NBA-ийн тоглогч, Ламар Одом сагсан бөмбөгтөө эргэн ирэхээр төлөвлөж, хүчний бэлтгэл хийж эхэлжээ. TMZ сайтад мэдээлснээр Одом Ice Cube-ийн зохион байгуулж буй 3х3 BIG3 лигт бус харин АНУ-аас бусад мэргэжлийн багуудад тоглохоор санал сонсож эхэлсэн гэнэ.

Энэ жил 38 настай, Нью Йоркоос гаралтай Одом хамгийн сүүлд “Лос Анжелес Клипперс” багт 2012-13 оны улиралд данстай байв. Улмаар Испанийн “Саски Баскониа” багтай гэрээ байгуулсан ч богино хугацаанд л бүртгэлтэй байж, “Нью Йорк Никс”-тэй гэрээ байгуулсан ч ганц ч тоглолтод оролцоогүй.

Хамгийн сүүлд Невадагийн нэгэн клубт хар тамхи хэтрүүлэн хэрэглэж, амиа алдах дөхсөн билээ. Тэрбээр дөрөв хоног ухаангүй хэвтсэн ч эцэст нь сэргэж чадсан юм.

 

“Сан Антонио Спэрс”-ийн нэрт дасгалжуулагч Грегг Поповичийн эхнэр, олон жил өвчтэй байсан Эрин Попович өнөөдөр нас баржээ. Энэ талаар багийн арын алба анх мэдээлсэн бөгөөд “Спэрс”-ийн ерөнхий менежер Р.С Буфорд сэтгүүлчдэд анх дуулгасан юм.

Грегг болон Эрин нар хамтдаа 40 жил амьдарсан. Тэд хоёр хүүхэдтэй, бас хоёр ач, зээтэй.

Эрин олон жил хүнд өвчнөөр зовсон. Гэхдээ ямар өвчин туссан гэдгийг нь нууцалдаг. Ямартай ч эмч нарын хэлсэн хугацаанаас хамаагүй удаан амьдарсан гэж ESPN-ий сэтгүүлч Адриан Вожнаровски мэдээндээ онцолжээ.

Грегг Попович талийгаачтай 1970-аад оны дундуур “Эйр Форс” их сургуульд туслах дасгалжуулагчаар ажиллаж байхдаа танилцсан аж. Энэ эгэл бүсгүй дасгалжуулагчийн ажлыг ойлгодог, хүнд хэцүүг нь мэдэрсэн нэгэн. Учир нь түүний эцэг тус сургуулийн тамирчдын хүчний бэлтгэл хариуцсан дасгалжуулагчаар ажиллаж байсан юм.

Хувийн амьдралаа бусдад дэлгэх дургүй Г.Попович маргааш болох “Сан Антонио”-“Голден Стэйт”-ийн цувралын гурав дахь тоглолтод оролцох эсэх нь одоогоор тодорхойгүй байна.

 

Өнөөдөр  NBA-д мөн дөрвөн тоглолт боллоо. Дорнод бүсийн “Бостон-Милоуки”, “Кливлэнд-Индиана”, Өрнөдийн тэргүүн баг “Хьюстон-Миннесота”, “Оклахома-Юта” багуудын эхний тоглолт явагдсан юм.

Бостон 113:107 Милоуки



Жинхэнэ драм энэ тоглолтод өрнөв. К.Өрвинг гэмтэлтэй байгаа ч “Бостон” амар бууж өгөхгүй. Тэд шийдвэрлэх дөрөвдүгээр үед 10 онооны зөрүүгээр хожиж явсан ч “Бакс” оноогоо нөхөж, Малколм Брогдоны гурвын шидэлтийн ачаар тооны харьцааг тэнцүүлсэн. “Бостон”-д бөмбөг шилжиж, үлдсэн 10.3 секундэд амжиж оноо авах шаардлагатай болов. Брэд Стивенс ийм чухал үед хэнд бөмбөг өгөх нь сонин байсан ч залуу холбогч Терри Розиарт итгээд үзэв. Тэр Эрик Бледсог нэг хуураад гурваас шидсэн нь амжилттай болж, эсрэг багт довтлох 0.5 дойл үлдсэн юм. “Бостон” талбай дээрээ цувралын эхний ялалтаа авах нь тодорхой гэгдэж байсан ч Крис Мидлтон үлдсэн хугацаанд амжиж гурваас тэнцүүлснээр нэмэлт цаг гарах нь тодорхой боллоо. Итгэмээргүй шидэлт, гайхалтай төгсгөл байв.

Нэмэлт цагт Эрик Бледсо, Яннис Адетокунбо нар алдааны асуудлаар жагсаалаас гарч, М.Брогдоны тоог тэнцүүлэх оролдлогыг Ж.Татум хаалт хийж багтаа давуу байдал авчирсан билээ.

Бостоны Ал Хорфорд хасагдах шатны 91 дэх тоглолтдоо оролцжээ.

