Author: Д. Бямбажаргал

Спорт сонирхогч Сайтын гэрэл зурагчин

Хөвгүүд Азийн АШТ-ээс хүрэл медаль хүртлээ

3х3 сагсан бөмбөгийн U18 насны ангилалд манай өсвөрийн шигшээ баг хүрэл медаль хүртлээ. Дөрөв дэх удаагаа зохион байгуулагдсан тус тэмцээнд Монголын хөвгүүд болон охидын баг анх удаа хүч сорьсон юм.

Хөвгүүдийн баг урьдчилсан  шатанд Иран, Хонконг, Узбекистан, Гуамын шигшээг хожиж, үндсэн тэмцээндээ оролцох эрх авсан. Улмаар хэсгийн шатанд Йордан, Индонезийг тус бүр хожоод шөвгийн наймд тунаж үлдсэн аж.

Хасагдах шатанд Кыргызийн багийг 21:14-өөр буулган авсан ч энэ тэмцээнд түрүүлсэн Шинэ Зеландын багт 21:14-өөр ялагдсан.

Ингээд хүрэл медалийн төлөө энэ тэмцээнээс алт, хүрэл медаль хүртэж байсан Катарын багтай өрсөлдөж, 21:12-оор илт давамгайлснаар анх удаа өсвөрийн Азийн АШТ-ээс хүрэл медаль хүртлээ. Харин Шинэ Зеландын хөвгүүд шигшээд өнгөрсөн жилийн тус тэмцээний аварга БНХАУ-ын багийг 22:15-аар буулган авч, анх удаа түрүүллээ.

Тус тэмцээний шилдэг гурван тоглогчийн нэгээр Г.Ган-Эрдэнэ нэрлэгдсэн юм. Монголын багийн бүрэлдэхүүнд Б.Алтангэрэл, Ч.Ихбаяр, Г.Ган-Эрдэнэ, М.Өлзий-Орших нар багтсан билээ.

Манай тамирчдын тэмцээн дуусах болоогүй. Ирэх аравдугаар сард Аргентинийн Буэнес Айрес хотод Залуучуудын олимп болох бөгөөд энэ тэмцээнд 3х3-ын хөвгүүд оролцох юм.

Энтони Дэвис шинэ агенттай болно

NBA-гийн од Энтони Дэвис өөрийн бизнесийн төлөөлөгч Тад Фоучертай гэрээгээ цуцаллаа. Эх сурвалжийн мэдээлснээр Э.Дэвис шинэ агенттай болохоор төлөвлөж байгаа бөгөөд энэ жагсаалтыг “Klutch Sports”-ын Рич Пол тэргүүлж байна. Т.Фоучер бол Рассел Уэйстбрукийн төлөөлөгч гэдгээрээ олонд танигдсан хүн. Харин түүнийг Р.Полтой харьцуулахад ялгаатай. Учир нь Р.Пол төлөөлөгчдийн ертөнцөд маш нэр хүндтэй нэгэн. Түүний хамгийн том үйчлүүлэгч нь Лэброн Жэймс. Мөн Жон Уолл, Эрик Бледсо, Бэн Симмонс нарын төлөөлөгч юм.

Р.Пол сагсан бөмбөгийн ертөнцөд нөлөөтэй нэгэн. Л.Жэймсийг “Кливлэнд” руу буцах сэдлийг өгсөн нууц ноёнтон хэмээгддэг. Тэрбээр 2012 онд өөрийн агентын компаниа байгуулж, тэр цагаас хойш энэ ертөнцөд нэр хүндтэй, бас хурдацтай өсч яваа залуу агент юм.

Харин Э.Дэвисийн хувьд 2020 оны зун чөлөөт агент болох шинжтэй. Өдгөө 25 настай төвийн тоглогч 2018-19 оны улиралд 25.4 сая ам.долларын цалин авах бол 2019-20 онд 27 саяыг, дараа жил нь 28.7 сая “ногоон” авах гэрээтэй ч сүүлийн жилээ өөрөө шийдэх боломжтой юм.

