АНУ-ын сагсан бөмбөгийн шигшээ багт дуудагдсан тоглогчид бэлтгэлд гарах үеэр Кевин Дюрант, Жэймс Хардэн, Пол Жорж нарын шилдэг тоглогчид Лас Вегас хотод NBA-гийн багтай болохыг дэмжиж байгаагаа илэрхийлжээ.

К.Дюрант энэ талаар хэвлэлд өгсөн ярилцлагадаа “Миний бодлоор тоглогчид энд ирэхэд таатай байдаг. Тэдний ихэнх нь үүнийг дэмжиж байгаа гэж бодож байна. Би ч мөн ижил бодолтой байдаг” гэж ярьжээ.

Харин Ж.Хардэн энэ талаар “NHL-ийн багтай болсон нь гайхалтай санагдаж байлаа. Мөнгөтэй учраас энэ бүхнийг бүтээх амархан ч хөгжөөн дэмжигчид нь жинхэнэ дэмжигчид байж чадна гэдгээ хоккей дээр харууллаа” гэжээ.

Тэгвэл П.Жорж “Энд хоккейн баг, WNBA-гийн төлөөлөл байна. Хэдэн жилийн дараа америк хөлбөмбөгийн багтай болно. Харин одоо NBA-гийн багтай болох ёстой” гэж ярьсан юм. WNBA-гийн “Эсэйс” болон NHL-ийн “Голден Найт” баг энэ хотод бий. Харин 2020 оноос “Оаклэнд Рэйдерс” багийн удирдлагууд багаа Лас Вегас руу нүүлгэхээр болсон билээ.

“Хьюстон Рокитс” баг их хичээл зүтгэл гаргасны эцэст төвийн тоглогч Клинт Капэлатай гэрээгээ сунгав. Тэд таван жилийн 90 сая “ногоон” дээр тохиролцоонд хүрсэн, гэхдээ гэрээнд зааснаар бол 80 сая нь баталгаатай цалин бол 10 саяыг нь тодорхой үүррэг гүйцэтгэвэл урамшуулал маягаар олгохоор болсон гэнэ.

“Вашингтон Пост” сонины сэтгүүлч Тим Бонтемпсийн мэдээлснээр бол хэрвээ баг нь Өрнөд бүсийн финалд шалгарвал К.Капэла урамшуулалд нь 1 сая ам.доллар авна. Түүнчлэн багийнхаа нийт самбарын 30-аас доошгүй хувийг нь авч чадвал мөн чөлөөт шидэлтээс 65 хувиас багагүй гүйцэтгэвэл хагас сая ам.долларын урамшуулал авахаар тохирсон аж. Энэ гэрээ таван улирал дуустал хүчинтэй байх юм.

Өдгөө 24 настай К.Капэла өнгөрсөн улиралд 13.9 оноо, 10.8 самбараас бөмбөг авч, 1.9 хаалт дунджилсан юм.

Сонирхуулахад, Капэла 13 нас хүртлээ спортоор хичээллэж үзээгүй. Харин тэр үеэс хөлбөмбөгөөр хичээллэх болсон ч хэт өндөр нуруутай болсон тул хөлбөмбөгөө орхиж, 18 настайдаа сагсан бөмбөгийг сонгосон юм.

Ирэх зун чөлөөт агент болохоосоо өмнө “Торонто Рэпторс”-ын довтлогч Кави Леонард пүүзний зах зээлд ч чөлөөт нэгэн болох бололтой.

ESPN-ий сэтгүүлч Ник ДеПаулагийн мэдээлснээр Жордан брэнд түүнтэй байгуулсан гэрээгээ дуусах үед сунгахгүй гэдгийг албан ёсоор мэдээлэв. Тэдний гэрээ энэ улирлын эцэс гэхэд дуусах юм. Уг нь Жорданы зүгээс өнгөрсөн улирлын эхэнд түүнтэй дахин дөрвөн жилийн 22 сая ам.долларын гэрээ санал болгосон ч татгалзсан юм.

