Даваа гаригт NBA-ийн зүгээс шигшээ цувралыг “Youtube Tv” сувгаар шууд дамжуулна гэж мэдээллээ. Тус хоёр байгууллага олон жилийн гэрээ байгуулсан юм. Үүний үр дүнд энэ жилийн NBA-ийн шигшээ цуврал, WNBA, Хөгжлийн лигийн шигшээ цувралыг шууд дамжуулахаар болжээ.

Цувралын бүх тоглолтыг алгасалгүй дамжуулах юм. Харин шигшээд шалгарсан багийн талбай, ордонд Youtube-ийн лого, баннерыг байршуулах аж.

NBA-ийн финалын цувралыг ABC телевиз уламжлал ёсоор АНУ даяар шууд дамжуулна. Тус суваг 16 дахь жилдээ шигшээ цувралыг үзэгчдэд хүргэж буй.

Youtube TV 2016 оны дөрөвдүгээр сараас олон нийтэд хүрч эхэлсэн. Тус сувгийг АНУ-ын оршин суугчдын 85 хувь нь үздэг тоо баримт бий. Тэгвэл энэ сараас NBATV суваг нэмэгдсэн юм.

Өнгөрсөн бямба гаригт сагсан бөмбөгийн “Алдрын танхим”-д нэрээ үлдээх 13 хүнийг зарлав. Тэдний дунд та бидний тоглолтыг нь үзэж, дэмжиж биширч ирсэн нэрт холбогчид болох Жэйсон Кидд, Стив Нэш, мэргэн бууч Рэй Аллен, М.Жорданы залгамжлагч гэгдэж байсан Грант Хилл, “Филадельфи 76”-ийн Мо.Чеекс нар багтлаа. Түүнчлэн WNBA-ийн төлөөлөгч Тина Томпсон, дасгалжуулагч Лефти Дрьеселл, Чарли Скотт, багийн эзэн явсан Рик Вельц, Род Торн болон сагсан бөмбөгийн ертөнцөд их зүйл хийсэн Дино Раджа, Кэти Смит, Ора Мае Вашингтон нар энэ жилийн “Алдрын танхим”-д багтав.

Өмнөд Африкт төрсөн ч Канадын иргэншилтэй, хөлбөмбөгт авьяастай ч сагсан бөмбөгийн тод од болон гялалзсан эрхэм бол Стив Нэш. Нарлаг “Финикс”-т 10 улирал тоглохдоо улирлын үнэ цэнэтэй тоглогчоор хоёр улирал дараалан тодорсон хүн. Тэрбээр Бүх Америкийн нэгдүгээр багт гурван удаа нэрлэгдэж, өөрөө тоглож байхдаа таван удаа лигийг оновчтой дамжуулалтаар тэргүүлсэн. Бүх цаг үед хамгийн олон оновчтой дамжуулалт өгсөн гурван тоглогчийн нэг. Нийт 10335 оновчтой дамжуулалт өгсөн төдийгүй чөлөөт шидэлт гүйцэтгэсэн үзүүлэлтээр тэргүүлдэг (90.4%) билээ. Дөрвөн улирал 50-40-90 үзүүлэлт хийсэн (шидэлтийн хувь, холын зайн шидэлт болон чөлөөт шидэлтийн хувь үзүүлэлт) цор ганц тоглогч. Ийм үзүүлэлтийг NBA-д ердөө 7 тоглогч л улирлын турш харуулсан түүхтэй. Тэднээс Ларри Бөрд хоёр улирал дээрх амжилтаа давтсан юм. Одоо тоглож буй тоглогчдоос Кевин Дюрант (2013), Стефен Карри (2016) онд үзүүлсэн билээ.

1994-95 оны шилдэг шинэ тоглогчийн шагналыг Ж.Кидд, Г.Хилл нар хамтдаа хүртсэн юм. Тэр цагаас хойш Ж.Кидд лигийн шилдэг хамгаалагч нарын нэг болж, бүх оддын тоглолтод 10 удаа нэрлэгдэж, 2011 онд “Даллас Маверикс”-ийн хамт аваргын бөгж зүүсэн. Түүнчлэн Бүх Америкийн нэгдүгээр багт таван удаа, хамгаалалтын нэгдүгээр багт дөрвөн удаа нэрлэгдсэн. Домогт Жон Стоктон байгаагүй бол Ж.Кидд бөмбөг таслалт (2,684), оновчтой дамжуулалтаар (12,091) NBA-г тэргүүлэх байв.