 

Японы дөрвөн тоглогч эрхээ нэг жилээр хасууллаа

Ёс зүйн алдаа гаргаж, Азийн наадмаас хөөгдсөн Японы эрэгтэй сагсан бөмбөгийн багийн гишүүд болох Такүя Хасимото, Кэйта Имамүра, Юяа Нагаяоши, Такүма Сато нарыг гэртээ ирсэн даруйд Японы сагсан бөмбөгийн холбооны ерөнхийлөгч Юко Мицүяа угтан авч, бүтэн жилээр тэмцээнд оролцохыг нь хориглосон тушаал буулгав. Эдгээр тамирчид бэлтгэлд хамрагдаж болох хэдий ч албан ёсны тэмцээнд оролцох эрхгүй аж.

Түүнчлэн тамирчдын гурван сарын цалингийн 10 хувийг суутгахаа Ю.Мицүяа мэдэгджээ.

Японы сагсан бөмбөгийн холбооны удирдах зөвлөлийн гишүүдийн хурал зохион байгуулж, хэрэг хийсэн гэх дөрвөн тоглогчоос тайлбар авсан байна. Тэд тоглолтын дараа гадуур зугаалж, наргиж цэнгэсэн, нутгийн биеэ үнэлэгч эмэгтэйчүүдтэй зугаацсан гэдгээ хүлээн зөвшөөрч, олон нийтээс уучлалт хүссэн юм.

Тоглогчид өнгөрсөн наймдугаар сарын 16-нд Катарыг 82:71-ээр хожсоны дараа ийм хэрэг үйлджээ. Шигшээ багийн зүгээс тэдний гэртээ харих зардлыг өөрсдөөр нь гаргаж, улсын зардлыг хэмнэж байгаагаа мэдэгдсэн юм.

Япончууд үлдсэн найман тоглогчтой тэмцээнээ цааш үргэлжлүүлсэн бөгөөд шөвгийн наймд Ираны багт 93:67-гоор хожигдсон.

Эмэгтэй сагсчид Тайландын багт хоёр дахиа хожигдлоо

Азийн наадмын сагсан бөмбөгийн хасагдах шатанд шалгарсан Монголын эмэгтэй баг өнөөдөр Тайландын эсрэг тоглов. Хожсон нь тавдугаар байрын төлөө үзэлцэх тус тоглолтод 80:51-ээр Тайландын баг илүүрхлээ.

Монголын шигшээ багаас М.Булбул 11, Б.Өнөрзаяа 10, А.Хулан 10 оноо авч тэргүүлсэн бол Тайландаас Пенпан Ютанан 14, Супира Кланбут 14, Канокван Пражуапсук 14 оноо авчээ.

Хэдийгээр хожигдсон ч манай тамирчдын хувьд тэмцээн дуусах болоогүй. Одоо долдугаар байрны төлөө Казахстан – Индонезийн хожсонтой нь ирэх наймдугаар сарын 31-нд 11:00 цагаас өрсөлдөх юм.

3х3-ын охид, залуус хэсгээсээ гарсангүй

23 хүртэлх насны 3х3 сагсан бөмбөгийн төрлөөр өрсөлдсөн манай залуус хэсгээсээ гарсангүй. Залуучуудын шигшээ хэсэгтээ БНСУ, Тайвань, Киргиз, Бангладештай нэг хэсэгт багтсан. Эхний тоглолтоо Тайваньд 15:19-өөр дийлдсэн манай залуус Киргиз болон Бангладешийг дараалан хожсон ч хэсгийн сүүлийн тоглолтод БНСУ-ын залууст 21:9-өөр хожигдож, дөрөв тоглохдоо 15.8 оноо дунджилсан үзүүлэлттэй хоцорлоо. Энэ хэсгээс БНСУ-ын баг нэг ч хожигдоогүй бол Тайванийн шигшээ баг нэг ялагдсан үзүүлэлтээр хасагдах шатанд орсон.

Хасагдах шатанд БНХАУ – Катар, БНСУ – Казахстан, Иран – Тайвань, Япон – Тайландтай таарлаа.

Эмэгтэй 3х3-ын баг хэсэгтээ Япон, Тайваньд хожигдоод Балбыг ялсан үзүүлэлтээр мөн л хасагдах шатанд шалгарсангүй.