Өдгөө 27 настай К.Леонард ганцаараа пүүзний зах зээлд сулрах том нэр биш аж. Тодруулбал, энэ улирлыг дуусгаад “Филадельфи 76”-гийн төвийн тоглогч Жоэль Эмбийд, “Миннисота Тимбэрволвес”-ийн довтлогч Андрей Уиггинс, “Бостон Селтикс”-ийн Гордон Хэйвард, “Голден Стэйт Уорриорс”-ын ДеМаркус Казинс, “Денвер Наггетс”-ын холбогч Айзья Томас, “Вашингтон Визардс”-ын Келли Оубре Жуниор нарын гэрээ дуусч байгаа гэнэ.

К.Леонардын хувьд жилийн 5.5 сая “ногоон” халааслах саналаас татгалзсан нь хачирхалтай. Өнгөрсөн оны зургадугаар сарын байдлаар одоогийн болон өмнө нь тоглож байсан тоглогчдоос 10 хүн л түүнээс илүү мөнгийг пүүзний зах зээлээс олж байв. Тодруулбал, нэг жилд олсон орлогоороо Майкл Жордан (110 сая), Лэброн Жэймс (32 сая), Кевин Дюрант (25 сая), Коби Брайант (16 сая) нар тэргүүлж байжээ.

NBA-гийн тоглогч асан Ламар Одом сагсан бөмбөгтөө эргэн ирэхээр болжээ. Гэхдээ NBA-д бус харин Хятадын лигт тоглох аж. Энэ талаар тэрбээр өөрийн цахим хуудсанд мэдээлсэн бөгөөд ийм шийдвэр гаргахад Стефон Марбэри тус болсон гэж онцолсон юм.

Өдгөө 38 настай Л.Одом 2015 онд Лас Вегасын томчуудын газарт хар тамхи болон бэлгийн дур хүсэл өдөөгч эмийг хэтрүүлэн хэрэглэж, ухаан алдсан удаатай. Түүнээс хойш сагсан бөмбөгийн замнал нь зогссон ч одоо хар тамхинаас татгалзах болсон юм. Тэр ч бүү хэл энэ үйл явдлаас бүтэн жилийн дараа их спортдоо эргэн ирэхээр төлөвлөж байгаагаа зарласан билээ.

Тэрбээр хамгийн сүүлд 2014 онд Испанийн “Баскония” клубт хүчин зүтгэсэн билээ. Харин NBA-д нийт 961 тоглолтод оролцож, 13.3 оноо, 8.4 самбар дунджилсан юм.

“Атланта Хоукс” баг ахмад тоглогч Винс Картертай нэг жилийн 2.4 саяар гэрээ байгуулах тохиролцоонд хүрсэн байна. “Хоукс”-ын удирдлагууд шинэ тоглогч Трэй Янг болон залуу довтлогч Жон Коллинс нарыг туршлага суулгахад В.Картер хэрэгтэй гэж үзсэн талаар “ESPN”-ий сэтгүүлч Адриан Вожнаровски онцолжээ.

Өнгөрсөн нэгдүгээр сард 41 нас хүрсэн В.Картер 1998 оны зургадугаар сард драфтаар NBA-д орж ирсэн. Харин тус багийн ирээдүй гэгдэж буй Т.Янг 1998 оны есдүгээр сард төрсөн юм.

В.Картер их спортоо орхих бодолгүй байгаа талаараа “Би эцсийн хүчээ дуусах хүртэл хайртай спортдоо үнэнч хэвээрээ үлдэнэ. Мөнгөнөөс хамааралтай асуудал биш” гэж ярьсан юм.

Тэрбээр хамгийн сүүлд “Сакраменто Кингс” багт зүтгэсэн. Өнгөрсөн улиралд 5.4 оноо дунджилж, 40.3 хувьтай шидэж байлаа.

Лэброн Жэймсээ алдсан “Кливлэнд Кавальерс” өөр нэг чухал тоглогч болох Кевин Лоувтой гэрээгээ сунгалаа. Тэд дөрвөн жилийн 120 сая дээр тохиролцсон байна. Түүний гэрээ дуусахад нэг жил үлдсэн, энэ хугацаанд 25.5 саяыг авах ёстой байсан ч шинэ гэрээ байгуулснаар ирэх улиралд 24.1 саяыг “халааслах” боллоо. Дөрвөн жилийн хугацаанд дунджаар 30 саяыг авах боллоо.