Индиана 98:80 Кливлэнд



Леброн Жэймс хасагдах шатны эхний цувралд хожигдоогүй тоо нь 21 хүрээд зогслоо. Тэр хамгийн сүүлд 2012 онд “Нью Йорк Никс”-тэй хийсэн цувралын дөрөв дэх тоглолтод хожигдсоноос хойш энэ шатанд ялагдаж үзээгүй. Түүний баг 2013 онд “Милоуки”-г, 2014 онд “Чарлотт”-ыг, 2015 онд “Бостон”-г, 2016 онд “Детройт”-ыг, өнгөрсөн жил “Индиана”-г тус тус “шүүрдсэн”. Гэхдээ Леброн хасагдах шатны эхний тойрогт ялагдаж байгаагүй гэсэн бардам үзүүлэлт нь хэвээрээ.

Оклахома 116:108 Юта



Пол Жорж 36 оноо авснаар “Оклахома” эхний тоглолтод хожлоо. “Play-off P” хочтой болоод буй Жорж найман удаа холын зайн шидэлтээ оновчтой болгож, багийнхаа дээд амжилтыг тогтоов.

Шилдэг шинэ тоглогчийн шагналд хүчтэй өрсөлдөж байгаа Донован Митчелл эхний тоглолтод 27 оноо, 10 самбар авчээ. Д.Митчелл тус тоглолтын хоёрдугаар хагаст гэмтэл авч, талбайг орхисон ч удалгүй эргэн ирсэн юм. Түүний гэмтэл төдий л ноцтой биш аж.

Хьюстон 104:101 Миннесота



Жэймс Харден 44 оноо авч, хасагдах шатанд оргил тоглолтоо үзүүлэв. Клинт Капела эхний хагаст 20 оноо, 10 самбараас бөмбөг авсан ч хоёрдугаар хагаст бага минутад талбайд гарч, 4 оноо, 2 самбараас бөмбөг авчээ.

“Хьюстон” улиралд “Миннесота”-гийн эсрэг дөрөв тоглохдоо бүгдэд нь хожиж, нэг тоглолтод дунджаар 15.7 онооны зөрүүгээр ялсан үзүүлэлттэй. Энэ тоглолтод Капелагийн 10 онооны ачаар 17:6-гаар хошуучилж, оноогоор холдож эхэлсэн ч дөрөвдүгээр үед “Чононууд” тооны зөрүүг ойртуулсан юм.

NBA-ийн хасагдах шатны эхний тулаан өнөөдөр боллоо. Өнгөрсөн жилийн аварга “Голден Стэйт Уорриорс”-“Сан Антонио Спэрс”, Дорнод бүсийн тэргүүлэгч “Торонто Рэпторс”, “Вашингтон Визардс”, Дорнодын гурваар шалгарсан “Филадельфи 76” баг “Майами Хит”, Өрнөдийн гурваар тодорсон “Портлэнд Трэйлблазерс”, “Нью Орленс Пеликанс”-тай эхний тоглолтоо хийв.

Голден Стэйт Уорриорс 113:92 Сан Антонио Спэрс



Аваргуудын гол тоглогч Стефен Карри гэмтлийн улмаас “Спэрс”-тэй хийх цувралд оролцохгүй. Тэрбээр хоёрдугаар шатнаас талбайд гарахаар төлөвлөж буй. Хэдийгээр лидер тоглогчгүй нэг шат уруудсан ч гэлээ “Спэрс” энэ боломжийг ашиглахад хэцүү бололтой. Учир нь залуу лидер Кави Леонард нь хэзээ эргэн ирэх нь тодорхойгүй хэвээр. Улиралд С.Карригийн оронд залуу холбогч Куинн Күүк гараанд гарч байсан ч хасагдах шатанд Стив Керр ахмад довтлогч Андре Игоудалаг холбогч дээр гаргажээ. Куинн Күүкийн гараанд гарсан 16 тоглолтод “Дайчид” хамгаалалтын үзүүлэлтээр лигт 17-д бичигдэж байв.

С.Керр Иггиг гараанд гаргасан шигээ үүнээс ч дутахгүй эрсдэлтэй нэг шийдвэр гаргасан. Тодруулбал, ЖаВайл МкГеег төвийн тоглогчоор тоглуулсан юм. МкГее 16 минутад 15 оноо авч, эсрэг багийн лидер ЛаМаркус Олдрижийг тун сайн хамгаалав.

Грег Попович олон жил хасагдах шатанд өрсөлдөхдөө нээлтийн тоглолтод 21 оноогоор хожигдсон тохиолдол урьд хожид байгаагүй. Өмнө нь 2015 онд “Лос Анжелес Клипперс”-т 15 оноогоор дийлдэж байв. “Спэрс”-ийн гарааны тавт нийлээд 33 оноо авсан нь энэ улиралд хамгийн бага авсан оноо болж, багаараа 30 самбараас бөмбөг авсан нь 2014 оны шигшээ цувралын гурав дахь тоглолтоос хойш хамгийн бага самбар авсан үзүүлэлт болжээ.

