Category: Сагсан бөмбөг

Лэброн Жэймс “Лэйкерс”-ийг сонголоо

Лэброн Жэймс сүүлийн найман жилийн хугацаанд хоёр дахиа Кливлэнд хотыг орхиж байна.

“Klutch Sports” группийн мэдээлснээр “Кливлэнд” багаас 35.6 сая ам.долларын цалинтай, нэг жилийн гэрээгээ цуцалсны дараа “Лос Анжелес Лэйкерс” багтай 4 жилийн 154 сая “ногоон”-ы гэрээг үзэглэхээр болсон аж.

“Лэйкерс” дахин өрсөлдөөнд оров

“Лос Анжелес Лэйкерс” дахин түрүүлэх багийн эгнээнд орж эхэллээ. Өдгөө 33 настай Жэймс өнгөрсөн улиралд 27.5 оноо, 9.1 оновчтой дамжуулалт, 8.6 самбар, 54.2 хувьтай довтолж, холын зайнаас 36.7 хувьтай шидсэн төдийгүй лигт хамгийн их буюу 36.9 минут талбайд гарсан юм.

Үүгээр ч зогсохгүй хасагдах шатны 22 тоглолтод 34.0 оноо, 9.1 самбар, 9.0 оновчтой дамжуулалт дунджилж, багаа Дорнод бүсийн аваргаар дөрвөн жил дараалан тодруулсан. Тэрбээр лигийн түүхэнд багадаа хасагдах шатны 15 тоглолт хийсэн тоглогчдоос ийм дундаж үзүүлсэн анхны тоглогч болсон билээ.

“Кливлэнд” шинэчлэлийн зам руу

Л.Жэймсийн энэ шийдвэр “Кливлэнд”-д хүчтэй нөлөөлнө. Тус багийн хувьд цаашид шинэчлэлийн зам руу орох нь гарцаагүй болох ирээдүй. Тэд Кевин Лоувыг ч явуулах арга зам хайж мэдэх юм. Гэхдээ тэдний шинэчлэл тийм ч амар байхгүй нь тодорхой. Учир нь Жорж Хилл (19 сая), Тристан Томпсон (17.5 сая), Жи Ар Смит (14.7 сая), Жордан Кларксон (12.5 сая) зэрэг өндөр цалинтай тоглогчид бий. Лэброн явсанаар санхүүгийн том хямралд өртөнө гэж шинжээчид таамаглаж байгаа юм.

Кевин Дюрант + Крис Пол + Пол Жорж багтаа үлдлээ

NBA-гийн энэ зуны чөлөөт агентууд долдугаар сарын 1-нээс өмөн шийдвэрээ гаргаж, багтайгаа үлдэх эсэхээ сонгодог. Энэ жил Лэброн Жэймс, Кевин Дюрант, Крис Пол, Пол Жорж зэрэг одод чөлөөт агент болж, шинэ баг сонгох боломжтой байсан юм. Ялангуяа “Лос Анжелес Лэйкерс”-ийн сагсан бөмбөг хариуцсан ерөнхийлөгч “Шидэт” Жонсон энэ зун багтаа супер од тоглогч авчрахгүй бол ажлаа өгнө гэдгээ мэдэгдсэн. Гэхдээ түүний эхний зорилго бүтэлгүйтэв. Лос Анжелесийн унаган хүү Пол Жоржийг багтаа авах том зорилготой байсан ч тэр “Оклахома Сити”-дээ үлдэх шийдвэр гаргаж, Нуурынхан дараагийн төлөвлөгөө рүү шилжлээ.

Ингээд энэ өдөр болсон шилжилт, хөдөлгөөнийг товч танилцуулья.

Пол Жорж – Оклахома Сити Тандер – 4 жил 137 сая

“Оклахома Сити Тандер”-ын довтлогч Пол Жоржийг төрсөн нутаг болох Лос Анжелес рүү явна гэж олон хүн тооцож байв. Рассел Уэйстбруктэй цуг хийсэн үдэшлэгт “Би эндээ үлдэнэ” гэж зарласан П.Жорж цалингаа тултал буюу 4 жилийн 137 саяар багтаа үлдэхээр шийджээ. Түүний үлдэх болсон шалтгаан тун энгийн. Тэрбээр Рассел Уэйстбруктэй сүүлийн нэг жил гарангийн хугацаанд хамт талбайд өнгөрүүлэхдээ дотны найзууд болж, энэ харилцаа нь багтаа үлдэхэд хамгийн чухал нөлөө үзүүлсэн гэж ярьсан юм. Түүний гэрээний дөрөв дэх жил нь тоглогчоос хамааралтай байх аж.

Крис Пол – Хьюстон Рокитс – 4 жилийн 160 сая

33 настай холбогч “Хьюстон”-д замналаа дуусгахыг хүсчээ. Тэрбээр дөрвөн жилийн 160 сая ам.долларын макс гэрээнд гарын үсэг зурлаа. Харин одоо Пуужингууд хуучин бүрэлдэхүүнээ сайжруулж чадах эсэх нь асуултын тэмдэгтэй үлдэв. Тэд ойрын хугацаанд багтаж, 24 настай төвийн тоглогч Клинт Капелагаа авч үлдэх шаардлагатай.

