Author: Д. Бямбажаргал

Спорт сонирхогч Сайтын гэрэл зурагчин

Тайлер Улис, Девин Бүкер нар холбогдсон зодооны бичлэг ил болжээ

“TMZ Sports” цахим хуудсанд “Финикс Санс”-ын холбогч асан Тайлер Улисийн 2017 оны тавдугаар сард холбогдсон зодооны бичлэгийг нийтэд ил болгожээ. Бичлэгт Т.Улис цахилгаан шатанд найзуудыгаа хүлээж байхад нь хэсэг бүлэг залуучуудтай тааралдаж, улмаар маргалдсан бөгөөд төгсгөл зодооноор дуусчээ.



Харин “Финикс”-ийн гол тоглогч Девин Бүкерийн хувьд уг бичлэгт төгсгөлд нь харагддаг. Бичлэгт ил болсноор Д.Бүкер бусдыг цохиогүй ч зодоонд хөндлөнгөөс оролцсон гэж хууль сахиулагчид үзсэн юм.

“Финикс Санс” баг чөлөөт тоглогчийн зах нээгдэх үед Т.Улисийг багаасаа хассан. Багийн удирдлагуудын энэ шийдвэрт Д.Бүкер тун их дургүйцсэн мэдээлэл бий. Гэхдээ Д.Бүкер багтайгаа гэрээгээ сунгаж, таван жилийн 158 сая “ногоон”-ы гэрээнд гарын үсэг зурсан билээ. Т.Улисийг хассан шалтгаан дээрх хэргээс болоогүй. “Финикс”-ийн удирдлагууд гол тоглогчоо авч үлдэхийн тулд цалингийн зай гаргасан гэж багийн албаныхан мэдээлжээ.

 

Тони Паркер явлаа

“Сан Антонио Спэрс”-ийн ахмад холбогч Тони Паркер багаа орхилоо. 17 жил нэг багтаа үнэнчээр зүтгэсэн франц залуу “Чарлотт Хорнетс”-тэй хоёр жилийн 10 сая “ногоон”-ы гэрээ байгуулаад хуучин багаа орхив. 2001 оны драфтын №28-аар сонгогдсон тэрбээр Бүх оддын тоглолтод 6 удаа сонгогдож, дөрвөн удаа аваргын бөгж зүүсэн туршлагатай. Түүнчлэн 2007 оны шигшээ тоглолтын үнэ цэнэтэй тоглогч болсон билээ.

Ийнхүү Грэгг Поповичийн босгосон их гурвалаас Ману Жинобили л багтаа үлдлээ.

Өдгөө 36 настай Т.Паркер багаасаа явахаас өмнө Грэгг Поповичтой нухацтай ярилцсан талаар сэтгүүлчдэд мэдэгдсэн юм. “Спэрс” түүнийг үлдээх хүсэлтэй байсан, бас “Денвер Наггетс” ч түүнийг сонирхож байгаагаа илэрхийлсэн ч Т.Паркер “Хорнетс”-ыг сонгожээ.

Т.Паркер бас залуу од Кавай Леонардтай маргалдаагүй гэдгээ албан ёсоор зарлав. Энэ талаар ахмад холбогч “Надад Кавай Леонардтай ямар нэг асуудал байхгүй. Бид хэзээ ч муудалцаж байгаагүй. Сэтгүүлч надаас миний гэмтэл Кавайгийн бэртлээс хүнд эсэх талаар асуухад нь би “тийм” гэж хариулсан. Учир нь энэ бол үнэн бодит явдал шүү дээ. Хэвлэлийнхэн зарим асуудлыг хэт дэврээдэг явдалд би тун их харамсаж байна” гэж ярьсан байна.

“Хорнетс”-т Францын шигшээ багийн хамтрагч Николас Батум бий. Н.Батум өөрийн цахим сүлжээгээр дамжуулан Т.Паркерыг багт нь ирсэнд баяртай байгаагаа мэдэгджээ.

“Хорнетс”-т мөн хуучин “Спэрс”-ийн туслах байсан Жэймс Боррего ахлах дасгалжуулагчаар ажиллаж эхэлсэн билээ.

 

Кармело Энтони гэрээгээ цуцаллаа

“Оклахома Сити Тандер” болон тус багийн тоглогч Кармело Энтони нар тохиролцоонд хүрч, гэрээгээ цуцаллаа. Ингэснээр “Тандер” их хэмжээний мөнгө татварт өгөхөөс зайлсхийж, ойролцоогоор 100 сая “ногоон” хэмнэж байгаа юм. Пол Жоржтой гэрээгээ сунгасан цагаас хойш хэрвээ “Тандер” шинэ улирлыг энэ бүрэлдэхүүнээр эхлүүлсэн бол даруй 310 сая ам.долларыг татварт өгөх байв.

Харин К.Энтонигийн хувьд баг нь түүний цалин болох 27.9 сая ам.долларыг өгөөд зогсохгүй, шинэ багт бага цалингаар нэгдэх боломжтой болов.