Сагсан бөмбөгийн эрэгтэй шигшээ баг хасагдлаа

Азийн наадмын сагсан бөмбөгийн эрэгтэй шигшээ баг талбайн эзэн Индонезтой шийдвэрлэх тоглолт хийсэн ч харамсалтай нь, дараагийн шатанд шалгарахад хоёр оноо дутлаа. Энэ тоглолтод долоон оноогоор илүү хожсон тохиолдолд Монголын шигшээ баг дараагийн шатанд шалгарах байв. Гэвч эцсийн үр дүн 74:69-өөр өндөрлөсөн тул бид гэртээ харих болж, Индонезийн шишээ баг БНХАУ-ын багтай дараагийн шатанд өрсөлдөх боллоо.

Тоглолтын дундуур манай сагсчид санаачилгыг гартаа авч, 18 оноогоор хол тасарсан ч төгсгөлд тааруу тоглолт үзүүлээд таван оноогоор хожсон нь хангалтгүй үзүүлэлт болов.

Эхний хагаст индонезчууд дөрвөн оноогоор илүүрхсэн ч хоёрдугаар үед манай тамирчид 15 оноогоор хожсон юм. Ялангуяа Т.Санчир хоёр удаа дараалан гурваас амжилттай гүйцэтгэж, баг нь 10 оноо дараалан авч, оноогоор холдож эхэлсэн. Индонезчууд оноог ойртуулахыг хичээсэн ч энэ үеийн төгсгөл манайхны давамгайллаар өндөрлөсөн юм.

Гуравдугаар үед Монголын баг онооны тэргүүллээ улам холдуулж, 55:37 буюу 18 оноогоор тасарч эхэлсэн. Гэхдээ үеийн төгсгөлөө хийж чадсангүй. Б.Билгүүн гуравдугаар үе дуусах дөхөхөд дараалан хоёр алдаа хийж, нийт алдаа тав болсноор сэлгээнд суулаа. Түүний эзгүйд багийн хамгаалалт нурж, довтолгоо ч эзгүйрч эхэлсэн. Үр дүнд нь олон онооны зөрүүгээ хадгалж чадаагүй.

Б.Билгүүний хамгаалалт байхгүй болсноор Индонезийн америк легионер Андре Жонсонг зогсоох тоглогч манайд өөр байсангүй. Тэрбээр багтаа тун чухал дөрвөн оноог авч, багаа дараагийн шатанд шалгарахад онцгой үүрэг гүйцэтгэв. Дөрөвдүгээр үеийн төгсгөлд Т.Санчираар гурваас шидүүлсэн. Хэрвээ энэ шидэлт орсон бол Т.Санчир баатар болж, Монголын баг дараагийн шатанд шалгарах байв. Гэвч гурван хамгаалагчийн эсрэг зүтгэж шидсэн нь түүний шидэлт дутаж, довтолгооны самбараас авсан ч Б.Болдбаатар гурваас шидэхийн оронд хоёр оноо авсан. Цаг дуусахад 2.2 секунд үлдсэн үед Б.Болдбаатар ийм шийдвэр гаргасан нь багаа хөөдсөн явдал болов. Уг нь манайд хоёр бус гурван оноо л хэрэгтэй байсан юм.

Шийдвэрлэх тоглолтод Т.Санчир 28 оноо+10 самбар, 17 оноо+6 самбараар багтаа тусалж, эсрэг багаас гурван тоглогч 10-аас дээш оноо авсан үзүүлэлттэй дууслаа.

 

Эмэгтэй сагсан бөмбөгчид хасагдах шатанд Тайванийн багтай өрсөлдөнө

Сагсан бөмбөгийн эмэгтэй шигшээ баг хэсгийн сүүлийн тоглолтоо Тайландын эсрэг хийж, 62:39-өөр ялагдлаа. Ингэснээр Монголын эмэгтэй шигшээ баг хэсэгтээ дөрөв тоглоод нэг хожиж, гурав ялагдсан үзүүлэлттэй болов.

Энэ тоглолтод манайхаас М.Булбул 11 оноо+8 самбар, Б.Өнөрзаяа 10 оноо+5 бөмбөг тасалсан ч бусад нь хангалтгүй тоглоллоо. Багаараа холын зайнаас 38 шидэж, тавыг л оруулжээ.

Тайландаас Супира Кланбут 11 оноо+9 самбар, Тидапорн Майхом 11 оноо+8 самбар авчээ.

Гэхдээ манай тамирчдын тэмцээн дуусаагүй. Тэд хасагдах шатанд Тайванийн багтай өрсөлдөх юм.