Кевин Дюрант – Голден Стэйт Уорриорс – 2 жилийн 61.5 сая

Кевин Дюрантын хувьд багтайгаа олон жилийн гэрээ байгуулах хүсэлгүй гэдгээ мэдэгдсэн. Тэр зөвхөн спорт бус бизнес талаас нь ч үүнд хандаж байгаа юм. К.Дюрантын хувьд гэрээгээ сунгасан нь ирэх жилийн чөлөөт агентын зах дээр ч тунаж үлдэх боломжтой. Учир нь ирэх улиралд 30 сая “ногоон” халааслах Дюрант хоёр дахь жилийн 31.5 саяыг цуцлах боломжтой гэнэ. Тэрбээр өнгөрсөн зун харьцангуй бага буюу хоёр жилийн 51 саяын гэрээг үзэглэж, үр дүнд нь Андре Игоудала, Шон Ливингстон нарыг багтаа үлдэх боломж олгосон билээ.

ДеАндре Жордан – Даллас Маверикс – 1 жилийн 24 сая

ДеАндре Жордан анх удаагаа “Клипперс”-ийг орхиж, “Даллас Маверикс”-тай гэрээ байгууллаа. Өдгөө 29 настай Жордан 2015 онд чөлөөт тоглогч болоод “Даллас”-т очих тун дөхсөн. Гэрээнд гарын үсэг зурах л дутуу тэр үед Жордан шийдвэрээ гэнэт өөрчилж, “Клипперс”-тэй дөрвөн жилийн гэрээ байгуулсан билээ. Д.Жорданг багтаа авахын тулд Дирк Новицкигийн үйлдэл хамгийн их тус хүргэсэн аж. Д.Новицки жилд 5 сая ногоон авах өөрийн гэрээгээ цуцалж, Жордантай гэрээ байгуулах боломж үүсгэсэн. Бүх гэрээ дуусгавар болсны дараа немц эр багтайгаа дахин гэрээгээ сунгахаар тохиролцоонд хүрсэн аж.

Тревор Ариза – Финикс Санс – 1 жилийн 15 сая

Өдгөө 33 настай Т.Аризад “Хьюстон” өндөр цалин өгөх боломжгүй тул шинэ зам сонгожээ. Гэхдээ энэ удаад тэр мөнгө хөөж, “Финикс Санс”-ыг зорьсон байна. Т.Ариза “Хьюстон”-ы хамгаалалтын гол түлхүүр байв. Харин одоо тэр драфтын үдэш “Филадельфи 76”-гаас солилцоогоор авчирсан залуу довтлогч Микал Брижесийн багш болов.

Деррик Рөүс – Миннисота Тимбэрволвес – 1 жилийн 2.1 сая

Том Тибодеугийн хайртай шавь Деррик Рөүс өөрт нь боломж олгосон багтаа ахин нэг жил зүтгэх боллоо. Тэрбээр өнгөрсөн улирлын сүүлээр тус багт очиж, 9 тоглолтод оролцохдоо 5.8 оноо, 1.2 дамжуулалт дунджилсан билээ. Харин хасагдах шатанд 14.2 оноо, 2.6 оновчтой дамжуулалт гүйцэтгэсэн.

Жимми Батлер – Миннисота Тимбэрволвес – 4 жилийн 110 сая

“Миннисота” Жимми Батлерт макс гэрээ санал болгожээ. Гэхдээ Ж.Батлерын хувьд гэрээгээ сунгах гэж яарахгүй хэмээн сэтгүүлчид бичиж байна. Учир нь хуучин гэрээ нь ирэх жил дуусах бөгөөд тэр үед гэрээгээ сунгавал илүү их цалин авах боломжтой аж. Ямартай ч Батлер энэ сарын 9-нд хүртэл эцсийн шийдвэрээ гаргах хугацаа бий.

 

Стив Керр лигийн хамгийн өндөр цалинтай дасгалжуулагч болно

NBA-гийн гурван удаагийн аварга дасгалжуулагч Стив Керрийн гэрээг албан ёсоор сунгасан гэдгээ “Голден Стэйт” багийн хэвлэлийн төлөөлөгч мэдэгдлээ.

Одоогоор Стив Керр хэдий хэмжээний цалин авах нь тодорхойгүй байгаа ч түүнийг лигийн хамгийн өндөр цалин авдаг дасгалжуулагчийн нэг болно гэж ESPN-ий сэтгүүлч Адраин Вожнаровски үзэж байгаа юм.

Тэрбээр өнгөрсөн оны хуучин гэрээгээр бол жилд 5 сая “ногоон” авч байв. Тэгвэл энэ цалин нь багадаа 10 сая орчим ам.доллар болж байгаа гэж сэтгүүлчид таамаглаж байгаа юм. Одоогоор лигт “Сан Антонио”-гийн Грэгг Попович 11 сая.ам долларын цалин авч байгаагаар мэргэжил нэгтнүүдээ тэргүүлдэг.

Стив Керрийн хувьд Дайчидыг дөрвөн улирал дасгалжуулахдаа 265 хожиж, 63 хожигдсон. Тэрбээр энэ жил дасгалжуулагчийн хувиар гурав дахь аваргын цомоо авснаар ийм амжилтад хүрсэн зургаа дахь дасгалжуулагч болсон билээ.

С.Керр тоглогч байхдаа таван аваргын цом хүртэж байсныг сагсан бөмбөг сонирхогчид сайн мэдэх биз ээ.

