана”-гийн цувралын тав дахь тоглолт. Цувралын харьцаа 2:2. Тооны харьцаа 95:95. Таддиус Янгийн цохисон бөмбөг талбайгаас гарахад шүүгч Лэброн Жэймсийг бөмбөгөө алдсан гэж шүгэл үлээлээ. Нэгэнт шүүгчийн шийдвэр ингэж гарсан тул 27.1 секундэд “Индиана” довтлох нь тодорхой болов. Нэйт Макмиллан завсарлага захиалж, улмаар энэ улирлын турш багаа үүрч явсан Виктор Оладипод бөмбөгөө өгөхийг даалгажээ. В.Оладипо “Хаан” Жэймсийн эсрэг нэг хуурч, зоригтой оролт хийсэн ч энэ удаа Л.Жэймс хаалт хийлээ. Жи Ар.Смит самбараас бөмбөг авч, завсарлага захиалахад 3 секунд дутуу үлдэв.

Оноогоор илүү гарах чухал шидэлтийг Л.Жэймс гүйцэтгэх нь тодорхой. Н.Макмиллан ч үүнийг маш сайн мэдэж байлаа. Түүний гол зорилго бөмбөгийг Лэбронд өгөхгүй байх явдал байсан ч хамгаалалтаа олигтой хийж чадсангүй. “Хаан” Жэймс цувралын турш өөрийг нь дагаж буй Таддиус Янгийн эсрэг гурваас оруулж, багтаа ялалт авчирлаа.



Лэброн Жэймсийн хувьд 15 жилийн замналдаа цаг дуусах үетэй зэрэг хийсэн хожлын шидэлтийн тоо дөрөвт хүрсэн юм. Анх 2009 онд Дорнод бүсийн финалд “Орландо”-гийн эсрэг хожлын шидэлт гүйцэтгэсэн бол үүнээс яг дөрвөн жилийн дараа 2013 онд Дорнод бүсийн шигшээд учраа таарсан “Индиана”-гийн эсрэг хожлын оноог авч байлаа. Хоёр жилийн дараа мөн л Дорнодын шигшээд таарсан “Чикаго Буллз”-ын эсрэг цувралын дөрөв дэх тоглолтод хожил авсан юм.

Донован Митчелл хэмээх шинэ тоглогч “Оклахома Сити Тандер”-ын их гурвалд хичээл зааж байна. Цувралын тав дахь тоглолтод “Юта Жазз” өрсөлдөгчөө талбайд нь 25 онооны давамгай хожиж байв. Энэ үед “Тандер”-ын их гурвалын улирал дуусахад тун ойрхон байлаа. Учир нь тэд өмнөх дөрвөн тоглолтын гуравт нь хожигдсон. Гэвч Рассел Уэйстбрук улирлаа амархан дуусгахыг хүссэнгүй. Түүний гайхалтай тоглолт, Пол Жоржын найдвартай шидэлтийн ачаар “Оклахома” онооны зөрүүг богино хугацаанд арилгаж, эргэн ирсэн юм. Сүүлийн 20 жилд хасагдах шатанд 25 ба түүнээс дээш онооноос эргэн ирсэн тохиолдол таван удаа бүртгэгдсэн. “Лос Анжелес Клипперс” баг 2012 онд “Мэмфис Гриззлис”-т 27 онооны зөрүүтэй хожигдож яваад ялсан тохиолдол бий. Мөн өнгөрсөн онд “Кливлэнд” “Индиана”-гийн цувралд 26 онооны зөрүүг арилгаж, ялалт байгуулсан нь 2002 онд “Бостон Селтикс”, “Нью Жэрси Нетс”-ийн түүхийг давтсан.

“Оклахома” гуравдугаар үеийг 32:7-гоор зөрүү гаргахад Р.Уэйстбрук 7 шидэлтийнхээ 6-г оруулж, үүнээс гурвын шидэлт 5 шидэж, 4-ийг нь амжилттай гүйцэтгэж, нийт 20 оноо авчээ. Үлдсэн 12 оноог Пол Жорж авсан аж.



 

Цагтаа “Лос Анжелес Лэйкерс”-т Коби Брайантын хамтрагч явсан, хожмоо “Нью Йорк Никс”-ийн дасгалжуулагчийн албанд зүтгэж байсан Дерек Фишер 2015 оноос хойш үерхэж буй найз бүсгүй Глорья Говантай сүй тавьжээ. Энэ бүсгүйг өмнө нь NBA-ийн тоглогч асан Мэтт Барнсын гэргий гэдгээр нь сагсан бөмбөг сонирхогчид андахгүй биз.

TMZ сайтын мэдээлснээр одоо телевизийн салбарт хүч сорьж буй Д.Фишер энэ сарын 7-нд Лос Анжелес дахь гэртээ найз нөхдөө цуглуулж, багахан үдэшлэг хийх үеэр Г.Гованд гэрлэх санал тавьсан гэнэ.