Ж.Кидд 19 улирлын турш 107 трипл дабл гүйцэтгэсэн амжилттай их спортоо орхисон бөгөөд энэ нь Оскар Робертсон (181), “Шидэт” Жонсон (138) нарын ард орох үзүүлэлт болсон юм. Түүнчлэн замналынхаа турш 1391 тоглолтод оролцох боломжтойгоос 1350-д нь тоглосон нэгэн. Багадаа 8 оновчтой дамжуулалт, 6 самбараас дунджилсан үзүүлэлтийг 15 улирал харуулсан билээ.

Г.Хилл, Ж.Кидд нарт төстэй зүйл бий. Тэд 1995 онд шилдэг шинэ тоглогчийн шагналаа хувааж, хоёул 19 улирал тоглосны эцэст хоёр хоногийн зайтай их спортоо орхиж, бас нэг онд “Алдрын танхим”-д мөнхөрч буй.

Г.Хилл хэзээ ч холбогчоор тоглож байгаагүй. Гэхдээ тэр бүх оддын тоглолтод 7 удаа нэрлэгдэж, 1997 онд Бүх Америкийн нэгдүгээр багт, дөрвөн удаа хоёрдугаар багт багтсан удаатай. Лигт элсэхээсээ өмнө Дюкийн их сургуулийг хоёр удаа оюутны лигийн аварга болгосон.

Ж.Киддээс ялгаатай нь Г.Хилл ердөө 6 жилийн хугацаанд дээрх амжилтыг үзүүлсэн гэхэд болно. 2001 оноос хүнд гэмтсэнээс хойш тэр хуучин амжилтаа дахиж давтаж чадаагүй. М.Жорданы залгамжлагч хэмээн түүнийг үнэлдэг байсан ч ганц ч аваргын цомгүй замналаа дуусгасан түүхтэй.

NBA-ийн хоёр удаагийн аварга, Бүх Оддын тоглолтод 10 удаа тоглосон Рэй Аллен энэ жилийн “Алдрын танхим”-д багтав. Холын зайн шидэлтээрээ рекорд тогтоож (2,973), хамгийн багадаа 1200 чөлөөт шидэлт гүйцэтгэсэн тамирчдаас 89.4 хувиар зургадугаарт бичигддэг Аллен 1995 онд шилдэг эрэгтэй сагсан бөмбөгийн тамирчнаар нэрлэгдэж, 2000 онд олимпийн аварга болсон билээ. Гурван багтаа дээд амжилт эзэмшдэг. Тодруулбал, “Милоуки”д байхдаа 400 тоглолт дараалан тоглож, холын зайнаас 1,051 удаа оруулж, нэг улиралд 229 удаа гурваас оруулсан бол “Сеатл Суперсоникс”-т байхдаа нэг улиралд 269 удаа холын зайн шидэлтээ гүйцэтгэж, хожим “Бостон”-д нэг улирлын турш 95.2 хувьтай чөлөөт шидэлтээ оруулж, 72 дараалан чөлөөт шидэлтээ алдаагүй юм.

2007 оны нэгдүгээр сарын 5-нд “Кливлэнд” баг “Милуоки”-той учраа таарахад Дрю Гүүдэн маш сайн тоглолт үзүүлэв. Тэрбээр хоёрдугаар хагаст 19 оноо авч, тоглолтыг 30 оноо, 15 самбартай дуусгажээ. Энэ тоглолтод Леброн Жэймс ердөө найман оноо авсан юм. Үүнээс хойш 11 жил, 2 сар, 25 хоногийн турш “Хаан” Жэймсээс бид ийм зүйл харсангүй. Тэрбээр 868 тоглолтын турш багадаа 10 ба түүнээс дээш оноо авснаар сагсан бөмбөгийн бурхан хэмээх домогт Майкл Жорданы 866 тоглолт дараалан ийм амжилт үзүүлсэн дээд амжилтыг шинэчлэв. Түүний энэ гайхалтай үзүүлэлтийн талаарх 10 сонирхолтой баримтыг хүргэе.