Торонто Рэпторс 114:106 Вашингтон Визардс



Д.Дерозан холоос шиддэг болсон, К.Лоуригийн бөмбөггүй тоглолт сайжирсан, “Рэпторс”-ын сэлгээний тоглогчид мундаг… Энэ бол улиралд үзүүлсэн “Торонто Рэпторс”-ын амжилтыг нь дүгнэсэн шинжээчдийн бараг амны уншлага болсон үгс. Сүүлийн жилүүдэд “Торонто” шиг тогтвортой амжилт үзүүлсэн баг Дорнод бүсэд алга. 2013-14 оноос эхэлсэн тэдний түүх энэ жил оргилдоо хүрч, 59 ялалт байгуулснаар бүсээ тэргүүлсэн. Хоёр жил эхний шатанд долоон тоглолт хийсний эцэст мултарсан гашуун түүхтэй Канадын баг эцэст нь бүсийнхээ финалд хүрч, өнгөрсөн жил хагас шигшээд “Хаан” Жэймсийг бараагүй. Дуэйн Кэйси энэ багийг 7 улирал удирдаж, энэ жил хүссэндээ хүрэхээр тэмүүлж буй. Гэхдээ хасагдах шатанд Д.Дерозан, К.Лоури нарын тоглолт уначихдаг байдал энэ жил хаашаа эргэх бол?

Эхний тоглолтод “Торонто” зорилгодоо хүрсэн. Уламжлал ёсоор тэд нээлтийн тоглолтод хожигдож, оноо дутуу эхлүүлсэн ч дөрөвдүгээр үед сэлгээний тоглогчид нь тэсэрсэнээр багаа аварсан билээ. Тэд хасагдах шатны 10 цувралд буюу 17 жилийн турш нээлтийн тоглолтод хожоогүй хар цувралдаа цэг тавьж, өрсөлдөгчөө дарж унав.

Филадельфи 76 130:103 Майами Хит



Лигийн комиссар Адам Сильвер нээлтийн тоглолтоос онцлон “Филадельфи 76”-“Майами Хит”-ийн цувралыг үзэж сонирхжээ.

Эхний хагаст Бэн Симмонс 5 удаа бөмбөгөө алдаж, цөөнгүй довтолгоогоо алдсан, үүний ачаар “Дөлнүүд” 60 оноо авч, 4 оноогоор тэргүүлсэн юм. Гэвч хоёрдугаар хагаст Ж.Эмбийдгүй багтаа ямар нүүдэл хийхийг хашир дасгалжуулагч Брэтт Браун тун сайн олж харсан. Тэр тоглолтыг гэмтэлтэй Ж.Эмбийдийн оронд Амир Жонсонг гараанд гаргасан ч хоёрдугаар хагаст Дарио Шарич, Ерсан Ильясова нарыг хамтад нь гаргав. Ийм хослол үүссэнээр эсрэг багийн удаан хамгаалалтыг задалж, бөмбөгний шилжилт хурдтай болсноор Хассан Уайтсайд хийх ч зүйл үлдсэнгүй. Х.Уайтсайд будагтай талбайгаа хамгаалах шаардлагагүй болсноор Эрик Споэльстра түүнийг нөөцөнд суулгасан юм. Харин цаадахь нь сэлгээнд суухдаа дасгалжуулагчийнхаа өөдөөс хатуухан үг чулуудсанаар дахин талбайд гарах эрхгүй болсон гэхэд болно.

Эхний хагаст 38.8 хувьтай довтолж, эсрэг багтаа 60 оноо өгсөн “76”-чууд гуравдугаар үеэс эрс өөр тоглолт харуулсан. Хоёрдугаар хагаст тэдний шидэлт бүр цагаригт орж, холын зайнаас нийт 28 шидсэнээс 18-ыг нь амжилттай оруулж, хасагдах шатанд багийн дээд амжилтаа шинэчлэв.

Бэн Симмонс энэ тоглолтод 17 оноо, 9 самбар, 14 оновчтой дамжуулалт өгсөн юм. Шинэ тоглогч хасагдах шатанд трипл дабл хийсэн түүх 1980 онд “Шидэт” Жонсоноос өөр тодроогүй. Б.Симмонсын хувьд энэ үзүүлэлтэд хамгийн дөхсөн тоглогч болов. “Шидэт” Жонсон 1980 онд 5 удаа трипл дабл хийсэн бол Карим Абдул Жаббар 1970 онд, Жерри Лукас 1964 онд тус бүр нэг удаа ийм амжилт үзүүлсэн удаатай. Түүнчлэн эхний тоглолтдоо 14 дамжуулалт өгсөн нь Жонсоны дараа орох үзүүлэлт. “Шидэт эр” 16 дамжуулалт өгсөн амжилтаар тэргүүлдэг бол Оскар Робертсон 13 дамжуулалтаар удаалж байв. Түүнчлэн плей-оффын цувралд 14 ба түүнээс дээш дамжуулалт өгсөн түүхэн дэх зургаа дахь шинэ тоглогч боллоо.

Портлэнд Трэйлблазерс 95:97 Нью Орленс Пеликанс

 

Энтони Дэвис удтал хүлээсний эцэст хасагдах шатанд анхны ялалтаа байгуулав. “Пеликанс” 2011 оноос хойш хасагдах шатанд зургаа дараалан хожигдсон цувралдаа цэг тавилаа. Портлэндийн лидер тоглогчид болох Дамиан Лиллард, Си Жэй МкКоллум нар эхний хагаст нийлээд ердөө гурван оноо авсан. Харин дөрөвдүгээр үед тоглолт нь сэргэж, улмаар 20 гаруй оноогоор хожигдож явсан ч гурван оноо болтлоо ойртуулсан. Эгзэгтэй үед гурваас шидэх бус оноог ойртуулах боломж хайсан ч Жру Холидэй хаалт хийснээр тэд онооны зөрүүгээ хадгалж, улмаар холдуулснаар тус тоглолтод ялалт байгууллаа.