Г.Гован өмнө нь Мэтт Барнстай 2013-16 оны хооронд амьдарч байв. Тэд салах хүсэлтэй байгаагаа илэрхийлж, гэр бүл цуцлах эсэх нь шүүхийн шатанд байх үеэр Д.Фишертэй нэр холбогдсон. Үүнд бухимдсан М.Барнс хуучин эхнэрээ харамлаж, багагүй асуудал үүсгэж байв.

М.Барнс, Г.Гован нар Картер Келли Барнс, Айзья Майкл Барнс гэх хоёр хүүтэй. Сонирхуулахад, Глорья Гованы төрсөн эгч Лаура Гован нь сагсан бөмбөгч асан Гилберт Аренасын гэргий билээ. Эгч дүүс хамтдаа сагсан бөмбөгчдийн эхнэр хэмээх телевизийн реалити шоунд оролцож байв.

“Сан Антонио Спэрс” баг эхний шатанд “Голден Стэйт Уорриорс”-т хожигдсоны дараагаар тус багийн ахмад тоглогчид болох Тони Паркер, Ману Жинобили нарыг цаашид тоглох эсэх нь олны анхаарлыг татаж байв.

Тэгвэл 40 нас хүртлээ тоглох хүсэлтэй хэмээн нэг бус удаа ярьж байсан франц холбогч Тони Паркер ирэх улиралд сэлгээнээс гарахад татгалзах зүйлгүй гэж ярьжээ. Тэрбээр ирэх улиралд тоглох хүсэлтэй байгаагаа илэрхийлж, Дежонт Маррейгийн сэлгээ болоход гайхах зүйлгүй гэсэн юм.

Харин Ману Жинобили одоогоор зодог тайлах талаар ярих хүсэлгүй байгаа гэнэ. Энэ жил 40 настай М.Жинобили хасагдах шатны сүүлийн тоглолтын өмнө цаашид яах эсэхээ бодоогүй гэдгээ сэтгүүлчдэд ярьж суусан бол “Дайчид”-д хожигдсоны дараа энэ талаар ярихаас татгалзжээ.

“Филадельфи 76” баг цувралын тав дахь тоглолтоо гэртээ хүлээн авч, “Майами Хит”-ийг 104:91-ээр буулган авснаар 2012 оноос хойш анх удаа хасагдах шатны хоёрдугаар тойрогт үлдлээ. Одоогоос зургаан жилийн өмнө Андре Игоудала тэргүүтэй “76-чууд” лидер нь бэртсэн “Чикаго Буллз”-ыг хожиж, дараагийн шатанд шалгарч байв. Гэхдээ тэр үед Филадельфи хотынхон багаа түрүүлнэ гэдэгт итгэлгүй байсан бол одоо цаг өөр болов. Шилдэг шинэ тоглогч Бэн Симмонс, лигийн “мангас” төвүүдийн нэг Жоэль Эмбийд нар толгойлж, Брэтт Брауны удирдсан “76” бол улирлын төгсгөлд 16 дараалан хожсон баг. Одоогоос 35 жилийн өмнө 1983 онд Мозес Малоуны үед аваргын цом хүртсэн, түүнээс хойш 2001 онд Аллен Айверсоны баг шигшээ цувралд хүрсэнг эс тооцвол тус баг олон жил амжилтад хүрээгүй. Тэгвэл энэ улиралд “76-чууд” их итгэл найдвар хүлээлгэж буй.

Шилдэг шинэ тоглогчид өрсөлдөж буй, NBA-ийн ханхүү гэгдэх Бэн Симмонс тус цувралын таван тоглолтод 18.2 оноо, 10.6 самбар, 9.0 оновчтой дамжуулалт дунджилсан юм. Хэрвээ Б.Симмонс тав дахь тоглолтод 11 оновчтой дамжуулалт өгсөн бол “Шидэт” Жонсоноос хойш цувралын турш трипл дабл дунджилсан хоёр дахь шинэ тоглогч болох байлаа. Гэхдээ эрт алдааны асуудалд орсноор гуравдугаар үед сэлгээний суудал руу шилжсэн.

Хэдийгээр гол найруулагч нь сэлгээнд суусан ч “Филадельфи” өрсөлдөгчөөсөө хамаагүй илүү баг нь гэдгээ харуулж чадсан юм. Гуравдугаар үед 14 онооны зөрүүтэй дуусгасан үзүүлэлтээ шийдвэрлэх мөчид ч хадгалж, эцэст нь ялалт байгуулав.