К.Энтонигийн агент нь CAA SPORTS-ын Леон Рөүс. Тэрбээр “Тандер”-ын ерөнхий менежер Сам Преститэй дотны найзууд. Тэд хамтдаа К.Энтонигийн гэрээг цуцлахад ажилласан гэдгийг эх сурвалж нотолсон. Гэхдээ Мело ажилгүй удаан суухгүй бололтой. ESPN-ий мэдээлснээр “Хьюстон Рокитс”, “Майами Хит”, “Лос Анжелес Лэйкерс” багууд түүнийг сонирхож байгаа гэж зарласан юм.

Оклахома Сити Тандерт яагаад ашигтай вэ?

Чөлөөт агент болсон Рэймонд Фелтонтой нэг жилийн 2.4 сая ам.долларын гэрээг үзэглэсэн цагаас хойш “Оклахома”-гийн удирдлагууд санхүүгийн хүнд байдалд өртсөн. Энэ бол татварын асуудал юм. Р.Фелтонтой гэрээг сунгаснаар тэдний ирэх улиралд төлөх цалин болон татварын нийт дүн 300 сая “ногоон”-д хүрсэн. Тус баг өнгөрсөн улиралд татварт 150 сая орчим ам.доллар төлсөн бөгөөд өнөө жил чөлөөт агент болсон П.Жоржтой макс гэрээ байгуулж, улмаар К.Энтони тоглогчийн хувиар үлдэх шийдвэр гаргасан зэргээс шалтгаалж, тэдний цалингийн цэс хэтэрсэн хэрэг. Кармелогийн цалинг хассанаар “Оклахома” ирэх улиралд 107 саяыг цалинд зарцуулна. Харин түүнтэй тохиролцоонд хүрсэн нь сайн хэрэг. Учир нь тэр гэрээгээ цуцлах эсэхийг шийдэх давуу эрхтэй юм.

К.Энтонид ашигтай юу?

К.Энтони өнгөрсөн улиралд 169 удаа гурваас оруулж, карьерийнхаа дээд үзүүлэлтэд хүрсэн. Гэвч Рассел Уэйстбрук, Пол Жорж нарын араас гуравдугаар оноо түүгч болсон тул ердөө 16.2 оноо дунджилсан юм. Хасагдах шатанд “Юта Жазз”-тай хийсэн цувралд ч тэр хэргээ гаргаж чадаагүй. Цувралын 5 тоглолтод 11.8 оноо авч, 37.5 хувьтай шидсэн. Ийм тааруу байгаа ч К.Энтони нөөц тоглогч болох бодолгүй байгаагаа зарлаад, цалингаа хасч танах хүсэлгүй байгаагаа мэдэгдсэн нь “Оклахома”-гийн үнэнч хөгжөөн дэмжигчдийн уурыг барсан билээ. Харин одоо тэр цалингаа ч авна, багтай ч болно. Ингэхдээ түүнийг цэвэр оноо түүгч маягаар ашиглах багт очиж, өөрийгөө хэрэгцээтэй тоглогч хэвээр гэдгийг батлахыг хүсэх байх. Цаг хугацаа л үнэнийг харуулна даа. Кармелогоос зөвхөн нэр л үлдсэн үү, үгүй юу гэдгийг нь….

 

Пол Жорж: “Лэйкерс” намайг солилцоо хийж авахыг хүсээгүй

“Лос Анжелес Лэйкерс” баг энэ зун довтлогч Пол Жоржийг эгнээндээ элсүүлнэ гэж олон хүн таамаглаж байлаа. Лос Анжелес хотын унаган хүү П.Жорж ч өнгөрсөн жилээс хойш “Лэйкерс”-т очихыг хүсч байгаагаа зарлаж, энд тоглохыг багаасаа мөрөөддөг байснаа ярьж байв.

Гэхдээ “Индиана” түүнийг хүссэн баг руу нь бус “Оклахома Сити Тандер” луу солилцоогоор явуулсан билээ. Өнгөрсөн улиралд “Оклахома Сити Тандер” тоймтой амжилт үзүүлээгүй тул чөлөөт тоглогч болсон П.Жоржийг “Лэйкерс” рүү явна гэж олон хүн бодсон нь гарцаагүй.

Хачирхалтай нь, олны таамаг зөрөв. Хэргийн эзэн нь багтайгаа 4 жилийн 137 сая ам.долларын гэрээ байгуулж, “Тандер”-таа үнэнч үлдсэн юм. Харин П.Жорж энэ шийдвэрийнхээ талаар ESPN теле сувагт өгсөн ярилцлагадаа “Би өнгөрсөн жил “Лэйкерс”-т очихыг хүсч байлаа. Гэхдээ тэд намайг солилцоогоор аваагүй. Намайг багтаа авчрахыг хүсээгүй учир миний сэтгэл гонсойсон. Тиймээс одоогийн багтаа үлдэх шийдвэр гаргасан юм” гэж тайлбарлажээ.



 

“Дайчид”-ын гэнэтийн бэлэг

“Голден Стэйт Уорриорс” баг зун бүр нэг дуулиан тарьдаг болов. Ердөө сар гаруйн өмнө “Кливлэнд”-ийг “шүүрдэж”, сүүлийн дөрвөн улирлын гуравт нь аваргын цом хүртсэн тус баг чөлөөт агент болоод буй ДеМаркус Коузинсыг багтаа авч, том дуулиан дэгдээлээ.