 

Чэйз Бадинжер элсний волейболын тамирчин болов

Өнөө цагийн NBA-гийн шилдэг довтлогч Кевин Дюрант ахлах сургуульд байхаасаа л бүх шагналыг түүж ирсэн. Тэрбээр 12 жилийн өмнө МакДоналдсын бүх америкийн үнэ цэнэтэй хоёр тоглогчийн нэгээр тодорч, дараа нь коллежийн шилдэг тоглогчоор нэрлэгдсэн удаатай. 2007 онд драфтад нэр дэвшин, №2-оор сонгогдсон К.Дюрант 2014 онд лигийн үнэ цэнэтэй тоглогчоор нэрлэгдэж, одоо бол лигийн аваргаар хоёр удаа тодорч, финалын үнэ цэнэтэй тоглогч болсон удаатай.

Тэгвэл ахлах сургуулийн үнэ цэнэтэй тоглогчийн шагналыг түүнтэй хуваасан тэр эрхэм хэн бэ? Энэ бол Чэйз Бадинжер юм. Хожим Аризонагийн их сургуульд гурван жил номын дуу сонсоод NBA-д элссэн Ч.Бадинжер 2009 оноос “Хьюстон”, “Миннесота”, “Индиана”, “Финикс” багуудад зүтгээд Испанийн “Баскониа” багт нэг жил тоглосон билээ.

Ахлах болон их сургуульд чадварлаг тоглогчийн тоонд багтсан түүний мэргэжлийн замнал нь урт байгаагүй. Тиймээс 30 хүрэхээсээ өмнө NBA-гээс явж, Испанид очоод бүтэн жил болсныхоо дараа эргэн ирсэн юм. Харин энэ удаа тэр арай өөр замыг сонгожээ.

Тэр ахлах сургуульд байхаасаа л волейбол тоглодог байсан юм. Авьяаслаг ч байлаа. Зургаан настайдаа сагсан бөмбөг тоглож сурсан бол үүнээс таван жилийн дараа волейболд хорхойтой болжээ. Бяцхан Чэйзийг ийм авьяастай болоход энэ хоёр спортоор хичээллэдэг эгч Британи болон ах Данкан нарынх нь нөлөө их байв. Харин хүүхдүүдээ их спортод дөртэй болоход аав, ээжийнх нь сонирхол хамгийн их нөлөөлсөн зүйл.

Ахлах сургуульд спортоор авьяаслаг явсан Чэйзийн төлөө гурван их сургууль хоорондоо өрсөлджээ. Эд бол Аризона, USC болон UCLA. Лос Анжелесийн их сургууль түүнд сагсан бөмбөг, волейболоор тоглох боломж олгохоо амлаж байсан бол Аризонад эрэгтэй волейболын систем байсангүй. Гэхдээ “Уайлдкатс”-ын дасгалжуулагч Лют Олсений түүнд тавьсан санал хамгийн их таалагджээ. Тиймээс Лютийн шавь болохоор “Аризона”-г сонгосон аж.

Тэр волейболыг орхихыг хүсээгүй ч сагсан бөмбөгөөр илүү хол зам туулах боломжтой байсан тул энэ хоёр спортоос сонголтоо хийсэн юм. Тиймээс Аризонагийн их сургуулийн системд найдсан хэрэг.

Чэйз гурван жил их сургуульд тоглоод 2009 оны драфтад нэр дэвшиж, хоёрдугаар бүсийн 44-өөр “Детройт Пистонс”-т сонгогдсон. Гэхдээ драфтын өдрөө л “Хьюстон Рокитс” руу солилцоогоор явж, албан ёсоор мэргэжлийн тамирчны замналаа эхлүүлсэн билээ. Бүтэн 7 улирал лигт данстай байхдаа дунджаар 7.9 оноо авч байв. Харин сагсан бөмбөгийн замналаа өндөрлөөд Чэйз шууд өөр сонирхлоо дагахаар шийдсэн байна.

NBA-гийн тоглогч байхдаа зун бүр элсний волейбол тоглодог байв. Энэ нь түүнийг элдэв бэртлээс сэргийлдэг аж. Ялангуяа шагай, өвдөг болон хөлөндөө эрс ачаалал өгч, гэмтэхээс сэргийлнэ. Биеийн бүх булчинг ч жигд хөгжүүлдэг гэнэ. Долоо хоногт 2-3 удаа элсний волейболд цаг гаргадаг байсан юм.

Ингэж яваад Лондоны олимпод оролцож байсан Шен Росенталтай танилцжээ. Шен 2008 оноос АНУ-ын элсний волейболын шигшээ багийн тамирчин гэгдэж, Жэйк Гиббийн хамт Лондоны олимпод хүч сорьсон удаатай. Түүнд мэргэжлийн волейболчин бус Чэйзийн тоглох арга барил таалагдсан учир нэг бус удаа сагсан бөмбөгийн карьераа орхиж, волейболын тамирчин болохыг санал болгож байжээ. Гэхдээ тэр үед Чэйзийн сагсан бөмбөгийн замнал дуусаагүй байсан тул америк эр үүнийг наргианаар хэлж байсан юм.

Сагсан бөмбөгийн замнал нь ид үедээ явж байхад Чэйз хэд хэдэн хүнд хагалгаанд орсон юм. 2013 онд өвдгөндөө хүнд хагалгаа хийлгэсэн нь хожим түүний спортын замналыг үндсээр нь өөрчилсөн. Хүнд бэртлийн улмаас өмнөх шигээ эрч хүчтэй, агаарт “нисч” чадахаа больсон Чэйз тоглолтын арга барилаа эрс өөрчлөөд ч нэмэр болоогүй юм. Бадинжер эцэст нь Испанийг зорьсон ч амралтаараа эх орондоо ирээд бодлоо өөрчилжээ.