Энэ жил 36 настай Дуэйн Уэйд тоглолтын дараах хэвлэлийн бага хуралд Бэн Симмонс болон Жоэль Эмбийд нарт сайхан ирээдүй бийг хүлээн зөвшөөрчээ. Түүнчлэн сэтгүүлчид түүнээс сагсан бөмбөгийн замналаа үргэлжлүүлэх эсэх талаар лавлахад Д.Уэйд тоймтой хариу өгсөнгүй. “Майами”-тай хийсэн гэрээ нь зун дуусгавар болох учир түүнд олон багаас сонголт хийх боломж бий. Гэхдээ үүнээс өмнө “Чикаго”, “Кливлэнд”-ийг сонгоод бүтэлгүйтсэн учир Д.Уэйд хуучин багтайгаа дахин нэг жилийн гэрээ байгуулах, эсвэл их спортын замналдаа цэг тавих гэсэн хоёр сонголтоос л шийдвэрээ гаргах болов уу.

NBA-ийн тоглогч, Ламар Одом сагсан бөмбөгтөө эргэн ирэхээр төлөвлөж, хүчний бэлтгэл хийж эхэлжээ. TMZ сайтад мэдээлснээр Одом Ice Cube-ийн зохион байгуулж буй 3х3 BIG3 лигт бус харин АНУ-аас бусад мэргэжлийн багуудад тоглохоор санал сонсож эхэлсэн гэнэ.

Энэ жил 38 настай, Нью Йоркоос гаралтай Одом хамгийн сүүлд “Лос Анжелес Клипперс” багт 2012-13 оны улиралд данстай байв. Улмаар Испанийн “Саски Баскониа” багтай гэрээ байгуулсан ч богино хугацаанд л бүртгэлтэй байж, “Нью Йорк Никс”-тэй гэрээ байгуулсан ч ганц ч тоглолтод оролцоогүй.

Хамгийн сүүлд Невадагийн нэгэн клубт хар тамхи хэтрүүлэн хэрэглэж, амиа алдах дөхсөн билээ. Тэрбээр дөрөв хоног ухаангүй хэвтсэн ч эцэст нь сэргэж чадсан юм.

 

“Сан Антонио Спэрс”-ийн нэрт дасгалжуулагч Грегг Поповичийн эхнэр, олон жил өвчтэй байсан Эрин Попович өнөөдөр нас баржээ. Энэ талаар багийн арын алба анх мэдээлсэн бөгөөд “Спэрс”-ийн ерөнхий менежер Р.С Буфорд сэтгүүлчдэд анх дуулгасан юм.

Грегг болон Эрин нар хамтдаа 40 жил амьдарсан. Тэд хоёр хүүхэдтэй, бас хоёр ач, зээтэй.

Эрин олон жил хүнд өвчнөөр зовсон. Гэхдээ ямар өвчин туссан гэдгийг нь нууцалдаг. Ямартай ч эмч нарын хэлсэн хугацаанаас хамаагүй удаан амьдарсан гэж ESPN-ий сэтгүүлч Адриан Вожнаровски мэдээндээ онцолжээ.

Грегг Попович талийгаачтай 1970-аад оны дундуур “Эйр Форс” их сургуульд туслах дасгалжуулагчаар ажиллаж байхдаа танилцсан аж. Энэ эгэл бүсгүй дасгалжуулагчийн ажлыг ойлгодог, хүнд хэцүүг нь мэдэрсэн нэгэн. Учир нь түүний эцэг тус сургуулийн тамирчдын хүчний бэлтгэл хариуцсан дасгалжуулагчаар ажиллаж байсан юм.

Хувийн амьдралаа бусдад дэлгэх дургүй Г.Попович маргааш болох “Сан Антонио”-“Голден Стэйт”-ийн цувралын гурав дахь тоглолтод оролцох эсэх нь одоогоор тодорхойгүй байна.

 

Өнөөдөр  NBA-д мөн дөрвөн тоглолт боллоо. Дорнод бүсийн “Бостон-Милоуки”, “Кливлэнд-Индиана”, Өрнөдийн тэргүүн баг “Хьюстон-Миннесота”, “Оклахома-Юта” багуудын эхний тоглолт явагдсан юм.

Бостон 113:107 Милоуки



Жинхэнэ драм энэ тоглолтод өрнөв. К.Өрвинг гэмтэлтэй байгаа ч “Бостон” амар бууж өгөхгүй. Тэд шийдвэрлэх дөрөвдүгээр үед 10 онооны зөрүүгээр хожиж явсан ч “Бакс” оноогоо нөхөж, Малколм Брогдоны гурвын шидэлтийн ачаар тооны харьцааг тэнцүүлсэн. “Бостон”-д бөмбөг шилжиж, үлдсэн 10.3 секундэд амжиж оноо авах шаардлагатай болов. Брэд Стивенс ийм чухал үед хэнд бөмбөг өгөх нь сонин байсан ч залуу холбогч Терри Розиарт итгээд үзэв. Тэр Эрик Бледсог нэг хуураад гурваас шидсэн нь амжилттай болж, эсрэг багт довтлох 0.5 дойл үлдсэн юм. “Бостон” талбай дээрээ цувралын эхний ялалтаа авах нь тодорхой гэгдэж байсан ч Крис Мидлтон үлдсэн хугацаанд амжиж гурваас тэнцүүлснээр нэмэлт цаг гарах нь тодорхой боллоо. Итгэмээргүй шидэлт, гайхалтай төгсгөл байв.