NBA-ийн 2017-18 оны улирал дуусав. Энэ удаагийн улирлын шилдгүүдэд олгодог уламжлалт шагналыг олгох ёслолын ажиллагаа зургадугаар сарын 25-нд болно. Уламжлал ёсоор улирлын шилдэг тоглогч, оны шилдэг шинэ тоглогч, шилдэг хамгаалагч, онцлох нөөц тоглогч, хамгийн их сайжирсан тоглогч болон дасгалжуулагчийн шагналыг гардуулна. Мөн арын албаны шилдэг удирдагч, шилдэг багийн тоглогч зэрэг бусад шагналын эзнийг ч тодруулах болно.

Ингээд манай сайтын зүгээс оны шилдгүүдийн талаарх таамаг дэвшүүлэв.

Улирлын үнэ цэнэтэй тоглогч: Жэймс Харден

“Хьюстон Рокетс” энэ улиралд 65 ялалт байгуулж, энэ улирлын Пуужингууд ийм амжилт үзүүлсэн 21 дэх баг болсон юм. Баг нь бүсээ тэргүүлээд зогсохгүй энэ улиралд 60 ба түүнээс дээш хожил авсан цор ганц баг болов. Пуужингууд түүхэндээ анх удаа улиралд 60 хожил авч, анх удаа бүсээ тэргүүлэв. Ж.Харден энэ улиралд 30.4 оноо дунджилж, анх удаа онооны аваргаар тодорчээ. Үүгээр ч зогсохгүй нэг улиралд 8.8 оновчтой дамжуулалт гүйцэтгэсэн нь Рассел Уэйстбрук, Леброн Жэймс нарын дараа орох үзүүлэлт. Мөн лигийн түүхэнд анх удаа 60 оноотой трипл дабл гүйцэтгэж, багийнхаа түүхэнд нэг тоглолтод 60 оноо авсан анхны тоглогч болсон билээ.

Тэр сүүлийн хоёр улиралд дараалан үнэ цэнэтэй тоглогчийн санал асуулгад хоёрдугаар байр эзэлсэн.

Өрсөлдөгч: Леброн Жэймс

Шилдэг хамгаалан тоглогч: Руди Гоберт

Р.Гоберт энэ улирлын 26 тоглолтыг гэмтлийн улмаас өнжсөн. Гэхдээ түүний бэртэл багт Гобертын орон зай хэр чухал болохыг харуулсан үйл явдал болов. Зүүн өвдөгний гэмтлийн улмаас хэсэг тоглоогүй үед “Юта Жазз” хасагдах шатанд оролцох эсэх нь эргэлзээтэй байлаа. Харин нэгдүгээр сарын 19-нд эргэн ирснээр багийнх нь хамгаалалт эрс сайжирч, тус үзүүлэлтээр хоёрдугаарт бичигдэх болсон юм. Түүний хана мэт хамгаалалтын ачаар багийнх нь амжилт ч сайжирч, хасагдах шатанд өрсөлдөх боломжтой болсон билээ. Р.Гобертийг бэртлээс эргэн ирсэнээс хойш “Юта Жазз” 100 довтолгоо тутамд 97.5 оноо алдаж, 30 хожиж, 8 ялагдсан.

Өрсөлдөгч: Жоэль Эмбийд

Шилдэг шинэ тоглогч: Бэн Симмонс

Шинэ тоглогч анхны улиралдаа 20 оноо дунджилсан тохиолдол энэ жилийн “Юта Жазз”-ын хамгаалагч Донован Митчеллийг оролцуулаад 47 удаа бүртгэгджээ. Д.Митчелл 20.5 оноо дунджилсан үзүүлэлтээр энэ жагсаалтын 39-д бичигдсэн. Түүний ард Кевин Дюрант, Жоэль Эмбийд, Тайрек Еванс нарын өдгөө тоглож буй тамирчид багтсан бол урд нь Леброн Жэймс, Кармело Энтони, Блэйк Гриффин нар бичигдэж буй. Харин Бэн Симмонс шиг 15 оноо, 8 самбар, 8 оновчтой дамжуулалт гүйцэтгэсэн хүн Оскар Робертсоноос өөр үгүй. Б.Симмонс нэг тоглолтод 54.1 хувьтай шиддэг бол Д.Митчелл 43.7 хувь, “Филадельфи 76” баг өнгөрсөн улиралд 28 хожсон бол энэ жил 52 ялалт байгуулсан, Б.Симмонс талбай дээрх хамгаалалтын үзүүлэлтээр лигт 47-д жагсдаг бол Митчеллийн энэ үзүүлэлт 229-д бичигддэг гээд шилдэг шинэ тоглогчид өрсөлдөгч хоёрыг харьцуулбал багагүй ялгаа гарна.

