Кармэло Энтони “Атланта Хоукс”-тай албан ёсоор гэрээгээ цуцалсны дараагаар “Хьюстон Рокитс”-той нэгдэх шийдвэр гаргалаа. Энд тэр нэг жилийн 2.4 сая ам.долларын цалин авахаар болсон аж.

Ийнхүү Жэймс Хардэн, Крис Пол, Кармэло Энтони нар нэг багт нэгдэж, аваргын цом, алтан бөгжний төлөө зүтгэхээр болов. К.Энтони өнгөрсөн улиралд 78 тоглолтод оролцохдоо 16.2 оноо авч, 40.4 хувьтай довтолсон нь түүний замналын хамгийн тааруу үзүүлэлт. Кармэло энэ багт гараанд гарах магадлалтай байгаа ч эцсийн шийдвэрийг Майк Д’Энтони гаргах юм. Хэрвээ Ж.Хардэн, К.Энтони нар гараанд гарах үед хамгаалалт хэт суларвал Пи.Жэй Такерыг гараанд гаргаж, Энтониг сэлгээнээс талбайд гаргахаар төлөвлөж магадгүй. Энтонигийн хувьд дасгалжуулагч ямар шийдвэр гаргасан түүнийг дагана гэдгээ эрт мэдэгдсэн юм.

К.Энтони энэ улиралд 27.9 сая “ногоон”-ы цалин авах ёстой байсан ч өөрөө солилцоонд орохыг зөвшөөрсөн юм. Хэдэн жилийн өмнө “Нью Йорк Никс”-тэй гэрээ байгуулахдаа солилцоонд орох эсэхээ өөрөө шийдэх давуу эрхтэй байлаа. “Никс”-ээс “Оклахома Сити”-д ирэхдээ ч энэ давуу эрхээ эдэлсэн. Өөрөөр хэлвэл, баг хүссэн үедээ түүнийг солилцоонд оруулах эрхтэй бус заавал тоглогчийн саналыг сонсох ёстой байдаг. Өнгөрсөн жил бүтэлгүйтсэн ч довтлогч Пол Жоржтой олон жилийн гэрээ байгуулснаар “Тандер” их хэмжээний мөнгийг татварт төлөх ёстой болсон юм. Тиймээс түүнийг солилцоонд оруулах, боломжгүй бол гэрээг нь худалдаж аваад тавьж явуулах тохиролцоонд хүрчээ. Энэ тохиолдолд тэр ирэх улиралд 2.4 сая ам.долларын албан ёсны цалинтай ч нэмээд 27.9 сая “ногоон”-оо авах эрхтэй гэсэн үг. Харин шинэчлэл хийхийг хүссэн “Атланта Хоукс” түүний өндөр цалинг солилцоогоор аваад багаас чөлөөлөхийг зөвшөөрсөн билээ.