867: Леброн Жэймсийн хувьд 867 тоглолт дараалан 10 ба түүнээс дээш оноо авах нь амархан байж болох юм. Гэхдээ бусад тоглогчийн хувьд тийм ч хялбар зүйл биш. Түүний энэ амжилт бүх оддын тоглолтод сонгогдсон доорх 15 тоглогчтой тэнцүү гээд бодвол. ЛаМаркус Олдриж (84), Яннис Антетоконмпо (82), Карл Энтони Тоунс (75), Стефен Карри (74), Горан Драгич (60), Кайри Өрвинг (58), Крис Пол (57), Клэй Томпсон (56), Жон Уолл (55), Пол Жорж (55), Энтони Дэвис (52), Кемба Уолкер (48), Жимми Батлер (44), Кристапс Порзингис (34), Ол Хорфорд (33).

610: Түүний ард 257 тоглолт дараалан 10 ба түүнээс дээш оноо авсан Жэймс Харден нэхэж буй. Гэхдээ Леброн араас нь нэхэж яваа 7 тоглогчийн нийлбэрээс ч илүү амжилтыг хэдийнэ үзүүлчихсэн яваа.

Уг жагсаалтыг сонирхвол:

Леброн Жэймс 867

Жэймс Харден 257

ДеМаркус Коузинс 162

Дамиан Лиллард 133

Яннис Антетоконмпо 82

Виктор Оладипо 72

Кевин Дюрант 64

Луи Уильямс 58

50: Тэрбээр замналынхаа турш 11 удаа 50 ба түүнээс дээш оноог нэг тоглолтод авч байв. Харин ердөө 8 удаа ганц оронтой оноо авсан юм. Ийм амжилтыг Майкл Жордан, Уилт Чаймбэрлэн нар л үзүүлжээ.

99.3: Леброн замналынхаа турш нийт тоглолтынхоо 99.3 хувьд нь 10-аас дээш оноо авсан. Түүний ард Кевин Дюрант 98.8 хувиар бичигддэг.

1: Домогт Майкл Жордан “Чикаго Буллз”-ын өмсгөлтэй 1109 тоглолтоос ердөө нэг удаа 10-аас бага оноо авсан гэдэг. 1986 оны гуравдугаар сард баг нь “Кливлэнд”-д хожигдоход Жордан 8 оноо авчээ. Үүнээс хойш Майкл 2001 оны арванхоёрдугаар сард “Вашингтон Визардс”-ын бүрэлдэхүүнд байхдаа “Индиана”-гийн эсрэг ердөө 6 оноо авч байв. Энэ үед Жордан 38 настай байлаа.

40: Майкл Жордан 866 тоглолт дараалан 10-аас дээш оноо авахдаа 159 тоглолтод 40-өөс дээш оноо авчээ. Харин 20 оноо авсан тоглолтын тоо нь 78-д хүрч байв. Жэймс 867 тоглолтын турш 44 удаа 40 ба түүнээс дээш оноо авсан билээ.

71: NBA-ийн Алдрын танхимд бүртгэгдсэн 71 тоглогч замналынхаа турш 867 тоглолтод тоглож үзээгүй байдаг. Үүнд алдарт Жорж Гервин, Боб Петтит, Элжин Бэйлор, Боб МкАдоо, Пете Маравич нар багтана.

 90: Одоо лигт тоглож буй тоглогчдоос 90 хувь нь Жэймсийг хамгийн сүүлд 10-аас бага оноо авах үед лигт тоглож байсангүй. 2007 онд Лебронтой хамт тоглож байсан багийн бүрэлдэхүүнээс нэг ч тоглогч лигт үлдээгүй байна.

1,029: Хэрвээ Леброн 2007 онд дээрх тоглолтод найман оноо аваагүй бол энэ цуврал хэдийнэ 1000 давах байсан аж. Үүнээс өмнө 161 тоглолт дараалан 10 ба түүнээс дээш оноо аваад байжээ.

2: Леброн хасагдах шатны хоёр л тоглолтод 10 ба түүнээс бага оноо авчээ. Тэрбээр 2014 оны Дорнод бүсийн аварга шалгаруулах цуврал тав дахь тоглолт “Индиана”-гийн эсрэг 7 оноо авсан бол 2011 оны NBA-ийн шигшээ цувралын дөрөв дэх тоглолт “Даллас Маверикс”-ийн эсрэг 8 оноо авсан удаатай. Энэ тоглолтын шийдвэрлэх дөрөвдүгээр үед Жэймс нэг ч оноо аваагүй, ердөө ганц л шидэлт гүйцэтгэсэн билээ.