Нэмэлт цагт Эрик Бледсо, Яннис Адетокунбо нар алдааны асуудлаар жагсаалаас гарч, М.Брогдоны тоог тэнцүүлэх оролдлогыг Ж.Татум хаалт хийж багтаа давуу байдал авчирсан билээ.

Бостоны Ал Хорфорд хасагдах шатны 91 дэх тоглолтдоо оролцжээ.

Индиана 98:80 Кливлэнд



Леброн Жэймс хасагдах шатны эхний цувралд хожигдоогүй тоо нь 21 хүрээд зогслоо. Тэр хамгийн сүүлд 2012 онд “Нью Йорк Никс”-тэй хийсэн цувралын дөрөв дэх тоглолтод хожигдсоноос хойш энэ шатанд ялагдаж үзээгүй. Түүний баг 2013 онд “Милоуки”-г, 2014 онд “Чарлотт”-ыг, 2015 онд “Бостон”-г, 2016 онд “Детройт”-ыг, өнгөрсөн жил “Индиана”-г тус тус “шүүрдсэн”. Гэхдээ Леброн хасагдах шатны эхний тойрогт ялагдаж байгаагүй гэсэн бардам үзүүлэлт нь хэвээрээ.

Оклахома 116:108 Юта



Пол Жорж 36 оноо авснаар “Оклахома” эхний тоглолтод хожлоо. “Play-off P” хочтой болоод буй Жорж найман удаа холын зайн шидэлтээ оновчтой болгож, багийнхаа дээд амжилтыг тогтоов.

Шилдэг шинэ тоглогчийн шагналд хүчтэй өрсөлдөж байгаа Донован Митчелл эхний тоглолтод 27 оноо, 10 самбар авчээ. Д.Митчелл тус тоглолтын хоёрдугаар хагаст гэмтэл авч, талбайг орхисон ч удалгүй эргэн ирсэн юм. Түүний гэмтэл төдий л ноцтой биш аж.

Хьюстон 104:101 Миннесота



Жэймс Харден 44 оноо авч, хасагдах шатанд оргил тоглолтоо үзүүлэв. Клинт Капела эхний хагаст 20 оноо, 10 самбараас бөмбөг авсан ч хоёрдугаар хагаст бага минутад талбайд гарч, 4 оноо, 2 самбараас бөмбөг авчээ.

“Хьюстон” улиралд “Миннесота”-гийн эсрэг дөрөв тоглохдоо бүгдэд нь хожиж, нэг тоглолтод дунджаар 15.7 онооны зөрүүгээр ялсан үзүүлэлттэй. Энэ тоглолтод Капелагийн 10 онооны ачаар 17:6-гаар хошуучилж, оноогоор холдож эхэлсэн ч дөрөвдүгээр үед “Чононууд” тооны зөрүүг ойртуулсан юм.

NBA-ийн хасагдах шатны эхний тулаан өнөөдөр боллоо. Өнгөрсөн жилийн аварга “Голден Стэйт Уорриорс”-“Сан Антонио Спэрс”, Дорнод бүсийн тэргүүлэгч “Торонто Рэпторс”, “Вашингтон Визардс”, Дорнодын гурваар шалгарсан “Филадельфи 76” баг “Майами Хит”, Өрнөдийн гурваар тодорсон “Портлэнд Трэйлблазерс”, “Нью Орленс Пеликанс”-тай эхний тоглолтоо хийв.

Голден Стэйт Уорриорс 113:92 Сан Антонио Спэрс



Аваргуудын гол тоглогч Стефен Карри гэмтлийн улмаас “Спэрс”-тэй хийх цувралд оролцохгүй. Тэрбээр хоёрдугаар шатнаас талбайд гарахаар төлөвлөж буй. Хэдийгээр лидер тоглогчгүй нэг шат уруудсан ч гэлээ “Спэрс” энэ боломжийг ашиглахад хэцүү бололтой. Учир нь залуу лидер Кави Леонард нь хэзээ эргэн ирэх нь тодорхойгүй хэвээр. Улиралд С.Карригийн оронд залуу холбогч Куинн Күүк гараанд гарч байсан ч хасагдах шатанд Стив Керр ахмад довтлогч Андре Игоудалаг холбогч дээр гаргажээ. Куинн Күүкийн гараанд гарсан 16 тоглолтод “Дайчид” хамгаалалтын үзүүлэлтээр лигт 17-д бичигдэж байв.