Өрсөлдөгч: Донован Митчелл

Амжилт нь ахисан тоглогч: Виктор Оладипо

Энэ улиралд хамгийн хол тэсрэлт хийсэн тоглогч яах аргагүй Виктор Оладипо. “Индиана” гол лидер Пол Жоржийг В.Оладипо болон Домантас Сабонисоор солилцоо хийсэн нь аргагүй л нүдээ олсон нүүдэл байв. Гэхдээ энэ солилцоог хийх үеэр ингэж итгэлтэй хэлэх хүн тун ховор байлаа. Лидер тоглогчоо шинэ төвийн тоглогч, үнэ нь хэт хөөрөгдсөн багийн тоглогчоор солилцоо хийсэн учир хүн бүр “Индиана”-г уналтад орох баг гэж үнэлсэн хэрэг.

84 сая ам.долларын цалин авах хэрнээ Оладипо “Оклахома Сити Тандер”-т ердөө 15.9 оноо, 4.3 самбар, 2.6 оновчтой дамжуулалт гүйцэтгэсэн нэгэн байлаа. Харин бүтэн жилийн дараа 23.1 оноо, 5.2 самбар, 4.3 оновчтой дамжуулалт гүйцэтгэж, 2.4 бөмбөг “булаасан” үзүүлэлтээр лигийг тэргүүлсэн юм.

Өрсөлдөгч: Андре Драммонд

Шилдэг зургаа дахь тоглогч: Луис Уильямс

Шилдэг зургаа дахь тоглогчийн шагнал гардсан 35 тохиолдлын 34 нь Луи Уильямсаас бага оноо авсан юм. 1989-90 онд Рики Пирс сэлгээнээс 23 оноо авсан улиралдаа шилдэг зургаа дахь тоглогчийн шагнал хүртэж байв. “Лос Анжелес Клипперс”-ийн зургаа дахь тоглогч Луи Уильямс 79 тоглолтын 19-д нь гараанд гарч, 22.6 оноо дунджилсан. Түүний хувьд энэ шагналыг авбал хоёр дахиа авсан цөөхөн тоглогчийн нэг болно.

Өрсөлдөгч: Эрик Гордон

Шилдэг дасгалжуулагч: Дуэйн Кэйси

Өнгөрсөн зун гол тоглогч Гордон Хэйвардыг алдсан ч Куин Снайдер “Юта Жазз”-ыг хасагдах шатанд шалгаруулж, лидер довтлогч Кави Леонард нь улирлын ердөө 9 тоглолтод оролцсон ч “Сан Антонио Спэрс”-ийн өвгөн мастер Грегг Попович 21 жил тасралтгүй аваргын цомын төлөө дайрч, Терри Стоттс “Портлэнд”-ийг Зэрлэг өрнөдийн эхний гурваар тодруулж, Брэд Стивенс лидер тоглогчид нь эзгүй ч багаа уналтад оруулалгүй авч явсан гээд энэ жил шилдэг дасгалжуулагчийн өрсөлдөөнд нэгдэх хүн маш олон бий. Үүн дээр “Филадельфи”-г хасагдах шатанд шалгаруулсан Брэтт Браун, “Хьюстон”-ыг түүхэн амжилт руу хөтөлсөн Майк Д’Энтони гээд цуварч өгнө.

Гэхдээ багаа бүтэн улирлын турш тэгш тоглуулсан хүн бол Дуэйн Кэйси. Түүний багт өөлөх зүйл тун ховор. “Рэпторс”-ын нийт довтолгооны 70 орчим хувь нь гурав болон холын зайн шидэлтээр явагдаж, лигт хамгийн олон гарааны тавт ашигласан багийн жагсаалтад хоёрдугаарт бичигдэж буй.

Өрсөлдөгч: Майк Д’Энтони

NBA-ийн 2017-18 оны улирал албан ёсоор дуусч, шилдэг 16 баг тодорсон. Тэгвэл хасагдах шатны гадна үлдсэн 14 багийн дунд ирэх тавдугаар сард драфт буюу шинэ тоглогчдын сонгон шалгаруулалтад хэдээр сонгохоо шийдэх үлдсэн юм. Сонгон шалгаруулалтад үлдсэн 14 багийг хэдээр сонгохыг ирэх тавдугаар сарын 15-нд Чикаго хотод тодруулах бол драфт ирэх зургадугаар сарын 21-нд Нью Йоркийн Бруклинд болно.