Өнгөрсөн улиралд хүнд бэртэл авсан Д.Коузинс чөлөөт тоглогчийн зах нээгдсэн цагаас хойш сураггүй байлаа. Тэр нэг ч хэвлэлд энэ талаар юм яриагүй. Хуучин багийнхантайгаа нэг уулзсан, “Лэйкерс”-ийн төлөөлөгчидтэй Лос-Анжелест нэг бараагаа харуулсан. Гэхдээ удтал чимээгүй байсангүй. “Дайчид” түүнийг авч болох ганц гэрээ нь “mid-level” буюу дундаж цалингийн гэрээ буюу нэг жилийн хугацаанд 5.3 саяын гэрээгээр өөрийн болгов.

Дөрвөн удаа бүх одод, хоёр ч удаа NBA-гийн Бүх Америкийн багт сонгогдож байсан Д.Коузинс бол лигийн шилдэг төвийн тоглогчдын нэг. Үүнийг нотлох баримт бол өнгөрсөн улиралд “Нью-Орленс Пеликанс”-т дунджилсан үзүүлэлтээс нь харж болно. Тэрбээр хүнд бэртэхээсээ өмнө 25.2 оноо, 12.9 самбар, 5.4 оновчтой дамжуулалт, 1.6 бөмбөг таслалт, 1.6 хаалт гүйцэтгэсэн.

Гэхдээ ирэх аравдугаар сард улирал эхлэх үеэр Д.Коузинс талбайд гарахгүй. Энэ бол чөлөөт агент болж байсан түүний хувьд муу мэдээ байлаа. Одоогоор сэтгүүлчид урьд нь түүн шиг шөрмөс нь тасраад орж ирсэн тоглогчид дээр жишээ авч, арванхоёрдугаар сарын сүүлээр юм уу, нэгдүгээр сарын эхээр л талбайд гарна гэж таамаглаж буй.

Түүний хувьд бүх зүйл сайнаар төгсөнө. Гэмтлээ илааршихийг харж суунгаа NBA-гийн аваргын төлөө тоглох боломжтой болно. Хэрвээ аварга авахад гол нөлөө үзүүлсэн тоглолтыг хасагдах шатанд харуулвал ирэх зуны чөлөөт тоглогчийн зах зээл дээр үнэ хүрэх боломжтой. Магадгүй “Голден Стэйт” багтайгаа гэрээгээ сунгах магадлалтай. “Дайчид”-ын хувьд ч ашигтай. Д.Коузинсын бэртэл нь бүр эдгэрэхгүй удлаа ч ЖаВайл МкГеег сайжруулаад, төвдөө айх зүйлгүй боллоо. Мөн Д.Грин, К.Томпсон нараа алдлаа гэж үзэхэд Д.Коузинстай урт хугацаагаар гэрээ хийх боломжтой. Цаадахь нь он солигдохоос нааш талбайд гарахгүй учир Бүх Америкийн багт орох юм уу, Бүх оддын тоглолтод сонгогдох магадлал бага. Энэ тохиолдолд макс гэрээгээр сунгах үнийн дүн ч дагаад бага байх юм.

Д.Коузинсын хувьд бэртлээс шалтгаалан түүнийг сонирхсон багууд урт хугацааны, өндөр цалин өгөхөөс татгалзсан нь ойлгомжтой. Тиймээс ч богино хугацаанд бага цалингаар тоглохыг зөвшөөрч, ирэх улиралд өөрийгөө тод харуулах хүсэлтэй байгаа. Ингэхийн тулд найдвартай хасагдах шат, аваргын зиндаанд өрсөлдөх баг хэрэгтэй. Түүнд ийм хүслээр хангаж чадах баг “Голден Стэйт” гэдэг нь ч ойлгомжтой юм. Магадгүй ирэх улирлын тоглолтоос хамаарч түүнтэй урт хугацааны гэрээ хийнэ гэдэг ам тохироо явагдсан учраас бусад багуудаас илүү “Дайчид”-ыг сонгосон байх магадлалтай юм.

 

Тон Макер, Андрей Блач нар хөөгдөв

NBA-гийн “Милоуки Бакс” багийн төвийн тоглогч Тон Макер тэргүүтэй 13 тоглогч Филиппин-Австралийн тоглолтын үеэр хөөгджээ. Сагсан бөмбөгийн ДАШТ-ий эрх авах Ази тивийн урьдчилсан шатны тоглолт Филиппинд болсон бөгөөд энэ үеэр дээрх 13 тоглогч оролцсон нүсэр зодоон болсон юм.

Австраличууд талбайн эздийг гуравдугаар үед 79:48-аар илт давуу хожиж байх үед Австралийн тоглогч дээр алдаа гаргаж, улмаар бужигнаан үүссэн. Энэ нь сүүлдээ олныг хамарсан зодоонд хүргэж, тамирчин, албаныхан нийлсэн олон хүн зодоонд оролцжээ. Тэд бие бие рүүгээ сандал чулуудаж байсан юм.

Австралийн шигшээ багт тоглодог Тон Макер болон цагтаа “Вашингтон Визардс”, “Бруклин Нетс” багт зүтгэж байсан, өдгөө Филиппиний шигшээд данстай Андрей Блач нар зодоонд оролцсон учир хөөгдсөн байна.