С.Керр Иггиг гараанд гаргасан шигээ үүнээс ч дутахгүй эрсдэлтэй нэг шийдвэр гаргасан. Тодруулбал, ЖаВайл МкГеег төвийн тоглогчоор тоглуулсан юм. МкГее 16 минутад 15 оноо авч, эсрэг багийн лидер ЛаМаркус Олдрижийг тун сайн хамгаалав.

Грег Попович олон жил хасагдах шатанд өрсөлдөхдөө нээлтийн тоглолтод 21 оноогоор хожигдсон тохиолдол урьд хожид байгаагүй. Өмнө нь 2015 онд “Лос Анжелес Клипперс”-т 15 оноогоор дийлдэж байв. “Спэрс”-ийн гарааны тавт нийлээд 33 оноо авсан нь энэ улиралд хамгийн бага авсан оноо болж, багаараа 30 самбараас бөмбөг авсан нь 2014 оны шигшээ цувралын гурав дахь тоглолтоос хойш хамгийн бага самбар авсан үзүүлэлт болжээ.

Торонто Рэпторс 114:106 Вашингтон Визардс



Д.Дерозан холоос шиддэг болсон, К.Лоуригийн бөмбөггүй тоглолт сайжирсан, “Рэпторс”-ын сэлгээний тоглогчид мундаг… Энэ бол улиралд үзүүлсэн “Торонто Рэпторс”-ын амжилтыг нь дүгнэсэн шинжээчдийн бараг амны уншлага болсон үгс. Сүүлийн жилүүдэд “Торонто” шиг тогтвортой амжилт үзүүлсэн баг Дорнод бүсэд алга. 2013-14 оноос эхэлсэн тэдний түүх энэ жил оргилдоо хүрч, 59 ялалт байгуулснаар бүсээ тэргүүлсэн. Хоёр жил эхний шатанд долоон тоглолт хийсний эцэст мултарсан гашуун түүхтэй Канадын баг эцэст нь бүсийнхээ финалд хүрч, өнгөрсөн жил хагас шигшээд “Хаан” Жэймсийг бараагүй. Дуэйн Кэйси энэ багийг 7 улирал удирдаж, энэ жил хүссэндээ хүрэхээр тэмүүлж буй. Гэхдээ хасагдах шатанд Д.Дерозан, К.Лоури нарын тоглолт уначихдаг байдал энэ жил хаашаа эргэх бол?

Эхний тоглолтод “Торонто” зорилгодоо хүрсэн. Уламжлал ёсоор тэд нээлтийн тоглолтод хожигдож, оноо дутуу эхлүүлсэн ч дөрөвдүгээр үед сэлгээний тоглогчид нь тэсэрсэнээр багаа аварсан билээ. Тэд хасагдах шатны 10 цувралд буюу 17 жилийн турш нээлтийн тоглолтод хожоогүй хар цувралдаа цэг тавьж, өрсөлдөгчөө дарж унав.

Филадельфи 76 130:103 Майами Хит



Лигийн комиссар Адам Сильвер нээлтийн тоглолтоос онцлон “Филадельфи 76”-“Майами Хит”-ийн цувралыг үзэж сонирхжээ.

Эхний хагаст Бэн Симмонс 5 удаа бөмбөгөө алдаж, цөөнгүй довтолгоогоо алдсан, үүний ачаар “Дөлнүүд” 60 оноо авч, 4 оноогоор тэргүүлсэн юм. Гэвч хоёрдугаар хагаст Ж.Эмбийдгүй багтаа ямар нүүдэл хийхийг хашир дасгалжуулагч Брэтт Браун тун сайн олж харсан. Тэр тоглолтыг гэмтэлтэй Ж.Эмбийдийн оронд Амир Жонсонг гараанд гаргасан ч хоёрдугаар хагаст Дарио Шарич, Ерсан Ильясова нарыг хамтад нь гаргав. Ийм хослол үүссэнээр эсрэг багийн удаан хамгаалалтыг задалж, бөмбөгний шилжилт хурдтай болсноор Хассан Уайтсайд хийх ч зүйл үлдсэнгүй. Х.Уайтсайд будагтай талбайгаа хамгаалах шаардлагагүй болсноор Эрик Споэльстра түүнийг нөөцөнд суулгасан юм. Харин цаадахь нь сэлгээнд суухдаа дасгалжуулагчийнхаа өөдөөс хатуухан үг чулуудсанаар дахин талбайд гарах эрхгүй болсон гэхэд болно.

Эхний хагаст 38.8 хувьтай довтолж, эсрэг багтаа 60 оноо өгсөн “76”-чууд гуравдугаар үеэс эрс өөр тоглолт харуулсан. Хоёрдугаар хагаст тэдний шидэлт бүр цагаригт орж, холын зайнаас нийт 28 шидсэнээс 18-ыг нь амжилттай оруулж, хасагдах шатанд багийн дээд амжилтаа шинэчлэв.