Росентал түүнийг сагсан бөмбөгийн замналаа дуусгавал элсний волейболын хамтрагч болох боломжтой гэсэн саналыг Чэйз хэдэн өдрийн турш бодсон бөгөөд эцэст нь энэ спортод зүтгээд үзэхээр шийдсэн гэдэг. Тэр Росентал руу утасдаад “За, сагсан бөмбөгөө орхиж, волейбол руу орохоор шийдлээ” гэж ярьжээ.

Ингэж 38 настай мэргэжлийн волейболчин Шен Росинтал, энэ спортын замналаа дөнгөж эхлүүлж буй 30 настай Чэйз Бадинжер нар Токио 2020-д оролцох эрх авахаар орон нутгийн тэмцээнд хүч сорьж эхэллээ. Нью Йоркийн нээлттэй тэмцээнд гурван ялалт байгуулсан нь энэ хосыг чадварлаг баг гэдгийг нь харуулав.

Лэброн Жэймс, Дуэйт Ховард, Кевин Дюрант, Харрисон Барнс. NBA-гийн чадварлаг тоглогчид юугаараа ижилхэн бэ? Тэд бол энэ зуунд ахлах сургуулийн МакДоналдс бүх оддын тэмцээний үнэ цэнэтэй тоглогч болсон, олимпийн алтан медальтнууд аж. Хэрвээ Чэйз Токиод алтан медаль хүртвэл энэ тоог нэгээр нэмэх боломжтой.

Пол Жорж чөлөөт тоглогч болохоо зарлалаа

“Оклахома Сити Тандер”-ын хамгаалагч Пол Жорж гэрээнийхээ хамгийн сүүлийн жил болох 20.7 сая “ногоон”-оос татгалзаж байгаагаа мэдэгдлээ. Ингэснээр П.Жорж чөлөөт тоглогчийн зах руу шилжиж байгаа юм. ESPN-ий алдарт сэтгүүлч Адриан Вожнаровскигийн үзэж буйгаар бол Пол хуучин багтайгаа гэрээгээ сунгах магадлал илүү байгаа аж. Түүнийг мөн “Лос Анжелес Лэйкерс” сонирхож байгаа боловч эхний сонголт нь биш гэнэ. Нуурынхан Кавай Леонардыг урвуулж, дараа нь Лэброныг авчраад Пол Жоржтой ярилцах төлөвтэй. Ингэхийн тулд багагүй хугацаа шаардлагатай юм.

Түүнчлэн “Филадельфи 76”, “Хьюстон Рокитс” багууд түүнийг сонирхож буй. Түүнийг сэтгүүлчид ирэх улиралд “Лэйкерс”-т тоглох хүсэлтэй гэж таамаглаж байгаа ч одоогоор энэ нь батлагдсан зүйл үгүй. Тэрбээр Лос Анжелес хотод төрж өссөн тул хотынхоо багтаа тоглохыг хүсч байгаагаа нэг бус удаа мэдэгдсэн билээ.

 

Кавай Леонардын төлөөх “дайн” эхэллээ

NBA хөдөлгөөнд орж эхэллээ. Учир нь тун удахгүй буюу энэ ням гаригт чөлөөт тоглогчийн зах нээгдэнэ. Лэброн Жэймс тэргүүтэй томчууд шийдвэр гаргаж, лигийн ирээдүйн өнгийг тодорхойлох болно. “Хаан”-ыг багтаа авахын тулд багууд хөрсөө бэлдэх хэрэгтэй. Түүний сайн хамтрагч нь одоогоор “Сан Антонио Спэрс”-ийн довтлогч Кавай Леонард байх бололтой. Ялангуяа “Лос Анжелес Лэйкерс” том зах зээл, бизнесийн орчинтой гэдгээрээ түрий барьж, Кавайг урвуулах ажил эрчимтэй хийж эхлэв. Уг нь “Спэрс” Өрнөдийн багууддаа зарахгүй гэж байгаа ч Лэброныг авчрахын тулд бүхнийг хийхэд бэлэн байгаа “Нуурын” удирдлагууд байнга шахалт үзүүлж байгаа гэх. Тэдний хувьд Кавайг авчирвал тэртээ тэргүй сэтгэл нь наашаа болоод буй Лэброныг багтаа харна гэсэн үг. Л.Жэймсийн том хүү саяхан Лос Анжелесийн нэгэн томоохон ахлах сургуульд бүртгүүлсэн учир гэр бүл нь энд амьдрах төлөвлөгөөтэй байгааг баталсан хэрэг. Гэхдээ Лэбронд төрөлх хотоо орхиод Лос Анжелесийг зориход сайн хамтрагч хэрэгтэй. Удахгүй 34 нас хүрэх “Хаан”-д одоогийн “Лэйкерс”-ийн залуу тоглогчдыг хөгжихийг хүлээх хугацаа ховор. Тиймээс “Шидэт” Жонсон сайн хамтрагчид авчирч, түрүүлэх хэмжээний баг босгохоор шаргуу хөөцөлдөж буй. Түүний төлөвлөгөө бүтэлгүйтвэл шуудхан ажлаа өгнө гэдгээ ил тод зарлачихсан. Лэброн долдугаар сарын 4-нөөс өмнө шийдвэрээ гаргаж, хаашаа очихоо хэлэх тул ойрын хугацаанд амжиж том наймаа хийх шаардлага “Лэйкерс”-т тулгарчээ.