Драфтын сугалаагаар сонгох боломж:

1. Финикс Санс (21-61): 1-ээр сонгох магадлал 25.0%, эхний гурваар сонгох магадлал 64.2%
2. Мэмфис Гриззлис (22-60): 19.9%, 55.8%
3. Даллас Маверикс (24-58): 13.8%, 42.6%
4. Атланта Хоукс (24-58): 13.7%, 42.3%
5. Орландо Мэйжик (25-57): 8.8%, 29.1%
6. Чикаго Буллз (27-55): 5.3%, 18.3%
7. Сакраменто Кингс (27-55): 5.3%, 18.3%
8. Бруклин Нетс (28-54): 2.8%, 9.9%
9. Нью Йорк Никс (29-53): 1.7%, 6.1%
10. Лос Анжелес Лэйкерс (35-47): 1.1%, 4.0%
11. Чарлотт Хорнетс (36-46): 0.8%, 2.9%
12. Детройт Пистонс (39-43): 0.7%, 2.5%
13. Лос Анжелес Клипперс (42-40): 0.6%, 2.2%
14. Денвер Наггетс (46-36): 0.5%, 1.8%

“Бруклин Нетс”-ийн сонгох эрх “Кливлэнд Кавальерс”-ийнх болно. Учир нь “Нетс” 2013 онд “Бостон Селтикс”-ээс Пол Пирс, Кевин Гарнетт нарыг авчрахдаа драфтын эрхээ өгсөн юм. Энэ эрхийг “Бостон Селтикс” баг өнгөрсөн онд Кайри Өрвингийг авахдаа “Кливлэнд” рүү явуулсан түүхтэй. Морин цэргүүд топ 1-ээр сонгох магадлал 2.8 хувьтай байгаа бол эхний гурваар сонгох магадлал нь 9.9 хувь. Тэд дээгүүр сонгож чадвал энэ зун чөлөөт агент болох Леброн Жэймсийг үлдээх, цаашид түүнгүй байсан ч богино хугацаанд багаа сэргээх боломжтой болно.

Хэдийгээр драфтын эрхээ солилцоогоор явуулсан ч “Бостон” хоосонгүй. Тэд өөрсдийн эхний тойргийн эрхээс гадна “Лос Анжелес Лэйкерс”-ийн эрхийг авах боломжтой. Нуурынхан энэ жилийн эрхийг “Филадельфи 76” баг эзэмших байсан ч тэд өнгөрсөн жилийн драфтын №1-ийг авахын тулд “Бостон Селтикс”-тэй солилцоо хийсэн билээ.

Хэрвээ “Лэйкерс” баг №1, эсвэл №6 ба түүнээс доош эрх сонговол “Филадельфи 76”-д үлдэнэ. Харин 2-5-ын хооронд сонгох бол “Селтикс” завшина. Харин энэ эрх “Филадельфи”-д үлдвэл “Селтикс”-т 2019 оны драфтын эрхээ шилжүүлнэ. Түүнчлэн “Сакраменто Кингс”-ийн 2019 оны эхний раундын эрх “Бостон”-д очих юм. “Хаад”-ын эрхийг одоогоор “Филадельфи” эзэмшиж буй.

NBA-ийн хасагдах шатанд өрсөлдөх 16 баг тодорч дууслаа. Улирлын сүүлийн өдрийг хүртэл аль багийн хооронд цуврал үргэлжлэх нь тодорхойгүй байсан юм. Дорнод бүсийг “Торонто Рэпторс” тэргүүлэх нь ойлгомжтой болсон ч тэдний өрсөлдөгч сүүлийн өдөр л тодорсон юм. Тэдний араас “Бостон Селтикс” бичигдсэн бол “Филадельфи 76” баг 16 дараалан ялснаар гуравдугаарт жагсах болов.

Өрнөд бүсээс “Хьюстон Рокетс”, “Голден Стэйт Уорриорс” эхний хоёр байрыг эзэлж, дараагийн зургаан баг сүүлийн өдөр хүртэл тодорхойгүй байлаа.

NBA-ийн хасагдах шатны тоглолт орон нутгийн цагаар энэ сарын 15-нд ням гаригт “Торонто”-“Вашингтон”-ы тоглолтоор эхэлнэ. Тус тоглолт манай цагаар ням гаригийн үүрийн 6:30 цагт эхлэх юм.

Энэ улирлын үр дүн:

Дорнод бүс

1. Торонто Рэпторс (59-23)
2. Бостон Селтикс (55-27)
3. Филадельфи 76 (52-30)
4. Кливлэнд Кавальерс (50-32)
5. Индиана Пэйсерс (48-34)
6. Майами Хит (44-38)
7. Милоуки Бакс (44-38)
8. Вашингтон Визардс (43-39)
9. Детройт Пистонс (39-43)
10. Чарлотт Хорнетс (36-46)
11. Нью Йорк Никс (29-53)
12. Бруклин Нетс (28-54)
13. Чикаго Буллс (27-55)
14. Орландо Мэйжик (25-57)
15. Атланта Хоукс (24-58)

Өрнөд бүс

1. Хьюстон Рокетс (65-17)
2. Голден Стэйт Уорриорс (58-24)
3. Портлэнд Трэйлблазерс (49-33)
4. Оклахома Сити Тандер (48-34)
5. Юта Жазз (48-34)
6. Нью Орленс Пеликанс (48-34)
7. Сан Антонио Спэрс (47-35)
8. Миннесота Тимбэрволвес (47-35)
9. Денвер Наггетс (46-36)
10. Лос Анжелес Клипперс (42-40)
11. Лос Анжелес Лэйкерс (35-47)
12. Сакраменто Кингс (27-55)
13. Даллас Маверикс (24-58)
14. Мэмфис Гриззлис (22-60)
15. Финикс Санс (21-61)