Бэн Симмонс энэ тоглолтод 17 оноо, 9 самбар, 14 оновчтой дамжуулалт өгсөн юм. Шинэ тоглогч хасагдах шатанд трипл дабл хийсэн түүх 1980 онд “Шидэт” Жонсоноос өөр тодроогүй. Б.Симмонсын хувьд энэ үзүүлэлтэд хамгийн дөхсөн тоглогч болов. “Шидэт” Жонсон 1980 онд 5 удаа трипл дабл хийсэн бол Карим Абдул Жаббар 1970 онд, Жерри Лукас 1964 онд тус бүр нэг удаа ийм амжилт үзүүлсэн удаатай. Түүнчлэн эхний тоглолтдоо 14 дамжуулалт өгсөн нь Жонсоны дараа орох үзүүлэлт. “Шидэт эр” 16 дамжуулалт өгсөн амжилтаар тэргүүлдэг бол Оскар Робертсон 13 дамжуулалтаар удаалж байв. Түүнчлэн плей-оффын цувралд 14 ба түүнээс дээш дамжуулалт өгсөн түүхэн дэх зургаа дахь шинэ тоглогч боллоо.

Портлэнд Трэйлблазерс 95:97 Нью Орленс Пеликанс

 

Энтони Дэвис удтал хүлээсний эцэст хасагдах шатанд анхны ялалтаа байгуулав. “Пеликанс” 2011 оноос хойш хасагдах шатанд зургаа дараалан хожигдсон цувралдаа цэг тавилаа. Портлэндийн лидер тоглогчид болох Дамиан Лиллард, Си Жэй МкКоллум нар эхний хагаст нийлээд ердөө гурван оноо авсан. Харин дөрөвдүгээр үед тоглолт нь сэргэж, улмаар 20 гаруй оноогоор хожигдож явсан ч гурван оноо болтлоо ойртуулсан. Эгзэгтэй үед гурваас шидэх бус оноог ойртуулах боломж хайсан ч Жру Холидэй хаалт хийснээр тэд онооны зөрүүгээ хадгалж, улмаар холдуулснаар тус тоглолтод ялалт байгууллаа.

NBA-ийн 2017-18 оны улирал дуусав. Энэ удаагийн улирлын шилдгүүдэд олгодог уламжлалт шагналыг олгох ёслолын ажиллагаа зургадугаар сарын 25-нд болно. Уламжлал ёсоор улирлын шилдэг тоглогч, оны шилдэг шинэ тоглогч, шилдэг хамгаалагч, онцлох нөөц тоглогч, хамгийн их сайжирсан тоглогч болон дасгалжуулагчийн шагналыг гардуулна. Мөн арын албаны шилдэг удирдагч, шилдэг багийн тоглогч зэрэг бусад шагналын эзнийг ч тодруулах болно.

Ингээд манай сайтын зүгээс оны шилдгүүдийн талаарх таамаг дэвшүүлэв.

Улирлын үнэ цэнэтэй тоглогч: Жэймс Харден

“Хьюстон Рокетс” энэ улиралд 65 ялалт байгуулж, энэ улирлын Пуужингууд ийм амжилт үзүүлсэн 21 дэх баг болсон юм. Баг нь бүсээ тэргүүлээд зогсохгүй энэ улиралд 60 ба түүнээс дээш хожил авсан цор ганц баг болов. Пуужингууд түүхэндээ анх удаа улиралд 60 хожил авч, анх удаа бүсээ тэргүүлэв. Ж.Харден энэ улиралд 30.4 оноо дунджилж, анх удаа онооны аваргаар тодорчээ. Үүгээр ч зогсохгүй нэг улиралд 8.8 оновчтой дамжуулалт гүйцэтгэсэн нь Рассел Уэйстбрук, Леброн Жэймс нарын дараа орох үзүүлэлт. Мөн лигийн түүхэнд анх удаа 60 оноотой трипл дабл гүйцэтгэж, багийнхаа түүхэнд нэг тоглолтод 60 оноо авсан анхны тоглогч болсон билээ.

Тэр сүүлийн хоёр улиралд дараалан үнэ цэнэтэй тоглогчийн санал асуулгад хоёрдугаар байр эзэлсэн.

Өрсөлдөгч: Леброн Жэймс

Шилдэг хамгаалан тоглогч: Руди Гоберт

Р.Гоберт энэ улирлын 26 тоглолтыг гэмтлийн улмаас өнжсөн. Гэхдээ түүний бэртэл багт Гобертын орон зай хэр чухал болохыг харуулсан үйл явдал болов. Зүүн өвдөгний гэмтлийн улмаас хэсэг тоглоогүй үед “Юта Жазз” хасагдах шатанд оролцох эсэх нь эргэлзээтэй байлаа. Харин нэгдүгээр сарын 19-нд эргэн ирснээр багийнх нь хамгаалалт эрс сайжирч, тус үзүүлэлтээр хоёрдугаарт бичигдэх болсон юм. Түүний хана мэт хамгаалалтын ачаар багийнх нь амжилт ч сайжирч, хасагдах шатанд өрсөлдөх боломжтой болсон билээ. Р.Гобертийг бэртлээс эргэн ирсэнээс хойш “Юта Жазз” 100 довтолгоо тутамд 97.5 оноо алдаж, 30 хожиж, 8 ялагдсан.