Кавайд санал тавьсан дөрвөн баг бий гэдгийг бүгд мэдэж буй. Эдгээрээс “Бостон Селтикс” Лэброныг зогсоохын тулд гол өрсөлдөгчийг нь багтаа элсүүлэхийг хүсч байгаа бол бусад гурван баг “Хаан”-ыг багтаа авахын тулд түүнийг шохоорхож байгаа билээ. Энэ гурван баг бол “Кливлэнд Кавальерс”, “Филадельфи 76” болон “Лос Анжелес Клипперс”.

“Бостон Селтикс” холбогч Кайри Өрвинг дээрээ залуу довтлогч Жайлин Браун, 2019 оны “Сакраменто Кингс”-ийн драфт эрх санал тавьсан гэж шинжээчид таамаглаж байгаа. Ганц асуудал нь К.Өрвинг сүүлийн дөрвөн жилийн хугацаанд өвдгөндөө хоёр удаа мэс засал хийлгэсэн. Энэ бол түүн шиг хурдтай тоглодог хүнд бол том асуудал. Мөн 2019 онд гэрээ нь дуусч, чөлөөт тоглогч болоод яваад өгөх боломжтой.

“Филадельфи”-гийн хувьд Бэн Симмонс, Жоэль Эмбийдээс бусад тоглогчоор солилцоо хийхэд татгалзах зүйлгүй аж. Үүнд Маркель Фулц, Роберт Ковингтон, Дарио Шарич, Жэррид Бэйлисс нар багтаж байгаа. Түүнчлэн “Майами”-гийн 2021 оны драфтын сонголтыг ч явуулах бололтой.

“Кливлэнд”-ийн хувьд боломж тааруу. Гэхдээ тэд байгаа бүх боломжоо ашиглах гэнэ. Шууд Кавайг авах боломж бага учраас юун түрүүнд гурван баг оролцсон солилцоо хийхээр санаархаж буй. Энэ гурав дахь баг бол “Чарлотт Хорнетс”. Кэмба Уолкероо явуулах хүсэлтэй байгаа тэдэнд хүсээд буй авьяаслаг тоглогчийг нь өгч, оронд нь К.Уолкер, К.Лоув нарыг “Спэрс” рүү явуулаад Кавайг багтаа авах. Гэхдээ энэ нь багаа шинээр босгох хүсэлтэй “Спэрс”-ийн таашаалд нийцэх эсэх нь тодорхойгүй.

NBA Awards 2018: Жэймс Харден үнэ цэнэтэй тоглогч боллоо

АНУ-ын цагаар даваа гаригт NBA-гийн өнгөрсөн улирлын шилдгүүдийг зарлав. “Хьюстон Рокитс”-ын хамгаалагч Жэймс Харден эцсийн эцэст улирлын үнэ цэнэтэй тоглогчоор тодров. Түүнтэй энэ шагналын төлөө “Кливлэнд Кавальерс”-ийн Лэброн Жэймс, “Нью Орленс Пеликанс”-ын Энтони Дэвис нар эцсийн шатанд өрсөлдсөн ч Ж.Харден илүү санал авчээ.

2017-18 оны NBA-гийн шагналтнууд:

Үнэ цэнэтэй тоглогч: Жэймс Харден, Хьюстон Рокитс

Шилдэг хамгаалагч: Руди Гобер, Юта Жазз

Шинэ тоглогч: Бэн Симмонс, Филадельфи 76

Шилдэг зургаа дахь тоглогч: Луи Уильямс, Л.А Клипперс

Амжилт нь ахисан тоглогч: Виктор Оладипо, Индиана Пэйсерс

Шилдэг дасгалжуулагч: Дуэйн Кэйси, Торонто Рэпторс

Улирлын үнэ цэнэтэй тоглогч Жэймс Харден

Ж.Харден үнэ цэнэтэй тоглогчийн санал асуулгад хоёр жил дэд байрт орж байв. Тэрбээр 2015, 2017 онд MVP шагналын санал асуулгад эхнийхт нь Стивен Карри, дараа нь Рассел Уэйстбрукийн ард бичигдсэн. Харин энэ улиралд 30.4 оноо авч, баг нь 65-аас дээш ялалт байгуулсан учир өгөхөөс өөр аргагүй байв.

Тоглогч нь өөрөө 30-аас дээш оноо дунджилсан, баг нь 65-аас дээш ялсан тохиолдолд тухайн улиралдаа үнэ цэнэтэй тоглогч болдог бичигдээгүй хуулийг энэ удаа ч зөрчсөнгүй. “Рокитс”-ын түүхэнд улирлын үнэ цэнэтэй тоглогч болсон гурав дахь тоглогч бөгөөд түүнээс өмнө Хакем Олажувон, Мозес Малоун (2 удаа) нар энэ шагналыг хүртэж байлаа. Түүнчлэн NBA-гийн түүхэнд 30 оноо дунджилсан, баг нь 65 ялсан дөрөв дэх тоглогч юм. Түүнээс өмнө Карим Абдул Жаббар, Майкл Жордан (2 удаа), Стифен Карри нар ийм амжилт үзүүлж байв.