Хасагдах шат

Дорнод бүс

1. Торонто Рэпторс – 8 Вашингтон Визардс
2. Бостон Селтикс – 7 Милоуки Бакс
3. Филадельфи 76 – 6 Майами Хит
4.  Кливлэнд Кавальерс – 5 Индиана Пэйсерс

Өрнөд бүс

1. Хьюстон Рокетс – 8 Миннесота Тимбэрволвес
2. Голден Стэйт Уорриорс – 7 Сан Антонио Спэрс
3. Портлэнд Трэйлблазерс – 6 Нью Орленс Пеликанс
4. Оклахома Сити Тандер – 5 Юта Жазз

“Филадельфи 76” баг 2012 оноос хойш анх удаа хасагдах шатанд шалгарлаа. Ингэхдээ доогуур бус бүсийнхээ эхний гурваар тодорсон юм. Тэд 16 дараалан ялалт байгуулж, тэр ч бүү хэл төвийн тоглогч Жоэль Эмбийдийг эзгүйд ч ялалтын цувралдаа цэг тавьсангүй. Бэн Симмонсоор удирдуулсан “76” гол тоглогчоо гэмтэлтэй байсан 8 тоглолтод дараалан ялсан юм. Гэхдээ энэ улиралд 22.9 оноо, 11.0 самбар, 1.8 хаалт дунджилсан Эмбийд багтаа хэрэгтэй тоглогчийн нэг. Түүнийг талбай дээр байхад баг нь өрсөлдөгчөөсөө 11.6 оноо илүү авдаг гэсэн үзүүлэлт бий. Гэхдээ Эмбийд эхний шатанд эргэж ирэх эсэх нь тодорхойгүй.

Өрнөд бүсийн сүүлийн өдөр “Миннесота” талбай дээрээ “Денвер”-ийг ялснаар 2004 оноос хойш хасагдах шатны бараа хараагүй хар цувралдаа цэг тавив. Тэд өрсөлдөгчийнхөө зургаа дараалсан ялалтад цэг тавьж, нэмэлт цагт ялалт байгуулсан юм.

“Кливлэнд”-ийн төвийн тоглогч Тристан Томпсоныг тамирчин гэдгээс нь гадна реалити шоуны од Клое Кардашины нөхөр гэдгээр нь зарим хүн танина. Тэгвэл Морин цэргүүдийн тоглогч эр өнгөрсөн долоо хоногт найз бүсгүй болох Клоё Кардашиныг араар тавьсан нь ил болжээ. Үл таних бүсгүйтэй Нью Йоркийн нэгэн зочид буудалд багагүй цагийг өнгөрүүлсэн Томпсоны найз бүсгүй Клоё Кардашин түүнд охин төрүүлж өгөөд удаагүй. Клоё Кливлэнд хотын ойролцоо орших гэртээ охинтойгоо хамт охиныхоо аавыг хүлээж байхад Томпсоны шалиг явдлын талаар биеэ үнэлэгч өөрийнхөө цахим хуудсанд постлоод хэсэг хугацааны дараа устгасан байна.

Тэгвэл TMZ цахим хуудас Т.Томпсоны энэ үйлдэл анхных биш гэдгийг нотлоод өнгөрсөн оны аравдугаар сард Клоё Кардашины гурван сартай бие давхар байхад нь Вашингтон Ди.Си хотод хоёр бүсгүйтэй жиг ургуулж байгаа бичлэгийг нь олон нийтэд хүргэжээ. Т.Томпсоны энэ бүх үйлдлийнх нь талаар Клоё Кардашин албан ёсоор ямар нэг хариу хэлэлгүй бяцхан охинтойгоо чимээгүйхэн амьдарч байгаа аж.

 

Бэн Симмонсоор удирдуулсан “Филадельфи 76” баг өнөөдөр “Атланта Хоукс”-ыг 121:113-аар буулган авснаар 15 дараалан ялж, багийнхаа дээд амжилтыг тогтоов. Одоогоос 35 жилийн өмнө Жулиус Эрвинг тэргүүтэй “76”-чууд 1982-83 оны улиралд аварга болохдоо улиралд 14 дараалан ялсан билээ. Харин залуу “76”-чууд Дорнод бүсийнхээ гурваар гарах нь нэгэнт тодорхой болсон юм.

Бэн Симмонс энэ өдөр 14 оноо, 10 самбар, 6 оновчтой дамжуулалт өгч, 38 дахь дабл даблаа гүйцэтгэв. Тэрбээр бүтэн улирлын турш 16 оноо, 8 самбар, 8 дамжуулалт дунджилсан лигийн түүхэн дэх найм дахь тоглогч болж буй.

Түүнээс өмнө:

Оскар Робертсон 5х

“Шидэт” Жонсон 3х

Леброн Жэймс 2х

Рассел Уэйстбрук 2х

Уилт Чэймбэрлэн

Жэймс Харден

Майкл Жордан

 

АНУ-ын сагсан бөмбөгийн шигшээ баг ирэх долдугаар сард уламжлал ёсоор Лас Вегас хотод бэлтгэлдээ гарна. Тэгвэл эхний ээлжинд бэлтгэлийн танхимд Леброн Жэймс, Кевин Дюрант, Стефен Карри тэргүүтэй 35 тоглогчид урилга гардуулж өгчээ. Эдгээрээс 12 тоглогчийг 2019 онд болох сагсан бөмбөгийн ДАШТ болон Токиогийн олимпод оролцох багийн үндсэн тоглогчоор сонгох юм.

