Tag: Монгол Улсын шигшээ баг

3×3 сагсанбөмбөгчид олимпод нэг алхам ойртлоо

3×3 сагсанбөмбөгийн олимпын эрх олгох тэмцээн Австрийн Грац хотод хөшгөө нээлээ. Тэмцээнд манай эрэгтэй шигшээ баг тамирчид өрсөлдөж буй бөгөөд A хэсэгт Бразил, Польш, Чех, Турк гэх сагсанбөмбөг өндөр хөгжсөн улсуудтай багтсан юм. Тэгвэл өнгөрөгч шөнө манай залуус хэсгийн эхний тоглолтоо Польш болон Туркийн багуудтай хийж ялалт байгуулжээ. 

Дэлхийн аваргын хүрэл медальт Польшийн шигшээ багийн эсрэг тоглолтод манай залуус 22:18-ийн харьцаатайгаар илүүрхсэн бөгөөд энэ нь шигшээ багийн түүхэн дэх анхны 22 оноо болон бүртгэгдлээ. Тоглолт 7:11-ийн харьцаатай үргэлжилж байх үед Г.Цэнгүүнбаярын гайхалтай хамгаалалт, итгэмээргүй холын зайн шидэлт багаа сэргээсэн бөгөөд тэрбээр нийт 7 оноог авсан бол Э.Дөлгөөн 8, Д.Дэлгэрням 5, Э.Цэрэнбаатар 2 оноог тус тус авсан байна. 

Энэ өдрийн сүүлийн тоглолтыг манай баг Туркын залуустай хийсэн юм. Тус тоглолтод Э.Дөлгөөн, Г.Цэнгүүнбаяр нарын холын шидэлтүүд ээлж дарааллан амжилттай болж 21:13-ийн харьцаатайгаар өрсөлдөгчөө буулгаж авчээ. Ийнхүү манай баг A хэсгийг тэргүүлж эхэлсэн бөгөөд бидний ард хүчирхэг Бразилын шигшээ мөн адил хоёр хожилтойгоор бичигдэж байна.

Манай залуусын дараагийн тоглолт:

  • V/28 Монгол vs Чех /01:30/
  • V/28 Монгол vs Чех /03:35/

Тэмцээний эхний гурван байрт шалгарсан улсууд Токиог зорих эрхээ халааслах юм. Эхний өдрийн фото мэдээ

Монголын эрэгтэй шигшээ баг анх удаа 3х3-ын ДАШТ-д оролцоно

3х3 сагсан бөмбөгийн ДАШТ ирэх зургадугаар сарын 8-12-нд Филиппиний Манила хотод болно. Тус тэмцээнд 37 орны 40 баг оролцох юм. Олон улсын сагсан бөмбөгийн холбоо, Филиппиний сагсан бөмбөгийн холбоо хамтран зохион байгуулах тус тэмцээн тав дахь удаагаа зохиогдох юм. Уламжлал ёсоор зохион байгуулагч орон болох Филиппиний эмэгтэй, эрэгтэй шигшээ баг болон өнгөрсөн жил Францын Нантес хотод болсон ДАШТ-д түрүүлсэн,  Сербийн эрчүүд, Оросын бүсгүйчүүд энэ удаагийн тэмцээний эрхээ шууд халаасалсан.

Тэгвэл бусад багууд Филиппинийг зорих эрхээ олон улсын 3х3 сагсан бөмбөгийн холбооноос тогтоосон чансаагаар авсан юм.

Энэ удаагийн тэмцээнд Канад, Экуадор, Иран, Малайз, Монгол болон Нигерийн баг тамирчид анх удаа оролцох юм.

Түүнчлэн ердөө гурван улс л эрэгтэй болон эмэгтэй шигшээ багаараа оролцох эрх авчээ. Тэд бол тэмцээнийг зохион байгуулагч Филиппин, ОХУ болон Нидерландын шигшээ юм.

Энэ удаагийн ДАШТ-д ур чадварын тэмцээн зохион байгуулах болсон билээ. Тодруулбал, эрчүүд цагариг руу тохох слэм данкт оролцох бол эмэгтэйчүүд ур чадварын, холимог баг шидэлтийн тэмцээнд оролцоно.

Оролцох багууд:

Эрэгтэй: Бразил, Канад, Хорват, Экуадор, Эстони, Япон, Йордан, Киргызстан, Латви, Монгол, Нидерланд, Шинэ Зеланд, Нигерь, Филиппин, Польш, Румын, ОХУ, Серб, Словен, Украин

Эмэгтэй: Андора, Аргентин, БНХАУ, Чех, Франц, Герман, Унгар, Иран, Итали, Казахстан, Малайз, Нидерланд, Филиппин, ОХУ, Испани, Швейцарь, Туркменистан, Уганда, АНУ, Венесуэль

Филиппинчүүд уг тэмцээнд ихээхэн ач холбогдол өгч, 55 мянган хүний суудалтай “Philippine Arena”-д зохион байгуулах болжээ. Энэ бол дэлхий дээрх хамгийн олон хүний суудалтай спорт ордон. 2014 онд баригдсан энэ ордонд Филиппиний сагсан бөмбөгийн шувтаргын тоглолтыг 54,083 хүн нэг дор цугларч үзсэн нь дээд амжилт тогтоож байв. Түүнчлэн 2023 оны сагсан бөмбөгийн дэлхийн цомын тэмцээнийг энд хийхээр төлөвлөсөн гэнэ.

Филиппиний сагсан бөмбөгийн холбооноос шигшээ багийнхаа гол тоглогч Терренс Ромеог 3х3-ийн ДАШТ-д оролцоно гэж зарласан юм. Дотоодын лигт бараг авч болох бүх шагналыг нь хамсан Ромео шигшээ багаа 2015 онд Ази тивийн аваргаас мөнгөн медаль хүртэхэд гарааны холбогчоор тоглож байв.

Канадын эрэгтэй шигшээ баг бүрэлдэхүүнээ хамгийн түрүүнд зарлав. Тэдний бүрэлдэхүүнд Майкл Линклатер, Нолан Брудель, Стив Сир, Майкл Лифферс нар багтжээ. Канадчууд энэ тэмцээнд бидэнтэй ижил анх удаа оролцохоор болсон билээ. Энэ удаагийн ДАШТ-д 2020 оны Токиогийн олимпийн эрх олгогдохгүй. Гэхдээ түрүүлсэн баг нь уламжлал ёсоор 2019 оны ДАШТ-д оролцох эрхээ авах юм.

3х3 сагсан бөмбөгийн ДАШТ-д багууд бүрэлдэхүүнээ ирэх тавдугаар сарын 8-нд хүртэл албан ёсоор зарлах ёстой билээ.