Тайванийн шигшээ баг энэ удаагийн тэмцээнд дөрөв дараалан хожиж, хэсгээ тэргүүлсэн хүчтэй баг.

Тайанчууд хэсэгтээ Казахстаныг 72:42, Солонгосын шигшээ багийг 87:85, Энэтхэгийг 84:61, Индонезийг 115:51-ээр илүүрхсэн аж. “А” хэсгийн сүүлийн тоглолт Энэтхэг – Индонезийн тоглолтын дараа хасагдах шатанд өрсөлдөх багууд эцсийн байдлаар тодорно.

 

Японы сагсан бөмбөгийн холбоо дөрвөн тоглогчоо хөөжээ

Азийн наадамд өрсөлдөж буй Японы сагсан бөмбөгийн эрэгтэй шигшээ баг дөрвөн тоглогчоо хөөж, гэрт нь буцаасан байна. Энэ талаар өнөөдөр хэвлэлд мэдэгдсэн бөгөөд Такүяа Хасимото, Кэйта Имамүра, Юяа Нагаёоши болон Такүма Сато нарыг орон нутгийн биеэ үнэлэгчтэй нэг оройг хамт өнгөрүүлсэн хэмээн буруутгасан байна.

Японы шигшээ баг хэсгийн шатанд Катарыг 82:71-ээр буулган авсны дараа дээрх явдал болсон бөгөөд хийсэн хэрэгтээ гэмшиж байгаагаа тоглогчид хүлээжээ.

Эх сурвалжийн мэдээлснээр тоглогчид шар айраг уухаар орон нутгийн бааранд очсон бөгөөд тэр үедээ эмэгтэйчүүдтэй танилцаж, “тохиролцсон” аж.

“Бидэнд заавал дагах ёстой ёс зүй гэж байдаг. Эдгээр дөрвөн тамирчин уг журмыг зөрчсөн. Тамирчид зөвхөн спортын талбарт төдийгүй олон нийтийн газарт ч биеэ зөв зохистой авч явах шаардлагатай” гэж Японы шигшээ багийг даргалж буй Ясүхиро Ямашита шийдвэрээ тайлбарласан байна.

Японы олимпийн хороо тэмцээнээс өмнө буцаж ирэх дөрвөн тоглогчийг зардлаа өөрсдөө гаргах ёстой хэмээн мэдэгдсэн аж.

Одоо Японы шигшээ баг ердөө найман тоглогчтой үлдсэн. Хэсгийн дараагийн тоглолтоо Хонконгийн багтай хийх юм. Япончууд Азийн наадамд тамирчдаа тэмцээнээс нь өмнө буцаасан түүх ганц энэ биш юм. Дөрвөн жилийн өмнө тус улсын усанд сэлэгч Нао Томита БНСУ-ын сэтгүүлчийн гар утсыг хулгайлсан хэрэгт буруутгагдаад гэртээ харьсан билээ. Үр дүнд нь Нао Томита ажлаасаа халагдаж, Японы усанд сэлэлтийн холбоо түүнийг 980 ам.доллароор торгоод, 18 сар тэмцээнд оролцохыг нь хориглосон юм.

Эмэгтэй сагсан бөмбөгчид Японы багт хожигдов

Хэсгийн эхний тоглолтод Хонконгийг 83:79-өөр хожиж, гараагаа амжилттай эхлүүлсэн Монголын эмэгтэй сагсан бөмбөгчид өнөөдөр Японы багтай хоёр дахь тоглолтоо хийлээ.

Харамсалтай нь, манай тамирчид япончуудын эсрэг юу ч хийж чадсангүй. Тоглолтын эхнээс олон удаа бөмбөгөө алдаж байсан нь нөлөөлж, улмаар Японы баг онооны давуу байдал олж авсан. Хэдийгээр тоглолтын үр дүн ойлгомжтой болсон ч хэсгээс хэдээр гарах эсэх нь онооны зөрүүнээс их зүйл шалтгаалах учир эцсээ хүртэл тэмцсэн. Гэхдээ хоёр багийн хооронд ур чадвар, ойлголцол гээд их зөрүү байлаа.