Албаныхан зодооны бичлэгийг шүүж үзээд нийт 13 тоглогчийг хөөх шийдвэр гаргасан. Австралийн шигшээгээс Тон Макер, Даньел Кикерт, Кристофер Гоулдинг, Натан Собей нарыг хөөсөн бол эсрэг багаас А.Блач, Терренс Ромео, Жэйсон Кастро, Карл Брайан Крус, Калвин Абуева, Рожер Погой, Трой Росарио, Жапет Агулар болон Матью Урайт нарыг хөөсөн гэнэ.

Улмаар талбай дээр Филиппиний баг гуравхан тоглогчтой үлдэж, харин австраличууд наймуулаа хоцорсон. Талбайд үлдсэн гурван тоглогчийн хоёр нь богино хугацаанд алдаа гаргаснаар Филиппиний багаас ганцхан тоглогч үлдсэн бөгөөд албаныхан уг тоглолтыг 89:53-аар Австрали хожсон үзээд тоглолтыг цагаас нь өмнө дуусгасан гэнэ.

Олон улсын сагсан бөмбөгийн холбоо зодооны хэргийг нарийн шалгана гэдгээ мэдэгдсэн. Тун удахгүй ямар шийтгэл оноохоо олонд мэдээлэх юм. Харин үймээн болсонтой холбогдуулж, Австралийн сагсан бөмбөгийн холбооны тэргүүн Антони Мур хөгжөөн дэмжигчдээсээ уучлалт гуйжээ.

Лэброн Жэймс “Лэйкерс”-ийг сонголоо

Лэброн Жэймс сүүлийн найман жилийн хугацаанд хоёр дахиа Кливлэнд хотыг орхиж байна.

“Klutch Sports” группийн мэдээлснээр “Кливлэнд” багаас 35.6 сая ам.долларын цалинтай, нэг жилийн гэрээгээ цуцалсны дараа “Лос Анжелес Лэйкерс” багтай 4 жилийн 154 сая “ногоон”-ы гэрээг үзэглэхээр болсон аж.

“Лэйкерс” дахин өрсөлдөөнд оров

“Лос Анжелес Лэйкерс” дахин түрүүлэх багийн эгнээнд орж эхэллээ. Өдгөө 33 настай Жэймс өнгөрсөн улиралд 27.5 оноо, 9.1 оновчтой дамжуулалт, 8.6 самбар, 54.2 хувьтай довтолж, холын зайнаас 36.7 хувьтай шидсэн төдийгүй лигт хамгийн их буюу 36.9 минут талбайд гарсан юм.

Үүгээр ч зогсохгүй хасагдах шатны 22 тоглолтод 34.0 оноо, 9.1 самбар, 9.0 оновчтой дамжуулалт дунджилж, багаа Дорнод бүсийн аваргаар дөрвөн жил дараалан тодруулсан. Тэрбээр лигийн түүхэнд багадаа хасагдах шатны 15 тоглолт хийсэн тоглогчдоос ийм дундаж үзүүлсэн анхны тоглогч болсон билээ.

“Кливлэнд” шинэчлэлийн зам руу

Л.Жэймсийн энэ шийдвэр “Кливлэнд”-д хүчтэй нөлөөлнө. Тус багийн хувьд цаашид шинэчлэлийн зам руу орох нь гарцаагүй болох ирээдүй. Тэд Кевин Лоувыг ч явуулах арга зам хайж мэдэх юм. Гэхдээ тэдний шинэчлэл тийм ч амар байхгүй нь тодорхой. Учир нь Жорж Хилл (19 сая), Тристан Томпсон (17.5 сая), Жи Ар Смит (14.7 сая), Жордан Кларксон (12.5 сая) зэрэг өндөр цалинтай тоглогчид бий. Лэброн явсанаар санхүүгийн том хямралд өртөнө гэж шинжээчид таамаглаж байгаа юм.

Кевин Дюрант + Крис Пол + Пол Жорж багтаа үлдлээ

NBA-гийн энэ зуны чөлөөт агентууд долдугаар сарын 1-нээс өмөн шийдвэрээ гаргаж, багтайгаа үлдэх эсэхээ сонгодог. Энэ жил Лэброн Жэймс, Кевин Дюрант, Крис Пол, Пол Жорж зэрэг одод чөлөөт агент болж, шинэ баг сонгох боломжтой байсан юм. Ялангуяа “Лос Анжелес Лэйкерс”-ийн сагсан бөмбөг хариуцсан ерөнхийлөгч “Шидэт” Жонсон энэ зун багтаа супер од тоглогч авчрахгүй бол ажлаа өгнө гэдгээ мэдэгдсэн. Гэхдээ түүний эхний зорилго бүтэлгүйтэв. Лос Анжелесийн унаган хүү Пол Жоржийг багтаа авах том зорилготой байсан ч тэр “Оклахома Сити”-дээ үлдэх шийдвэр гаргаж, Нуурынхан дараагийн төлөвлөгөө рүү шилжлээ.

Ингээд энэ өдөр болсон шилжилт, хөдөлгөөнийг товч танилцуулья.

