NBA-гийн шилдэг тоглогчдын нэг асан, “Сан Антонио Спэрс”-ийн түүхэн дэх хамгийн шилдэг тоглогч Тим Данкан ирэх улиралд эргэж ирнэ. Гэхдээ тамирчнаар бус туслах дасгалжуулагчаар…

Тим Данкан шинэ улиралд “Спэрс” багийнхаа туслах дасгалжуулагчаар ажиллах боллоо. Өдгөө 43 настай Тимми 2015-16 оны улирлын дараа өмсгөлөө хананд өлгөсөн. Үүнээс хойш багагүй хугацаанд амралттай, хүссэн үедээ “Спэрс”-ийн залуу тоглогчидтой бэлтгэл хийж явсан бол одоо албан ёсоор Грэгг Поповичийн туслах боллоо.

Грэгг Попопичийн туслахаар ажиллаж байгаад одоо ахлах дасгалжуулагчийн үүрэг гүйцэтгэж буй хэд хэдэн эрхэм бий. Тодруулбал, “Милоуки Бакс”-ын ахлах дасгалжуулагч Майк Бадинхоузэр, “Филадельфи 76”-гийн Брэтт Брауныг нэрлэж болно. Түүнчлэн түүний удирдлага дор тоглож явсан “Голден Стэйт Уорриорз”-ын Стив Керр, “Лос Анжелес Клипперс”-ийн Док Риверс нарыг ч онцолж болох юм.

Тиммигээс гадна “Спэрс” дасгалжуулагчийн албандаа залуу мэргэжилтэн Уилл Хардиг нэмсэн байна. У.Харди 2010 онд Уильямс коллежийг төгсөөд “Спэрс”-ийн арын албанд зүтгэж байгаа билээ.