Шилдэг дасгалжуулагч Дуэйн Кэйси

Тавдугаар сарын 7: “Кливлэнд” “Торонто”-г шүүрдэв.

Тавдугаар сарын 9: Д.Кэйси шилдэг дасгалжуулагчид нэр дэвшлээ.

Тавдугаар сарын 11: Рэпторс дасгалжуулагчаа халав.

Тавдугаар сарын 11: Пистонс Д.Кэйсиг дасгалжуулагчаар томилов.

Тавдугаар сарын 12: Рэпторс шинэ дасгалжуулагчтай болов.

Зургадугаар сарын 25: Д.Кэйси шилдэг дасгалжуулагчаар тодров.

Шилдэг шинэ тоглогч Бэн Симмонс

Шилдэг шинэ тоглогчийн шагналыг 1952 оноос хойш олгож буй. Энэ хугацаанд “Филадельфи 76” багаас дөрвөн тоглогч уг шагналыг авч байв. Өдгөө 21 настай Б.Симмонс эхний улиралдаа 1200 оноо, 600 дамжуулалт, 600 самбараас бөмбөг авсан түүхэнд хоёр дахь тоглогч аж. Түүнээс өмнө Оскар Робертсон 1960-61 онд үзүүлж байлаа.

Дуэйн Уэйд өөрийн багтай болохыг хүсч байна

“Майами Хит”-ийн хамгаалагч Дуэйн Уэйд ирээдүйд өөрийн багтай болохыг хүсч байгаа гэдгээ ярьжээ. Тэрбээр Блүмбергийн сэтгүүлч Жоэль Уэбертэй өөрийн ирээдүйн зорилгын талаар ярилцсан юм. Д.Уэйд “Би НБЭ-д боломжийн багийн эзэдтэй хамтарч, хувьцаа эзэмшихийг хүсч байгаа. Аль нэг багийг худалдаж авах бус бусад хүмүүстэй хамтарч ажиллах нь миний зорилго. Яг Грант Хилл “Атланта Хоукс”-ын, Шакил О’Нил “Сакраменто Кингс”-ийн хувьцаа эзэмшдэг шиг. Гэхдээ эхлээд зодог тайлах хэрэгтэй. Үүний дараа төлөвлөсөн зүйлээ хийнэ” гэж ярьжээ.

Түүнээс сэтгүүлч ямар багийн хувьцаа эзэмшихийг хүсч байгаа талаар лавлахад “Сеатл Суперсоникс. Би энэ багийг буцаж ирээсэй гэж хүсдэг. Миний бодлоор Сеатл бол сагсан бөмбөг хөгжсөн гайхалтай хот” гэсэн юм.

Өдгөө 36 настай Дуэйн Уэйд өнгөрсөн улиралд “Кливлэнд” болон “Майами”-д байхдаа 11.4 оноо дунджилсан. Тэрбээр сагсан бөмбөгөөс гадна дарсны бизнес эрхэлж, өөрийн брэндийн цүнх үйлдвэрлэх болсон билээ.

Леброн Жэймсийн өмсгөл 100 мянган “ногоон”-ы үнэтэй

NBA-ийн зүгээс Леброн Жэймсийн өмсгөлийг дуудлага худалдаанд оруулжээ. Тэд энэ жилийн NBA-ийн шигшээ цувралын эхний тоглолтод өмссөн хар өнгийн “Кливлэнд”-ийн өмсгөлийг дуудлага худалдаанд оруулсан юм. 20 доллароос эхэлсэн түүний өмсгөл 20 хоногийн хугацаанд 100,322 ам.доллар болтлоо өссөн аж. Түүнчлэн энэ тоглолтод багаа хөөдсөн хамгаалагч Жи Ар Смитийн өмсгөлийг ч дуудлага худалдаанд оруулсан бөгөөд эцсийн үнэ нь 23,548 ам.доллароор зарагджээ.

Сонирхуулахад, шигшээ цувралын эхний тоглолтод “Морин цэргүүд” хожих тун дөхсөн. Жорж Хилл торгуулийн шидэлтээ алдаж, улмаар Смит довтолгооны самбар авсан ч өөрөө шидэх нь бүү хэл бөмбөгөө авч зугтааснаар үндсэн цагт тоо тэнцэж, нэмэлт цагт “Голден Стэйт” хожсон билээ.

 

Дуэйт Ховард “Бруклин Нетс”-т очив

“Чарлотт Хорнетс” баг төвийн тоглогч Дуэйт Ховардыг “Бруклин Нетс” рүү явуулахаар боллоо. Түүний оронд орос төвийн тоглогч Тимофей Мозгов, ирээдүйн драфтын хоёрдугаар бүсийн хоёр эрх, бэлэн мөнгө авахаар тохиролцоонд хүрчээ.

“Нетс” энэ жилийн хоёрдугаар бүсийн 45-аар сонгох эрх болон 2021 оны драфтын хоёрдугаар бүсийн эрхээ солилцоонд өгч байгааг лигийн зүгээс зарлав.

Д.Ховардын хувьд энэ жил 23.8 сая ам.долларын цалин аваад чөлөөт агентын тоонд орно. Харин Т.Мозгов 32.7 сая ам.долларын цалинг хоёр жилийн хугацаанд авах юм.