NBA-ийн залуу од, “Филадельфи 76” багийн лидер Бэн Симмонс болон дуучин Тинаше нар хоорондоо болздог гэсэн цуурхал үнэн болохыг хосууд баталжээ. Тэднийг хэдэн долоо хоногийн өмнөөс л хоорондоо зүгээргүй хэмээн Америкийн хэвлэлүүд “хардаж”, энэ хугацаанд хосууд ч үнэнийг бусдаас нууцалсан юм.

Тинаше Йоргенсон Качингве энэ жил 25 настай. Найз залуугаасаа дөрвөн насаар эгч Тинаше 2007 оноос хойш уран бүтээлээ туурвих болжээ. Түүний эцэг нь Зимбабве улсаас АНУ руу цагаачилсан бол эх ннь Дани, Норвеги, Ирландын эрлийз багш эмэгтэй гэнэ. Шона хэлээр бол Тинаше гэдэг нь Бурхан бидэнтэй хамт гэсэн үг гэнэ.

Энэ жилийн драфтын тэргүүн Маркелле Фультц эргэж ирлээ. Улирлын эхний дөрвөн тоглолтод оролцсон ч мөрний гэмтлийн улмаас 68 тоглолт өнжсөн М.Фультц өнөөдөр “Денвер Наггетс”-тай хийх тоглолтод эргэн ирж, хөгжөөн дэмжигчдэд гэнэтийн бэлэг барьсан юм.

М.Фультцын эзгүйд баг нь амжилттай тоглож, 2012 оноос хойш анх удаагаа хасагдах шатанд өрсөлдөх эрхээ авсан билээ.

Драфтын сонгон шалгаруулалтыг тэргүүлсэн М.Фультцын мөрний гэмтэл өнгөрсөн арванхоёрдугаар сард бүрэн эдгэрсэн гэж багийн албаныхан мэдээлж байв. Улмаар энэ оны нэгдүгээр сарын 2-ноос эргэн ирэхээр бэлтгэлдээ хамрагдаж эхэлсэн юм. Гэхдээ баг нь түүнийг тоглуулах гэж нэг их яарахгүй байсаар өнөөдөр минутын хязгаартай талбайд гаргахаар болжээ.

“Голден Стэйт Уорриорс”-ын дасгалжуулагч Стив Керр багийн лидер Стефен Карригийн гэмтлийн талаар сэтгүүлчдэд ам нээжээ. Өнгөрсөн бямба гаригт нарийн шинжилгээнд орсныхоо дараа шөрмөсний гэмтлийн улмаас дор хаяж гурван долоо хоног тоглохгүй болсон Карри гурван долоо хоногийн дараа дахин эмчийн үзлэгт хамрагдаж, хэзээ эргэж ирэх нь тодорхой болно. Тэгвэл С.Керр түүнийг хасагдах шатны эхний раундад тоглохгүй гэж ярьжээ.

С.Керрийн ингэж ярьсныг С.Карригаас тодруулахад, “Дасгалжуулагч буруу таамаглаж байна. Хасагдах шатнаас өмнө бэлэн болно гэдэгтээ итгэлтэй байгаа” гэсэн юм.

С.Карри ирэх сарын 14-нд дахин шинжилгээнд орно. Харин энэ өдөр нь хасагдах шатны эхний үе нээлтээ хийх юм. С.Керрийн хувьд хоёр жилийн өмнөх алдаагаа давтахыг хүсэхгүй байгаа бололтой. Тэр үед С.Карри хасагдах шатанд шөрмөсний гэмтлийн улмаас хоёр долоо хоног талбайд тоглоогүй. С.Карри буцаж ирсэн ч өөрийнхөө тоглолтыг гаргаж чадаагүй юм. Тэр улиралд 30.1 оноо дунджилж, 50.4 хувийн оновчтой шидэлтээ гүйцэтгэж байсан бол шигшээ тоглолтод “Кливлэнд”-ийн эсрэг 22.6 оноо дунджилж, 40.3 хувьтай довтолсон билээ.

