Олон улсын сагсан бөмбөгийн холбоо (FIBA) ДАШТ-ий урьдчилсан шатны тоглолтын үеэр хоорондоо гар зөрүүлж, үймээн дэгдээсэн Филиппин болон Австралийн 13 тоглогчийг торгох арга хэмжээ авлаа.

Зодооныг эхлүүлж, гол дүрд нь тоглосон талбайн эзэн баг болох Филиппиний 10 тоглогч нийт 35 тоглолт өнжих шийтгэл хүлээх аж. Харин Австралийн гурван тоглогч нийт есөн тоглолт өнжинө.

Түүнчлэн Филиппиний сагсан бөмбөгийн холбоонд 250 мянган швейцарь франкийн торгууль оноосон бол Австралийн сагсан бөмбөгийн холбоо 100 мянган швейцарь франкийг төлөх шаардлагатай болжээ. Үүгээр ч зогсохгүй шавь нараа хориглож чадаагүй Филиппиний шигшээ багийн ахлах дасгалжуулагч Винсент Рейэс нэг тоглолт өнжиж, 10 мянган швейцарь франк төлөх гэнэ.

Уг тоглолтын шүүгч нарыг мөн “Elite Programme”-гаас хасч, нэг жилийн хугацаанд FIBA-гаас зохион байгуулсан тэмцээнийг шүүх эрхгүй болжээ.

Энэ сарын 2-нд Филиппин аренад болсон урьдчилсан шатны тоглолтод зодоон болсон. Үүний улмаас 13 тоглогч хөөгдсөн бөгөөд талбай дээр Филиппиний гурван тоглогч тоглолтыг үргэлжлүүлсэн ч хоёр нь алдааны асуудалд орсон тул ганц тоглогчтой үлдсэн учир гуравдугаар үед өндөрлүүлж, 89:53-аар Австралийн баг хожсон билээ. Уг тоглолтын талаар мэргэжлийн боксчин Мэнни Пакьяогийн твиттер хуудсандаа бичсэн жиргээ олны анхаарлыг татсан удаатай.

Торгуульсан тоглогчид:

Филиппин:

Жапет Агуилар, Мэтьюв Врайт (тус бүр нэг тоглолт)

Терренс Ромео, Жэйсон Кастро Уильям, Андрей Блач, Жет Росарио (тус бүр гурван тоглолт)

Рожер Погоя, Карл Крус, Жио Жалалон (тус бүр таван тоглолт)

Калвин Абуева (зургаан тоглолт)

Туслах дасгалжуулагч Жосеф Уичико (гурван тоглолт)

Ахлах дасгалжуулагч Винсент Рейес (нэг тоглолт)

Австрали:

Крис Гоулдинг (нэг тоглолт)

Тон Макер (гурван тоглолт)

Даниел Кикерт (таван тоглолт)

NBA-гийн “Милоуки Бакс” багийн төвийн тоглогч Тон Макер тэргүүтэй 13 тоглогч Филиппин-Австралийн тоглолтын үеэр хөөгджээ. Сагсан бөмбөгийн ДАШТ-ий эрх авах Ази тивийн урьдчилсан шатны тоглолт Филиппинд болсон бөгөөд энэ үеэр дээрх 13 тоглогч оролцсон нүсэр зодоон болсон юм.

Австраличууд талбайн эздийг гуравдугаар үед 79:48-аар илт давуу хожиж байх үед Австралийн тоглогч дээр алдаа гаргаж, улмаар бужигнаан үүссэн. Энэ нь сүүлдээ олныг хамарсан зодоонд хүргэж, тамирчин, албаныхан нийлсэн олон хүн зодоонд оролцжээ. Тэд бие бие рүүгээ сандал чулуудаж байсан юм.

Австралийн шигшээ багт тоглодог Тон Макер болон цагтаа “Вашингтон Визардс”, “Бруклин Нетс” багт зүтгэж байсан, өдгөө Филиппиний шигшээд данстай Андрей Блач нар зодоонд оролцсон учир хөөгдсөн байна.

Албаныхан зодооны бичлэгийг шүүж үзээд нийт 13 тоглогчийг хөөх шийдвэр гаргасан. Австралийн шигшээгээс Тон Макер, Даньел Кикерт, Кристофер Гоулдинг, Натан Собей нарыг хөөсөн бол эсрэг багаас А.Блач, Терренс Ромео, Жэйсон Кастро, Карл Брайан Крус, Калвин Абуева, Рожер Погой, Трой Росарио, Жапет Агулар болон Матью Урайт нарыг хөөсөн гэнэ.

Улмаар талбай дээр Филиппиний баг гуравхан тоглогчтой үлдэж, харин австраличууд наймуулаа хоцорсон. Талбайд үлдсэн гурван тоглогчийн хоёр нь богино хугацаанд алдаа гаргаснаар Филиппиний багаас ганцхан тоглогч үлдсэн бөгөөд албаныхан уг тоглолтыг 89:53-аар Австрали хожсон үзээд тоглолтыг цагаас нь өмнө дуусгасан гэнэ.

Олон улсын сагсан бөмбөгийн холбоо зодооны хэргийг нарийн шалгана гэдгээ мэдэгдсэн. Тун удахгүй ямар шийтгэл оноохоо олонд мэдээлэх юм. Харин үймээн болсонтой холбогдуулж, Австралийн сагсан бөмбөгийн холбооны тэргүүн Антони Мур хөгжөөн дэмжигчдээсээ уучлалт гуйжээ.