Өрсөлдөгч: Жоэль Эмбийд

Шилдэг шинэ тоглогч: Бэн Симмонс

Шинэ тоглогч анхны улиралдаа 20 оноо дунджилсан тохиолдол энэ жилийн “Юта Жазз”-ын хамгаалагч Донован Митчеллийг оролцуулаад 47 удаа бүртгэгджээ. Д.Митчелл 20.5 оноо дунджилсан үзүүлэлтээр энэ жагсаалтын 39-д бичигдсэн. Түүний ард Кевин Дюрант, Жоэль Эмбийд, Тайрек Еванс нарын өдгөө тоглож буй тамирчид багтсан бол урд нь Леброн Жэймс, Кармело Энтони, Блэйк Гриффин нар бичигдэж буй. Харин Бэн Симмонс шиг 15 оноо, 8 самбар, 8 оновчтой дамжуулалт гүйцэтгэсэн хүн Оскар Робертсоноос өөр үгүй. Б.Симмонс нэг тоглолтод 54.1 хувьтай шиддэг бол Д.Митчелл 43.7 хувь, “Филадельфи 76” баг өнгөрсөн улиралд 28 хожсон бол энэ жил 52 ялалт байгуулсан, Б.Симмонс талбай дээрх хамгаалалтын үзүүлэлтээр лигт 47-д жагсдаг бол Митчеллийн энэ үзүүлэлт 229-д бичигддэг гээд шилдэг шинэ тоглогчид өрсөлдөгч хоёрыг харьцуулбал багагүй ялгаа гарна.

Өрсөлдөгч: Донован Митчелл

Амжилт нь ахисан тоглогч: Виктор Оладипо

Энэ улиралд хамгийн хол тэсрэлт хийсэн тоглогч яах аргагүй Виктор Оладипо. “Индиана” гол лидер Пол Жоржийг В.Оладипо болон Домантас Сабонисоор солилцоо хийсэн нь аргагүй л нүдээ олсон нүүдэл байв. Гэхдээ энэ солилцоог хийх үеэр ингэж итгэлтэй хэлэх хүн тун ховор байлаа. Лидер тоглогчоо шинэ төвийн тоглогч, үнэ нь хэт хөөрөгдсөн багийн тоглогчоор солилцоо хийсэн учир хүн бүр “Индиана”-г уналтад орох баг гэж үнэлсэн хэрэг.

84 сая ам.долларын цалин авах хэрнээ Оладипо “Оклахома Сити Тандер”-т ердөө 15.9 оноо, 4.3 самбар, 2.6 оновчтой дамжуулалт гүйцэтгэсэн нэгэн байлаа. Харин бүтэн жилийн дараа 23.1 оноо, 5.2 самбар, 4.3 оновчтой дамжуулалт гүйцэтгэж, 2.4 бөмбөг “булаасан” үзүүлэлтээр лигийг тэргүүлсэн юм.

Өрсөлдөгч: Андре Драммонд

Шилдэг зургаа дахь тоглогч: Луис Уильямс

Шилдэг зургаа дахь тоглогчийн шагнал гардсан 35 тохиолдлын 34 нь Луи Уильямсаас бага оноо авсан юм. 1989-90 онд Рики Пирс сэлгээнээс 23 оноо авсан улиралдаа шилдэг зургаа дахь тоглогчийн шагнал хүртэж байв. “Лос Анжелес Клипперс”-ийн зургаа дахь тоглогч Луи Уильямс 79 тоглолтын 19-д нь гараанд гарч, 22.6 оноо дунджилсан. Түүний хувьд энэ шагналыг авбал хоёр дахиа авсан цөөхөн тоглогчийн нэг болно.

Өрсөлдөгч: Эрик Гордон

Шилдэг дасгалжуулагч: Дуэйн Кэйси

Өнгөрсөн зун гол тоглогч Гордон Хэйвардыг алдсан ч Куин Снайдер “Юта Жазз”-ыг хасагдах шатанд шалгаруулж, лидер довтлогч Кави Леонард нь улирлын ердөө 9 тоглолтод оролцсон ч “Сан Антонио Спэрс”-ийн өвгөн мастер Грегг Попович 21 жил тасралтгүй аваргын цомын төлөө дайрч, Терри Стоттс “Портлэнд”-ийг Зэрлэг өрнөдийн эхний гурваар тодруулж, Брэд Стивенс лидер тоглогчид нь эзгүй ч багаа уналтад оруулалгүй авч явсан гээд энэ жил шилдэг дасгалжуулагчийн өрсөлдөөнд нэгдэх хүн маш олон бий. Үүн дээр “Филадельфи”-г хасагдах шатанд шалгаруулсан Брэтт Браун, “Хьюстон”-ыг түүхэн амжилт руу хөтөлсөн Майк Д’Энтони гээд цуварч өгнө.