Пол Жорж – Оклахома Сити Тандер – 4 жил 137 сая

“Оклахома Сити Тандер”-ын довтлогч Пол Жоржийг төрсөн нутаг болох Лос Анжелес рүү явна гэж олон хүн тооцож байв. Рассел Уэйстбруктэй цуг хийсэн үдэшлэгт “Би эндээ үлдэнэ” гэж зарласан П.Жорж цалингаа тултал буюу 4 жилийн 137 саяар багтаа үлдэхээр шийджээ. Түүний үлдэх болсон шалтгаан тун энгийн. Тэрбээр Рассел Уэйстбруктэй сүүлийн нэг жил гарангийн хугацаанд хамт талбайд өнгөрүүлэхдээ дотны найзууд болж, энэ харилцаа нь багтаа үлдэхэд хамгийн чухал нөлөө үзүүлсэн гэж ярьсан юм. Түүний гэрээний дөрөв дэх жил нь тоглогчоос хамааралтай байх аж.

Крис Пол – Хьюстон Рокитс – 4 жилийн 160 сая

33 настай холбогч “Хьюстон”-д замналаа дуусгахыг хүсчээ. Тэрбээр дөрвөн жилийн 160 сая ам.долларын макс гэрээнд гарын үсэг зурлаа. Харин одоо Пуужингууд хуучин бүрэлдэхүүнээ сайжруулж чадах эсэх нь асуултын тэмдэгтэй үлдэв. Тэд ойрын хугацаанд багтаж, 24 настай төвийн тоглогч Клинт Капелагаа авч үлдэх шаардлагатай.

Кевин Дюрант – Голден Стэйт Уорриорс – 2 жилийн 61.5 сая

Кевин Дюрантын хувьд багтайгаа олон жилийн гэрээ байгуулах хүсэлгүй гэдгээ мэдэгдсэн. Тэр зөвхөн спорт бус бизнес талаас нь ч үүнд хандаж байгаа юм. К.Дюрантын хувьд гэрээгээ сунгасан нь ирэх жилийн чөлөөт агентын зах дээр ч тунаж үлдэх боломжтой. Учир нь ирэх улиралд 30 сая “ногоон” халааслах Дюрант хоёр дахь жилийн 31.5 саяыг цуцлах боломжтой гэнэ. Тэрбээр өнгөрсөн зун харьцангуй бага буюу хоёр жилийн 51 саяын гэрээг үзэглэж, үр дүнд нь Андре Игоудала, Шон Ливингстон нарыг багтаа үлдэх боломж олгосон билээ.

ДеАндре Жордан – Даллас Маверикс – 1 жилийн 24 сая

ДеАндре Жордан анх удаагаа “Клипперс”-ийг орхиж, “Даллас Маверикс”-тай гэрээ байгууллаа. Өдгөө 29 настай Жордан 2015 онд чөлөөт тоглогч болоод “Даллас”-т очих тун дөхсөн. Гэрээнд гарын үсэг зурах л дутуу тэр үед Жордан шийдвэрээ гэнэт өөрчилж, “Клипперс”-тэй дөрвөн жилийн гэрээ байгуулсан билээ. Д.Жорданг багтаа авахын тулд Дирк Новицкигийн үйлдэл хамгийн их тус хүргэсэн аж. Д.Новицки жилд 5 сая ногоон авах өөрийн гэрээгээ цуцалж, Жордантай гэрээ байгуулах боломж үүсгэсэн. Бүх гэрээ дуусгавар болсны дараа немц эр багтайгаа дахин гэрээгээ сунгахаар тохиролцоонд хүрсэн аж.

Тревор Ариза – Финикс Санс – 1 жилийн 15 сая

Өдгөө 33 настай Т.Аризад “Хьюстон” өндөр цалин өгөх боломжгүй тул шинэ зам сонгожээ. Гэхдээ энэ удаад тэр мөнгө хөөж, “Финикс Санс”-ыг зорьсон байна. Т.Ариза “Хьюстон”-ы хамгаалалтын гол түлхүүр байв. Харин одоо тэр драфтын үдэш “Филадельфи 76”-гаас солилцоогоор авчирсан залуу довтлогч Микал Брижесийн багш болов.

Деррик Рөүс – Миннисота Тимбэрволвес – 1 жилийн 2.1 сая

Том Тибодеугийн хайртай шавь Деррик Рөүс өөрт нь боломж олгосон багтаа ахин нэг жил зүтгэх боллоо. Тэрбээр өнгөрсөн улирлын сүүлээр тус багт очиж, 9 тоглолтод оролцохдоо 5.8 оноо, 1.2 дамжуулалт дунджилсан билээ. Харин хасагдах шатанд 14.2 оноо, 2.6 оновчтой дамжуулалт гүйцэтгэсэн.

Жимми Батлер – Миннисота Тимбэрволвес – 4 жилийн 110 сая

“Миннисота” Жимми Батлерт макс гэрээ санал болгожээ. Гэхдээ Ж.Батлерын хувьд гэрээгээ сунгах гэж яарахгүй хэмээн сэтгүүлчид бичиж байна. Учир нь хуучин гэрээ нь ирэх жил дуусах бөгөөд тэр үед гэрээгээ сунгавал илүү их цалин авах боломжтой аж. Ямартай ч Батлер энэ сарын 9-нд хүртэл эцсийн шийдвэрээ гаргах хугацаа бий.