“Голден Стэйт Уорриорс” багийн лидер Стефен Карри баруун шагайны гэмтлийн улмаас зургаан тоглолт өнжсөн бөгөөд өнөөдөр “Атланта Хоукс” багийн эсрэг тоглолтод эргэн ирсэн ч тоглолтын гуравдугаар үед зүүн өвдгөндөө бэртэж, талбайг орхисон юм.

Багийн зүгээс түүнийг шөрмөсөндөө гэмтэл авсныг тодруулж, маргааш буюу орон нутгийн цагаар бямба гаригт шинжилгээнд оруулахаар болжээ. Энэ үер гэмтэл нь хэр ноцтой болохыг тогтоох юм.

Бичлэгнээс үзэхэд багийнх нь тоглогч Жавайл МкГее эсрэг багийн довтолгоог зогсоох оролдлого хийгээд унахдаа Карригийн зүүн хөлийг гэмтээсэн байна.

Энэ жил 30 настай С.Карри хэдийнэ 21 тоглолт өнжөөд буй. Үүний ихэнх нь шагайны бэртэлтэй холбоотой байлаа. “Уорриорс”-ын гол довтлогч Кевин Дюрант түүний эзгүй байсан үеийг “Бид түүнгүйгээр талбайд тоглох нь эрс өөр байдаг. Тэр бол энэ багийн систем. Стив Керр дасгалжуулагчийн арга барилын гол хүн бол Карри” гэж ярьсан удаа бий.

С.Карригийн бэртлийн нарийвчилсан онош одоогоор тодроогүй. Гэхдээ бэртэл хэр ноцтой эсэхээс шалтгаалж бүрэн эдгэрэхэд дунджаар зургаан долоо хоног шаардлагатай аж. С.Карри өөрөө талбайгаас гарч явсан учир үүнээс ч бага хугацаанд эдгэрэхийг үгүйсгэхгүй юм. Мэргэжлийн тамирчдын дийлэнх нь 6-8 долоо хоног чөлөө авдаг билээ.

Кемба Уолкер тэргүүтэй “Чарлотт Хорнетс” баг NBA-ийн хамгийн сул баг болоод буй “Мэмфис Гриззлис”-ийн залууст хичээл зааж, 140:79-өөр буулган авчээ. Тэд өрсөлдөгчөө 61 онооны давуу ялсан нь багийнх нь дээд амжилт юм. Ингэснээр 1998 оноос хойш өрсөлдөгчөө 60 ба түүнээс дээш оноогоор хожсон анхны баг болов. Тэгвэл лигийн түүхэнд өрсөлдөгчөө ийм хол тоогоор хожсон зургаа дахь тохиолдол болжээ.

“Хорнетс”-ийн гол тоглогч Кемба Уолкер ердөө гурван үед 46 оноо авч, 10 удаа холын зайн шидэлтээ оновчтой болгосноор хувийн дээд амжилтаа ахиулав. К.Уолкер ердөө 28 минут талбайд тоглож, 45-аас дээш оноо авсан анхны тоглогч болж, түүхэнд мөнхөрчээ. Түүнчлэн нэг тоглолтод холын зайнаас 10 удаа оруулж, чөлөөт шидэлтээ 10 ба түүнээс дээш оновчтой болгосон гурав дахь тоглогч болсон юм.

Харин “Мэмфис”-ийн хувьд энэ улиралд 19 ялж, 53 хожигдсон үзүүлэлтээр сүүлийн байрт бичигдэж буй. Тэд Бүх оддын тоглолтын дараа 23 тоглолтод ердөө ганцхан хожил авчээ.

“Кливлэнд Кавальерс” багийнхан барцадтай байна. Ахлах дасгалжуулагч Тайрон Лю нь өвчний улмаас ажлаасаа чөлөө авсан бол Тристан Томпсон, Родни Хүүд, Ларри Нэнс, Седи Осман зэрэг тоглогчид нь бэртлийн улмаас талбайд гарахгүй байгаа билээ. Тэгвэл ахмад хамгаалагч Кайл Корверийн төрсөн дүү нь өөд болсон гэнэ.

Кайлын төрсөн дүү Кирк Корвер дөнгөж 27 насандаа бурхан болов. Өнгөрсөн долоо хоногт Корвер дүүгийнхээ хүнд өвдсөнийг дуулаад багийн бэлтгэлээс чөлөө авч, Айова муж руу дүүгээ эргэхээр очсон юм. Удалгүй буцан ирж, даваа гаригт “Милоуки”-гийн эсрэг тоглолтод 12 оноо авсан юм.