Гэхдээ багаа бүтэн улирлын турш тэгш тоглуулсан хүн бол Дуэйн Кэйси. Түүний багт өөлөх зүйл тун ховор. “Рэпторс”-ын нийт довтолгооны 70 орчим хувь нь гурав болон холын зайн шидэлтээр явагдаж, лигт хамгийн олон гарааны тавт ашигласан багийн жагсаалтад хоёрдугаарт бичигдэж буй.

Өрсөлдөгч: Майк Д’Энтони

NBA-ийн 2017-18 оны улирал албан ёсоор дуусч, шилдэг 16 баг тодорсон. Тэгвэл хасагдах шатны гадна үлдсэн 14 багийн дунд ирэх тавдугаар сард драфт буюу шинэ тоглогчдын сонгон шалгаруулалтад хэдээр сонгохоо шийдэх үлдсэн юм. Сонгон шалгаруулалтад үлдсэн 14 багийг хэдээр сонгохыг ирэх тавдугаар сарын 15-нд Чикаго хотод тодруулах бол драфт ирэх зургадугаар сарын 21-нд Нью Йоркийн Бруклинд болно.

Драфтын сугалаагаар сонгох боломж:

1. Финикс Санс (21-61): 1-ээр сонгох магадлал 25.0%, эхний гурваар сонгох магадлал 64.2%
2. Мэмфис Гриззлис (22-60): 19.9%, 55.8%
3. Даллас Маверикс (24-58): 13.8%, 42.6%
4. Атланта Хоукс (24-58): 13.7%, 42.3%
5. Орландо Мэйжик (25-57): 8.8%, 29.1%
6. Чикаго Буллз (27-55): 5.3%, 18.3%
7. Сакраменто Кингс (27-55): 5.3%, 18.3%
8. Бруклин Нетс (28-54): 2.8%, 9.9%
9. Нью Йорк Никс (29-53): 1.7%, 6.1%
10. Лос Анжелес Лэйкерс (35-47): 1.1%, 4.0%
11. Чарлотт Хорнетс (36-46): 0.8%, 2.9%
12. Детройт Пистонс (39-43): 0.7%, 2.5%
13. Лос Анжелес Клипперс (42-40): 0.6%, 2.2%
14. Денвер Наггетс (46-36): 0.5%, 1.8%

“Бруклин Нетс”-ийн сонгох эрх “Кливлэнд Кавальерс”-ийнх болно. Учир нь “Нетс” 2013 онд “Бостон Селтикс”-ээс Пол Пирс, Кевин Гарнетт нарыг авчрахдаа драфтын эрхээ өгсөн юм. Энэ эрхийг “Бостон Селтикс” баг өнгөрсөн онд Кайри Өрвингийг авахдаа “Кливлэнд” рүү явуулсан түүхтэй. Морин цэргүүд топ 1-ээр сонгох магадлал 2.8 хувьтай байгаа бол эхний гурваар сонгох магадлал нь 9.9 хувь. Тэд дээгүүр сонгож чадвал энэ зун чөлөөт агент болох Леброн Жэймсийг үлдээх, цаашид түүнгүй байсан ч богино хугацаанд багаа сэргээх боломжтой болно.

Хэдийгээр драфтын эрхээ солилцоогоор явуулсан ч “Бостон” хоосонгүй. Тэд өөрсдийн эхний тойргийн эрхээс гадна “Лос Анжелес Лэйкерс”-ийн эрхийг авах боломжтой. Нуурынхан энэ жилийн эрхийг “Филадельфи 76” баг эзэмших байсан ч тэд өнгөрсөн жилийн драфтын №1-ийг авахын тулд “Бостон Селтикс”-тэй солилцоо хийсэн билээ.

Хэрвээ “Лэйкерс” баг №1, эсвэл №6 ба түүнээс доош эрх сонговол “Филадельфи 76”-д үлдэнэ. Харин 2-5-ын хооронд сонгох бол “Селтикс” завшина. Харин энэ эрх “Филадельфи”-д үлдвэл “Селтикс”-т 2019 оны драфтын эрхээ шилжүүлнэ. Түүнчлэн “Сакраменто Кингс”-ийн 2019 оны эхний раундын эрх “Бостон”-д очих юм. “Хаад”-ын эрхийг одоогоор “Филадельфи” эзэмшиж буй.