 

Стив Керр лигийн хамгийн өндөр цалинтай дасгалжуулагч болно

NBA-гийн гурван удаагийн аварга дасгалжуулагч Стив Керрийн гэрээг албан ёсоор сунгасан гэдгээ “Голден Стэйт” багийн хэвлэлийн төлөөлөгч мэдэгдлээ.

Одоогоор Стив Керр хэдий хэмжээний цалин авах нь тодорхойгүй байгаа ч түүнийг лигийн хамгийн өндөр цалин авдаг дасгалжуулагчийн нэг болно гэж ESPN-ий сэтгүүлч Адраин Вожнаровски үзэж байгаа юм.

Тэрбээр өнгөрсөн оны хуучин гэрээгээр бол жилд 5 сая “ногоон” авч байв. Тэгвэл энэ цалин нь багадаа 10 сая орчим ам.доллар болж байгаа гэж сэтгүүлчид таамаглаж байгаа юм. Одоогоор лигт “Сан Антонио”-гийн Грэгг Попович 11 сая.ам долларын цалин авч байгаагаар мэргэжил нэгтнүүдээ тэргүүлдэг.

Стив Керрийн хувьд Дайчидыг дөрвөн улирал дасгалжуулахдаа 265 хожиж, 63 хожигдсон. Тэрбээр энэ жил дасгалжуулагчийн хувиар гурав дахь аваргын цомоо авснаар ийм амжилтад хүрсэн зургаа дахь дасгалжуулагч болсон билээ.

С.Керр тоглогч байхдаа таван аваргын цом хүртэж байсныг сагсан бөмбөг сонирхогчид сайн мэдэх биз ээ.

 

Чэйз Бадинжер элсний волейболын тамирчин болов

Өнөө цагийн NBA-гийн шилдэг довтлогч Кевин Дюрант ахлах сургуульд байхаасаа л бүх шагналыг түүж ирсэн. Тэрбээр 12 жилийн өмнө МакДоналдсын бүх америкийн үнэ цэнэтэй хоёр тоглогчийн нэгээр тодорч, дараа нь коллежийн шилдэг тоглогчоор нэрлэгдсэн удаатай. 2007 онд драфтад нэр дэвшин, №2-оор сонгогдсон К.Дюрант 2014 онд лигийн үнэ цэнэтэй тоглогчоор нэрлэгдэж, одоо бол лигийн аваргаар хоёр удаа тодорч, финалын үнэ цэнэтэй тоглогч болсон удаатай.

Тэгвэл ахлах сургуулийн үнэ цэнэтэй тоглогчийн шагналыг түүнтэй хуваасан тэр эрхэм хэн бэ? Энэ бол Чэйз Бадинжер юм. Хожим Аризонагийн их сургуульд гурван жил номын дуу сонсоод NBA-д элссэн Ч.Бадинжер 2009 оноос “Хьюстон”, “Миннесота”, “Индиана”, “Финикс” багуудад зүтгээд Испанийн “Баскониа” багт нэг жил тоглосон билээ.

Ахлах болон их сургуульд чадварлаг тоглогчийн тоонд багтсан түүний мэргэжлийн замнал нь урт байгаагүй. Тиймээс 30 хүрэхээсээ өмнө NBA-гээс явж, Испанид очоод бүтэн жил болсныхоо дараа эргэн ирсэн юм. Харин энэ удаа тэр арай өөр замыг сонгожээ.

Тэр ахлах сургуульд байхаасаа л волейбол тоглодог байсан юм. Авьяаслаг ч байлаа. Зургаан настайдаа сагсан бөмбөг тоглож сурсан бол үүнээс таван жилийн дараа волейболд хорхойтой болжээ. Бяцхан Чэйзийг ийм авьяастай болоход энэ хоёр спортоор хичээллэдэг эгч Британи болон ах Данкан нарынх нь нөлөө их байв. Харин хүүхдүүдээ их спортод дөртэй болоход аав, ээжийнх нь сонирхол хамгийн их нөлөөлсөн зүйл.

Ахлах сургуульд спортоор авьяаслаг явсан Чэйзийн төлөө гурван их сургууль хоорондоо өрсөлджээ. Эд бол Аризона, USC болон UCLA. Лос Анжелесийн их сургууль түүнд сагсан бөмбөг, волейболоор тоглох боломж олгохоо амлаж байсан бол Аризонад эрэгтэй волейболын систем байсангүй. Гэхдээ “Уайлдкатс”-ын дасгалжуулагч Лют Олсений түүнд тавьсан санал хамгийн их таалагджээ. Тиймээс Лютийн шавь болохоор “Аризона”-г сонгосон аж.

Тэр волейболыг орхихыг хүсээгүй ч сагсан бөмбөгөөр илүү хол зам туулах боломжтой байсан тул энэ хоёр спортоос сонголтоо хийсэн юм. Тиймээс Аризонагийн их сургуулийн системд найдсан хэрэг.