Энэ удаагийн бэлтгэлд өнгөрсөн жилийн Бүх Америкийн багт багтсан 13 тоглогч бүгд дуудагдсан юм. Тэр тусмаа бүх америкийн нэгдүгээр багт орсон Рассел Уэйстбрук, Жэймс Харден, Кави Леонард, Леброн Жэймс, Энтони Дэвис нарыг мартсангүй.

Харин АНУ-ын шигшээ багийн бүх цаг үед хамгийн олон оноо авсан Кармело Энтони шигшээ багаас зодог тайлсан тул багтсангүй. Сонирхуулахад, К.Энтони олимпийн гурван аварга болсон тоглогч. Түүнчлэн Афины олимпийн хүрэл медаль хүртсэн билээ. Л.Жэймс 2008, 2012 онд, К.Дюрант 2012, 2016 онд тус бүр олимпийн аварга болсон. Харин С.Карригийн хувьд дээрх хоёр тоглогчтой хамт шигшээд тоглож байгаагүй юм. Тэрбээр 2010, 2014 онд ДАШТ-д оролцсон ч тэр үед Л.Жэймс тоглоогүй. Харин 2012 оны олимпийн шигшээд багтаж чадаагүй аж.

Энэ удаагийн шигшээд 2014 оны ДАШТ-д оролцсон дөрвөн тоглогч хасагджээ. Тухайлбал, Кеннет Фаред, Руди Гэй, Мэйсон Пламли, Деррик Рөүз нар багтаагүй.

Шигшээ багийн бүрэлдэхүүнд:

Харрисон Барнс (Даллас Маверикс)

Брэдли Бийл (Вашингтон Визардс)

Девин Бүкер (Финикс Санс)

Жимми Батлер (Миннесота Тимбэрволвес)

Майк Конли (Мэмфис Гриззлис)

ДеМаркус Коузинс (Нью Орленс Пеликанс)

Стефен Карри (Голден Стэйт Уорриорс)

Энтони Дэвис (Нью Орленс Пеликанс)

ДеМар Дерозан (Торонто Рэпторс)

Андре Драммонд (Детройт Пистонс)

Кевин Дюрант (Голден Стэйт Уорриорс)

Пол Жорж (Оклахома Сити Тандер)

Эрик Гордон (Хьюстон Рокетс)

Дрэймонд Грин (Голден Стэйт Уорриорс)

Блэйк Гриффин (Детройт Пистонс)

Жэймс Харден (Хьюстон Рокетс)

Тобиас Харрис (Л.А Клипперс)

Гордон Хэйвард (Бостон Селтикс)

Кайри Өрвинг (Бостон Селтикс)

Леброн Жэймс (Кливлэнд Кавальерс)

ДеАндре Жордан (Л.А Клипперс)

Кави Леонард (Сан Антонио Спэрс)

Дамиан Лиллард (Портлэнд Трэйлблазерс)

Кевин Лоу (Кливлэнд Кавальерс)

Кайл Лоури (Торонто Рэпторс)

Си.Жэй МакКоллум (Портлэнд Трэйлблазерс)

Крис Миддлтон (Милоуки Бакс)

Виктор Оладипо (Индиана Пэйсерс)

Крис Пол (Хьюстон Рокетс)

Айзья Томас (Л.А Лэйкерс)

Клэй Томпсон (Голден Стэйт Уорриорс)

Майлс Тюрнер (Индиана Пэйсерс)

Кемба Уолкер (Чарлотт Хорнетс)

Жон Уолл (Вашингтон Визардс)

Рассел Уэйстбрук (Оклахома Сити Тандер)

NBA-ийн домогт тоглогч асан Майкл Жорданы эзэмшдэг “Чарлотт Хорнетс” баг шинэ ерөнхий менежерийн эрэлд гараад буй. Тэд өнгөрсөн жилийн хоёрдугаар сараас хойш ажилгүй яваа, “Лос Анжелес Лэйкерс”-ийн ерөнхий менежерээр олон жил ажилласан туршлагатай Митч Купчакт ажлын санал тавьсан сурагтай.

М.Купчак “Хорнетс”-ийн эзэн М.Жорданыг эртнээс мэднэ. Тэд хамтдаа Хойд Каролинагийн их сургуульд суралцаж, нэг багт хамт зүтгэж явсан удаатай. М.Жордан өмнөх ерөнхий менежер Рич Чойг өнгөрсөн хоёрдугаар сард халсан юм.

Купчак 1981 онд “Лэйкерс”-т тоглогч байсан цагаасаа хойш өнгөрсөн оныг хүртэл тус багийн арын албанд зүтгэсэн эрхэм. Сүүлийн 17 жилд тус багийн ерөнхий менежерээр ажиллаж, олон чухал шийдвэрийг гаргасан юм. “Лэйкерс” түүнийг ажиллаж байх хугацаанд дөрвөн аваргын цом хүртсэн юм.