Коллежийн тоглогч Кайл болон түүний төрсөн дүү 11 настай Кирк нар.

Кирк Корвер Пелла ахлах сургуульд сагсан бөмбөг тоглож байсан билээ. Тэрбээр бүх америкийн гуравдугаар багт нэрлэгдэж байсан бөгөөд нэг тоглолтод дунджаар 14.4 оноо, 9.2 самбар дунджилж байв. Түүнчлэн Миссури их сургуулийн багт гурван улирал тоглож, нийт 597 оноо авч байв.

“Оклахома Сити Тандер”-ын холбогч Рассел Уэйстбрук өнөөдөр “Атланта Хоукс”-ын эсрэг 32 оноо, 12 самбар, 12 оновчтой дамжуулалт гүйцэтгэж, баг нь өрсөлдөгчөө 119:107-гоор буулган авчээ. Р.Уэйстбрук замналынхаа турш 100 дахь трипл даблаа хийсэн бөгөөд ийм үзүүлэлтэд хүрсэн лигийн түүхэнд дөрвөн тоглогчийн нэг боллоо. Түүнээс өмнө алдарт Оскар Робертсон (181), “Шидэт” Жонсон (138), Жэйсон Кидд (107) нар ийм амжилтад хүрчээ.

Р.Уэйстбрук ийнхүү сүүлийн гурван тоглолтод дараалан трипл дабл гүйцэтгэж, энэ улиралд 21 удаа үзүүлсэн амжилтаараа бүх тоглогчийг тэргүүлж буй. Түүний араас Леброн Жэймс 14 трипл дабл гүйцэтгэсэн амжилтаар удаалж байна. Түүний ачаар баг нь дөрөв дараалсан ялалт байгуулж, нийт 41 хожил, 29 ялагдалтай болов. Уг үзүүлэлтээр урдаа яваа “Портлэнд”-ээс ердөө ганц ялалтын зөрүүгээр нэхэж байгаа ч баруун бүсийн наймдугаарт жагсаж байгаа “Юта Жазз”-аас хоёр ялалтаар илүү байгаа аж.

Өнөөдөр 30 нас хүрсэн Стивен Карри шагайны гэмтлийн улмаас долоо хоног талбайд гарахгүй аж. Гэхдээ энэ бол байж болох хамгийн бага хугацаа бөгөөд энэ сарын 20-нд дахин эмчийн үзлэгээр орсны дараа хэзээ тоглох нь тодорхой болно. Карри өнгөрсөн арванхоёрдугаар сараас шагайны асуудалтай тулгарсан. Улмаар Олон улсын эмэгтэйчүүдийн баярын өдрөөр “Сан Антонио Спэрс”-ийн эсрэг тоглохдоо бэртлээ сэдрээсэн билээ.

“Бостон Селтикс”-т байхдаа олны танил болж, “Детройт Пистонс” руу явсан ч солилцоогоор “Лос Анжелес Клипперс”-ийн тоглогч болсон хамгаалагч Эйври Брэдлигийн улирал дууссан гэнэ. Булчингийн гэмтлийн улмаас олигтой тоглохгүй байсан Э.Брэдли хагалгаанд орох болсноор 6-8 долоо хоног жагсаалаас гарчээ. Түүний эзгүйд Луи Уильямс гараанд гарах гэнэ. Ирэх зун чөлөөт тоглогч болох боломжтой Брэдли гэмтлийн асуудал нь шинэ гэрээ байгуулахад бэрхшээл үүсгэхгүй гэдэгт найдаж байгаа юм.

https://www.youtube.com/watch?v=NLE3fpT5r-8

“Бруклин Нетс”-ийн хамгаалагч Де’Анжело Расселл “Торонто Рэпторс”-ийн эсрэг зөвхөн нэгдүгээр үед холын зайнаас найм шидэж, долоог нь оруулжээ. Эхний үед 24 оноо авсан Расселл үлдсэн хугацаанд найман оноо халаасалж, 32 оноотой тоглолтыг дуусгасан. Гэхдээ Расселл энэ улиралд нэг үед хамгийн олон холын зайн шидэлтээ оновчтой болгосон тоглогчоор тодорч, харин бүх цаг үед тавдугаарт бичигдэх болсон байна.