Чэйз гурван жил их сургуульд тоглоод 2009 оны драфтад нэр дэвшиж, хоёрдугаар бүсийн 44-өөр “Детройт Пистонс”-т сонгогдсон. Гэхдээ драфтын өдрөө л “Хьюстон Рокитс” руу солилцоогоор явж, албан ёсоор мэргэжлийн тамирчны замналаа эхлүүлсэн билээ. Бүтэн 7 улирал лигт данстай байхдаа дунджаар 7.9 оноо авч байв. Харин сагсан бөмбөгийн замналаа өндөрлөөд Чэйз шууд өөр сонирхлоо дагахаар шийдсэн байна.

NBA-гийн тоглогч байхдаа зун бүр элсний волейбол тоглодог байв. Энэ нь түүнийг элдэв бэртлээс сэргийлдэг аж. Ялангуяа шагай, өвдөг болон хөлөндөө эрс ачаалал өгч, гэмтэхээс сэргийлнэ. Биеийн бүх булчинг ч жигд хөгжүүлдэг гэнэ. Долоо хоногт 2-3 удаа элсний волейболд цаг гаргадаг байсан юм.

Ингэж яваад Лондоны олимпод оролцож байсан Шен Росенталтай танилцжээ. Шен 2008 оноос АНУ-ын элсний волейболын шигшээ багийн тамирчин гэгдэж, Жэйк Гиббийн хамт Лондоны олимпод хүч сорьсон удаатай. Түүнд мэргэжлийн волейболчин бус Чэйзийн тоглох арга барил таалагдсан учир нэг бус удаа сагсан бөмбөгийн карьераа орхиж, волейболын тамирчин болохыг санал болгож байжээ. Гэхдээ тэр үед Чэйзийн сагсан бөмбөгийн замнал дуусаагүй байсан тул америк эр үүнийг наргианаар хэлж байсан юм.

Сагсан бөмбөгийн замнал нь ид үедээ явж байхад Чэйз хэд хэдэн хүнд хагалгаанд орсон юм. 2013 онд өвдгөндөө хүнд хагалгаа хийлгэсэн нь хожим түүний спортын замналыг үндсээр нь өөрчилсөн. Хүнд бэртлийн улмаас өмнөх шигээ эрч хүчтэй, агаарт “нисч” чадахаа больсон Чэйз тоглолтын арга барилаа эрс өөрчлөөд ч нэмэр болоогүй юм. Бадинжер эцэст нь Испанийг зорьсон ч амралтаараа эх орондоо ирээд бодлоо өөрчилжээ.

Росентал түүнийг сагсан бөмбөгийн замналаа дуусгавал элсний волейболын хамтрагч болох боломжтой гэсэн саналыг Чэйз хэдэн өдрийн турш бодсон бөгөөд эцэст нь энэ спортод зүтгээд үзэхээр шийдсэн гэдэг. Тэр Росентал руу утасдаад “За, сагсан бөмбөгөө орхиж, волейбол руу орохоор шийдлээ” гэж ярьжээ.

Ингэж 38 настай мэргэжлийн волейболчин Шен Росинтал, энэ спортын замналаа дөнгөж эхлүүлж буй 30 настай Чэйз Бадинжер нар Токио 2020-д оролцох эрх авахаар орон нутгийн тэмцээнд хүч сорьж эхэллээ. Нью Йоркийн нээлттэй тэмцээнд гурван ялалт байгуулсан нь энэ хосыг чадварлаг баг гэдгийг нь харуулав.

Лэброн Жэймс, Дуэйт Ховард, Кевин Дюрант, Харрисон Барнс. NBA-гийн чадварлаг тоглогчид юугаараа ижилхэн бэ? Тэд бол энэ зуунд ахлах сургуулийн МакДоналдс бүх оддын тэмцээний үнэ цэнэтэй тоглогч болсон, олимпийн алтан медальтнууд аж. Хэрвээ Чэйз Токиод алтан медаль хүртвэл энэ тоог нэгээр нэмэх боломжтой.

Пол Жорж чөлөөт тоглогч болохоо зарлалаа

“Оклахома Сити Тандер”-ын хамгаалагч Пол Жорж гэрээнийхээ хамгийн сүүлийн жил болох 20.7 сая “ногоон”-оос татгалзаж байгаагаа мэдэгдлээ. Ингэснээр П.Жорж чөлөөт тоглогчийн зах руу шилжиж байгаа юм. ESPN-ий алдарт сэтгүүлч Адриан Вожнаровскигийн үзэж буйгаар бол Пол хуучин багтайгаа гэрээгээ сунгах магадлал илүү байгаа аж. Түүнийг мөн “Лос Анжелес Лэйкерс” сонирхож байгаа боловч эхний сонголт нь биш гэнэ. Нуурынхан Кавай Леонардыг урвуулж, дараа нь Лэброныг авчраад Пол Жоржтой ярилцах төлөвтэй. Ингэхийн тулд багагүй хугацаа шаардлагатай юм.