Гэхдээ энэ солилцоог ирэх долдугаар сарын 6-нд л албан ёсоор хийх аж. Өдгөө 32 настай Д.Ховард ийнхүү сүүлийн дөрвөн жилд дөрөв дэх багтаа очиж байна. Тэрбээр сүүлийн гурван жил “Хьюстон Рокитс”, “Атланта Хоукс”, “Чарлотт Хорнетс” харин одоо “Бруклин Нетс”-ийн тоглогч боллоо.

 

NBA-гийн тоглогч Энес Кантерын эцэг 15 жил шоронд хоригдох аюулд оржээ

Туркийн Засгийн газар их сургуулийн багш Мэхмэт Кантерыг баривчилсан талаар онцоллоо. Мэхмэт Кантерын хүү Энес Кантер NBA-ийн “Нью Йорк Никс” багт данстай нэгэн. Засгийн газраас түүнийг баривчилсан шалтгаанаа хууль бус үйл ажиллагаа явуулдаг нэгэн байгууллагын гишүүн гэж дурдсан. Үүгээр ч зогсохгүй хэрвээ буруутай нь шүүхээс тогтоогдвол эцэг Кантер 15 жилийн ял сонсох аюулд оржээ.

Үүнээс өмнө Энес Кантер Туркийн ерөнхийлөгч, дарангуйлагч гэгдээд буй Эрдоганы Засгийн газрыг шүүмжилж, хариуд нь түүний гадаад пасспортыг хүчингүй болгосон удаатай. Өдгөө АНУ-ын иргэн болох хүсэлт өгөөд буй Кантер эцэг, эхтэйгээ ч уулзах боломжгүй болсон юм.

Туркийн Засгийн газар Мэхмэт Кантерыг хууль бус байгууллагын 127 гишүүнтэй холбоо тогтоосон хэрэгт буруутгаж буй. Тэд төрийн эргэлт хийхээр завдсан гэх Фетула Гулений удирддаг Гуленист хөдөлгөөнийг дэмжигчид гэх бөгөөд их сургуульдаа энэ үзлийг зааж байсан гэж багш эрийг буруутгасан байна.

31 сая + Кави Леонардын шийдвэр + Хүн захын хөдөлгөөн

“Сан Антонио Спэрс”-ийн супер од Кави Леонард багаасаа явах хүсэлтээ өгчээ. Нэг хэсэг бүр сураггүй болж, Нью-Йоркт эмчилгээ хийлгэж буй нэрээр багийнхаа дуудлагыг огт авахаа больсон Кавай сүүлийн үед арай зөөлөрч, Грэгг Попович дасгалжуулагчтай уулзалт хийгээд амжсан. Үүнээс үүдэн түүийг багтаа үлдэх нь гэх яриа газар авсан ч өнөөдөр солилцоо хийхийг албан ёсоор шаардсан байна.

Ингэснээр Кавид ашигтай зүйл гэж үгүй. Харин ч бизнес талаасаа тэр том алдагдал хүлээх юм. Хэрвээ “Спэрс”-тэй гэрээ байгуулвал супер макс буюу 5 жилийн 219 сая “ногоон” халааслах боломжтой бол өөр багт очоод гэрээ байгуулвал 5 жилийн 188 сая авна. Ингэснээрээ нийт 31 сая ам.долларыг салхинд хийсгэх юм.

“ESPN”-ий сэтгүүлч, хамгийн түргэн шуурхай, үнэн бодит мэдээлэл түгээдэг гэдгээрээ алдартай сэтгүүлч Адриан Вожнаровскигийн үзэж буйгаар Лос-Анжелесаас гаралтай Сан Диего Стэйтийн бүтээгдэхүүн Леонард төрсөн хотдоо эргэн очих хүсэлтэй аж. “Лэйкерс” болон “Клипперс” хоёул түүнийг сонирхож байгаа ч Нуурынханд очих магадлал илүү өндөр гэж Вожнаровски үзэж буй. Гэхдээ Г.Попович өөрийн тоглогчоо Өрнөдийн багт зарахгүй байх бодлого баримталдаг хүн. Тиймээс өөр хувилбарыг ч бас харах хэрэгтэй.

Кавайгийн Сан Антонио хотыг орхих болсон шалтгаан нь гэр бүлийнхэн нь илүү том хотод очихыг санал болгосон гэх. Үүнээс үүдэн түүнийг “Нью Йорк Никс”-т очно гэх яриа гарсан. Ингэж хардах шалтгаан ч бий. Леонард гэмтлээ эдгээх нэрийн дор Нью Йоркт багагүй хугацааг өнгөрүүлсэн юм.

Леонардыг өөрийн болгох өрсөлдөөнд “Бостон Селтикс” хамгийн хүчтэй нэрлэгдэж буй. Учир нь өнгөрсөн улирлын солилцоо наймааны цонх хаагдахаас өмнө түүнийг багтаа авахаар санал тавьсан нь саяхан ил болсон. Түүнчлэн цалингийн зай, “Спэрс”-ийн сонирхож буй залуу тоглогчид хангалттай байгаа гэх “Филадельфи 76” багийг ч бас мартаж болохгүй.

Юу ч болсон бай, “Спэрс”-ийн хувьд 20 гаруй жилийн дараа багтаа том шинэчлэл хийхээс өөр аргагүй болно.

Ингээд түүнийг авахыг хүсч буй солилцооны тааврыг хүргэе.