Эхний тоглолтод багаа хожилд хөтөлсөн М.Булбул энэ удаа 16 оноо авлаа. Харин бусад тоглогчдоос 10 оноо авсан хүн тодорсонгүй.

Харин Японоос дөрвөн тоглогч 10-аас дээш оноо авч, талбайд гарсан бүх тоглогчид оноо авсан аж. Япончууд тоглолтын турш 37 оновчтой дамжуулалт өгсөн бол манай баг 30 удаа бөмбөгөө алджээ.

“Улаанбаатар Гаруда” Словенд ялалт байгуулж чадсангүй

Азийн наадмын 3х3 төрөлд 23 хүртэлх насны залуучуудын шигшээ баг оролцох болсноор үндсэн шигшээ болох “Улаанбаатар Гаруда” баг нь энэ сарын 18-19-нд Словенийн нийслэл Люблян хотод 20 мянган ам.долларын шагналын сантай Дэлхийн цомын цуврал тэмцээнд хүч сорьсон.

Э.Дөлгөөн,  Д.Дэлгэрням, Г.Цэнгүүнбаяр, Э.Цэрэнбаатар тэргүүтэй Монголын баг тамирчид “С” хэсэгт Словенийн “Люблян”, Сербийн “Врбас Авай” багуудтай нэг хэсэгт багтсан. “Люблян”-ы хувьд дэлхийд чансаагаар зургадугаарт бичигддэг. Энэ жагсаалтад “Улаанбаатар Гаруда” баг Ази тивээс хамгийн өндөрт буюу 15-д жагсдаг юм. Харин “Врбас Авай” клубийн хувьд сүүлийн үед чансаа нь ахиж буй баг. Тэд хамгийн сүүлд чансаа шинэчлэгдэхэд 29 байр ахиж, 22-т орж ирсэн билээ.

Энэ удаагийн тэмцээний чансаагаар доогуур бичигдсэн тул “Врбас Авай” урьдчилсан шатанд өрсөлдөж, үндсэн хэсэгт багтсан юм. Тэд эхний тоглолтод талбайн эзэн багийг 20:14-өөр, дараа нь манай тамирчдыг 21:20-оор илүүрхэв.

Ингэснээр манай багийн хувьд гол найдвар нь “Люблян”-ыг нутаг дээр нь хожих. Харамсалтай нь, талбайн эздийн холын шидэлт байндаа тусч байсан бол “Улаанбаатар Гаруда”-гийн шидэлтүүд оновчтой болохгүй байв. Эцэст нь 19:15-аар ялагдаж, хоосон хоцорлоо. Манай баг нийт 35 оноо авч, дунджаар 17.5 оноо бичүүлжээ.

 

 

 

Муратын Булбул 37 оноо авч, багаа хожилд хөтөллөө

Азийн наадмын эмэгтэйчүүдийн 5х5 төрөлд Монголын шигшээ баг эхний тоглолтоо Хонконгийн эсрэг хийж, 83:79-өөр бахдам ялалт байгуулав. Манай сагсчид тоглолтын эхнээс санаачилгыг авч, нэгдүгээр үед 22:12-оор илүүрхсэн бол хоёрдугаар үед Хонконгийн баг гаргасан алдаандаа дүгнэлт хийсэн нь илт байв. Энэ үед хоёр баг эн тэнцүү үзэж, монголчууд есөн оноогоор давамгайлсан юм.

Харин гуравдугаар үед Хонконгийн багийн хамгаалалт эрс чангарч, эсрэгээр манай тамирчид дараалан бөмбөгөө алдаж байлаа. Эхний хагаст 12 бөмбөг алдсан манай эмэгтэйчүүд богино хугацаанд гурав дараалан бөмбөгөө алдаж, нийт зургаан удаа бөмбөгөө эсрэг багт бэлэглэчихсэн. Үүний үр дүнд хонконгчууд тооны харьцааг ойртуулж, бүр тэнцүүлээд амжсан. Тооны харьцаа 58:58 болж, тун эгзэгтэй энэ үед Муратын Булбул хэрэгтэй гурван оноог авснаар багаа сэргээсэн.