Түүнчлэн “Филадельфи 76”, “Хьюстон Рокитс” багууд түүнийг сонирхож буй. Түүнийг сэтгүүлчид ирэх улиралд “Лэйкерс”-т тоглох хүсэлтэй гэж таамаглаж байгаа ч одоогоор энэ нь батлагдсан зүйл үгүй. Тэрбээр Лос Анжелес хотод төрж өссөн тул хотынхоо багтаа тоглохыг хүсч байгаагаа нэг бус удаа мэдэгдсэн билээ.

 

Кавай Леонардын төлөөх “дайн” эхэллээ

NBA хөдөлгөөнд орж эхэллээ. Учир нь тун удахгүй буюу энэ ням гаригт чөлөөт тоглогчийн зах нээгдэнэ. Лэброн Жэймс тэргүүтэй томчууд шийдвэр гаргаж, лигийн ирээдүйн өнгийг тодорхойлох болно. “Хаан”-ыг багтаа авахын тулд багууд хөрсөө бэлдэх хэрэгтэй. Түүний сайн хамтрагч нь одоогоор “Сан Антонио Спэрс”-ийн довтлогч Кавай Леонард байх бололтой. Ялангуяа “Лос Анжелес Лэйкерс” том зах зээл, бизнесийн орчинтой гэдгээрээ түрий барьж, Кавайг урвуулах ажил эрчимтэй хийж эхлэв. Уг нь “Спэрс” Өрнөдийн багууддаа зарахгүй гэж байгаа ч Лэброныг авчрахын тулд бүхнийг хийхэд бэлэн байгаа “Нуурын” удирдлагууд байнга шахалт үзүүлж байгаа гэх. Тэдний хувьд Кавайг авчирвал тэртээ тэргүй сэтгэл нь наашаа болоод буй Лэброныг багтаа харна гэсэн үг. Л.Жэймсийн том хүү саяхан Лос Анжелесийн нэгэн томоохон ахлах сургуульд бүртгүүлсэн учир гэр бүл нь энд амьдрах төлөвлөгөөтэй байгааг баталсан хэрэг. Гэхдээ Лэбронд төрөлх хотоо орхиод Лос Анжелесийг зориход сайн хамтрагч хэрэгтэй. Удахгүй 34 нас хүрэх “Хаан”-д одоогийн “Лэйкерс”-ийн залуу тоглогчдыг хөгжихийг хүлээх хугацаа ховор. Тиймээс “Шидэт” Жонсон сайн хамтрагчид авчирч, түрүүлэх хэмжээний баг босгохоор шаргуу хөөцөлдөж буй. Түүний төлөвлөгөө бүтэлгүйтвэл шуудхан ажлаа өгнө гэдгээ ил тод зарлачихсан. Лэброн долдугаар сарын 4-нөөс өмнө шийдвэрээ гаргаж, хаашаа очихоо хэлэх тул ойрын хугацаанд амжиж том наймаа хийх шаардлага “Лэйкерс”-т тулгарчээ.

Кавайд санал тавьсан дөрвөн баг бий гэдгийг бүгд мэдэж буй. Эдгээрээс “Бостон Селтикс” Лэброныг зогсоохын тулд гол өрсөлдөгчийг нь багтаа элсүүлэхийг хүсч байгаа бол бусад гурван баг “Хаан”-ыг багтаа авахын тулд түүнийг шохоорхож байгаа билээ. Энэ гурван баг бол “Кливлэнд Кавальерс”, “Филадельфи 76” болон “Лос Анжелес Клипперс”.

“Бостон Селтикс” холбогч Кайри Өрвинг дээрээ залуу довтлогч Жайлин Браун, 2019 оны “Сакраменто Кингс”-ийн драфт эрх санал тавьсан гэж шинжээчид таамаглаж байгаа. Ганц асуудал нь К.Өрвинг сүүлийн дөрвөн жилийн хугацаанд өвдгөндөө хоёр удаа мэс засал хийлгэсэн. Энэ бол түүн шиг хурдтай тоглодог хүнд бол том асуудал. Мөн 2019 онд гэрээ нь дуусч, чөлөөт тоглогч болоод яваад өгөх боломжтой.

“Филадельфи”-гийн хувьд Бэн Симмонс, Жоэль Эмбийдээс бусад тоглогчоор солилцоо хийхэд татгалзах зүйлгүй аж. Үүнд Маркель Фулц, Роберт Ковингтон, Дарио Шарич, Жэррид Бэйлисс нар багтаж байгаа. Түүнчлэн “Майами”-гийн 2021 оны драфтын сонголтыг ч явуулах бололтой.

“Кливлэнд”-ийн хувьд боломж тааруу. Гэхдээ тэд байгаа бүх боломжоо ашиглах гэнэ. Шууд Кавайг авах боломж бага учраас юун түрүүнд гурван баг оролцсон солилцоо хийхээр санаархаж буй. Энэ гурав дахь баг бол “Чарлотт Хорнетс”. Кэмба Уолкероо явуулах хүсэлтэй байгаа тэдэнд хүсээд буй авьяаслаг тоглогчийг нь өгч, оронд нь К.Уолкер, К.Лоув нарыг “Спэрс” рүү явуулаад Кавайг багтаа авах. Гэхдээ энэ нь багаа шинээр босгох хүсэлтэй “Спэрс”-ийн таашаалд нийцэх эсэх нь тодорхойгүй.