Нью-Йорк Никс

Сан Антониод: Энес Кантер, Франк Нтиликина, Лэнс Томас, драфтын 9 дэх эрх, 2020 оны драфтын нэгдүгээр тойргийн эрх

Нью Йоркт: Кави Леонард, Патти Миллс

Хэрвээ цуу яриа үнэн бол тэр Нью Йоркт очихоос татгалзахгүй. Том зах зээлтэй, илүү сүрдэм хотод очих хүсэлтэй гэсэн тул ийм шаардлагыг биелүүлэх цөөн хотын нэг бол Нью Йорк. Кави бэртэлтэй байх хугацаандаа нэг бус удаа Нью Йоркийг зорьсон. Шалтгаан нь энд эмчлүүлж байгаа гэж тайлбарласан ч бас өөр зорилготой байсан гэж таамаглах хүн олон.

Кантер болон Томасын гэрээ ирэх улиралд дуусч, “Спэрс”-т сонголт хийх боломж гарна. Ф.Нтиликина “нутгийн ах” Тони Паркер дээрээ очвол илүү хөгжих бололцоотой. Ингээд драфтын топ 10-т сонголт хийх эрхээс гадна “Никс” шиг бүтэлгүй багийн эхний бүсийн сонголт гэдэг байж болох хувилбар. Хэрвээ тэд Леонардтай урт хугацааны гэрээ байгуулж чадахгүй бол энэ драфтын эрх магадгүй ирээдүйн №1 болохыг ч үгүйсгэхгүй.

Лос Анжелес Клипперс

Сан Антониод: Патрик Беверли, Тобиас Харрис, Уэйсли Жонсон, драфт 12, 13 дахь эрх

Клипперст: Кави Леонард, Патти Миллс

Леонард төрөлх Лос Анжелес хотдоо буцаж очихыг хүсч байгаа нь “Клипперс”-т найдвар төрүүлж буй. Беверли, Харрис, Жонсоны гэрээ удалгүй дуусах бол Патти Миллсийнх 2020-2021 онд төгсөнө. Хэрвээ энэ наймаа болвол Кави Леонардад өгөх цалингаар супер од авчрах боломжтой болно гэсэн үг.

Т.Харрис бас тийм ч муу хувилбар биш. Ирэх долдугаар сард 26 нас хүрэх энэ довтлогч лигт юу хийж чадахаа хэдийнэ харуулчихсан нэгэн. Одоогийнхоо авч буй цалингаас нэг их зөрөхгүйгээр гэрээ шинэчлэх боломжтой.

Кливлэнд Кавальерс

Сан Антониод: Жорж Хилл, Кайл Корвер, Седи Осман, Ларри Нэнс, драфт 8

Кливлэнд: Кави Леонард, Патти Миллс

NBA-гийн цувралд шүүрдүүлсний дараа Кливлэндийн удирдлагуудад Лэброн Жэймсийг авч үлдэх багахан шалтгаан гаргахаар эрэлд гарсан болов уу. Тэд топ 5 тоглогчоос хэн нэгнийг урвуулж, багаа сайжруулвал “Хаан”-ы шийдвэрт нөлөөлөх хүчин зүйл болно гэж найдаж байна.

Лос Анжелес Лэйкерс

Сан Антониод: Лонзо Болл, Луол Денг, Кайл Кузма, 2019, 2021 оны драфтын нэгдүгээр тойргийн эрх

Лос Анжелес: Кави Леонард, Деррик Уайт

Төсөөл дөө. Лэйкерст Лэброн Жэймс, Пол Жорж, Кави Леонард гэсэн их гурвал үүсвэл. Л.Денгийг цалин тэнцвэржүүлэх зорилгоор өгч, Л.Болл, К.Кузма гэсэн ирээдүйтэй тоглогчоо явуулна. К.Леонард явах хүсэлтээ өгснөөр бооцооны сайтуудад Лэйкерс ирэх улиралд аваргална гэж үзэх хүмүүсийн тоо их олон болсон юм.

Бостон Селтикс

Сан Антониод: Кайри Өрвинг, 2019 оны драфтын нэгдүгээр тойргийн эрх

Бостонд: Кави Леонард

Өнгөрсөн солилцооны сүүлийн өдөр Кавигийн төлөө санал хүргүүлсэн Бостоны удирдлагууд энэ удаа ч зүгээр суухгүй гэдэг нь тодорхой болсон юм. Тэдний хувьд К.Өрвингийг өгч, мөн “Сакраменто Кингс”-ээс авах нэгдүгээр тойргийн эрхээ Кавигийн төлөө зарж болох аж. Энэ нь шинэчлэл хүсч буй “Спэрс”-т сайхан боломж. Хаад сайжирч байж болох ч драфтын дээгүүр сонголт хийх боломжтой гэсэн үг.

Филадельфи 76

Сан Антониод: Жеррид Бэйлисс, Маркель Фулц, Дарио Шарич, драфт №10

Филадельфид: Кави Леонард

Филадельфид Кави Леонардын сонирхлыг татах ирээдүй бий. Тэр энэ багт очвол 76 чөлөөт агентаас супер од тоглогч авчирч, ойрын 2-3 жилдээ NBA-д ноёрхох магадлалтай. Энэ наймаанд Ж.Бэйлисс цалин тэнцвэржүүлэх зорилготой бол М.Фулц, Д.Шарич нарын ирээдүйтэй тоглогчийг “Спэрс” сонирхох нь лавтай. Түүнчлэн драфтын топ 10-аар сонголт хийх боломж нээлттэй үлдэнэ.