Гуравдугаар үеийн төгсгөлд Баясгалангийн Солонго хурдан довтолгооны үеэр өвдгөндөө бэртэл авч, О.Баярцогт дасгалжуулагчийг багагүй сандаргасан. Хэдийгээр олон бөмбөг алдаж байсан ч эмэгтэйчүүд эсрэг багаа самбар дор илүүрхэж, хоёр дахь боломжийг цөөнгүй үүсгэсэн. Үүнд Б.Солонгын үүрэг багагүй байлаа. Тиймээс түүнийг алдвал Монголын баг тун хэцүү байдалд орох байв. Азаар түүний гэмтэл гайгүй өнгөрч, дөрөвдүгээр үед талбайд эргэн ирсэн юм.

Шийдвэрлэх дөрөвдүгээр үед дөрвөн онооны илүү эхлүүлсэн ч өнөөх л бөмбөгөө алдаж байсан нь бидэнд сөргөөр нөлөөлөв. Хонконгийн баг ч энэ боломжийг ашиглаж, дараалан дөрвөн оноо авснаар тооны харьцааг тэнцүүлсэн. Байдал хаашаа ч эргэж мэдэхээр энэ үед Б.Өнөрзаяа холын зайнаас оруулж, улмаар М.Булбул дараалан долоон оноо авснаар 10 оноогоор тэргүүлж эхэлсэн юм. Эсрэг багаас тооны харьцааг найм руу ойртуулсан ч Б.Өнөрзаяа дахин гурваас оруулж, онооны зөрүүг холдуулав. Тоглолтын төгсгөлд хонконгчууд онооны зөрүүг гурав болгон ойртуулсан ч М.Булбул хоёр дараалан холын зайн шидэлтээ оновчтой болгосноор багийнхаа ялалтыг бататгав.

Ийнхүү 38 минут талбайд өнгөрүүлсэн М.Булбул 37 оноо авч, холын зайнаас найман шидэлтээ амжилттай болгосон юм. Түүнчлэн Б.Өнөрзаяа 23 оноо, долоон оновчтой дамжуулалт, таван самбараас бөмбөг авсан бол Б.Солонго 14 оноо, 13 самбар, зургаан оновчтой дамжуулалт, таван хаалт гүйцэтгэжээ.

Эсрэг багийн лидер Ли Кван 22 оноо, По Ше Вон 16 оноогоор багаа тэргүүллээ.

 

 

 

“Миннесота Тимбэрволвес” яагаад С.Карриг сонгоогүй вэ

“Голден Стэйт Уорриорс” багийн холбогч Стифен Карри 2009 оны драфтын талаар “The Ringers”-ын сэтгүүлч Билл Симмонстой ярилцжээ.

Тэрбээр энэ талаар “Дэвид Кан намайг сонгоогүй. Бүгд намайг голф сонирхдог гэдгийг мэднэ. Д.Кан энэ сонирхлоос минь болоод намайг сонгоогүй гэх цуу яриа сонссон юм. Учир нь Миннесота хот бол хүйтэн, тэнд байнга гольф тоглох боломжгүй байдаг” гэсэн юм.

С.Карри чөлөөт цагаараа гольф тоглох дуртай. Өнгөрсөн долоо хоногт Web.com-оос зохион байгуулсан цуврал тэмцээнд оролцоод хамгийн сүүлд орсон билээ.

Харин 2009 оны драфтаар “Миннесота Тимбэрволвес” испани холбогч Рики Рубио болон Жонни Флайн нарыг тав болон зургаагаар сонгосон түүхтэй.

С.Карри №7-гоор “Дайчид”-ын тоглогч болсон. Өдгөө таван удаа бүх одод сонгогдож, ирээдүйн Алдрын танхимын гишүүн болох нь цаг хугацааны асуудал болсон юм.

“Миннесота”-гийн хоёр холбогч одоо багтаа байхгүй. Р.Рубио зургаан улирлын турш Чононуудын гараанд гарсан ч хэзээ ч үнэлэгдэж байсан хэмжээндээ тоглож чадаагүй. Одоо “Юта Жазз” багийн гараанд гарч буй.

Ж.Флайны хувьд NBA-д ердөө гурван улиралд 163 тоглолтод оролцсон бөгөөд гэмтлийн улмаас сагсан бөмбөгөө орхисон билээ.

Д.Каны хувьд 2013 онд ажлаа өгсөн бөгөөд одоо Францын лигийн багийн эзэн бас ерөнхийлөгчөөр нь ажиллаж байгаа аж.