“ESPN”-ийн сэтгүүлч Адриан Вожнаровскигийн мэдээлснээр тэр ирэх улиралд хуучин гэрээгээ дуусгаад шинэ гэрээ байгуулсан бол таван жилийн 153 саяыг авах боломжтой байсан юм.

К.Лоув шинэ гэрээнийхээ талаар “Анх энэ багт ирсэн цагаасаа хойш удаан, тогтвортой тоглолт үзүүлэхийг хүсч байлаа. Би энэ багт ялалтын төлөө ирсэн. Бид нэг зорилго дор нэгдэж, хүссэн зүйлдээ хүрч чадна” гэж ярьлаа.

“Майами Хит”-ийн хамгаалагч Дуэйн Уэйд энэ зун чөлөөт агент болсон ч одоог хүртэл дараагийн багаа олоогүй яваа. Энэ боломжийг ашиглахаар Хятадын багууд улайрч эхэллээ. “Sportando”-гийн мэдээлснээр “Жөжян Голден Буллс” баг гурван жилийн 25 сая “ногоон”-ы цалин амлав.

Д.Уэйд бол Хятадын сагсан бөмбөг сонирхогчдын хувьд танил бус хүн биш. Тэрбээр өнгөрсөн долоо хоногт тус улсын спорт хувцасны томоохон брэнд болох “Li Ning”-тай бүх насаараа хамтарч ажиллах гэрээ байгуулсан юм. Энэ хүрээнд Хятадад айлчилж байгаа Д.Уэйд шинэ пүүзээ олон нийтэд зарлах үеэр сагсан бөмбөгтэй холбоотой ямар нэг шийдвэр гаргах гэж яарахгүй байгаагаа илэрхийлсэн.

Одоо Д.Уэйдийн хувьд NBA-гийн багуудаас жилд 8.3 сая ам.долларын цалин авна гэдэг боломжгүй зүйл. “Майами”-даа буцаж орохыг хүсвэл дундаж цалин буюу 5.3 саяыг, эсвэл хамгийн бага цалин буюу 2.3 саяыг авах боломжтой юм.

Кармэло Энтони “Атланта Хоукс”-тай албан ёсоор гэрээгээ цуцалсны дараагаар “Хьюстон Рокитс”-той нэгдэх шийдвэр гаргалаа. Энд тэр нэг жилийн 2.4 сая ам.долларын цалин авахаар болсон аж.

Ийнхүү Жэймс Хардэн, Крис Пол, Кармэло Энтони нар нэг багт нэгдэж, аваргын цом, алтан бөгжний төлөө зүтгэхээр болов. К.Энтони өнгөрсөн улиралд 78 тоглолтод оролцохдоо 16.2 оноо авч, 40.4 хувьтай довтолсон нь түүний замналын хамгийн тааруу үзүүлэлт. Кармэло энэ багт гараанд гарах магадлалтай байгаа ч эцсийн шийдвэрийг Майк Д’Энтони гаргах юм. Хэрвээ Ж.Хардэн, К.Энтони нар гараанд гарах үед хамгаалалт хэт суларвал Пи.Жэй Такерыг гараанд гаргаж, Энтониг сэлгээнээс талбайд гаргахаар төлөвлөж магадгүй. Энтонигийн хувьд дасгалжуулагч ямар шийдвэр гаргасан түүнийг дагана гэдгээ эрт мэдэгдсэн юм.

К.Энтони энэ улиралд 27.9 сая “ногоон”-ы цалин авах ёстой байсан ч өөрөө солилцоонд орохыг зөвшөөрсөн юм. Хэдэн жилийн өмнө “Нью Йорк Никс”-тэй гэрээ байгуулахдаа солилцоонд орох эсэхээ өөрөө шийдэх давуу эрхтэй байлаа. “Никс”-ээс “Оклахома Сити”-д ирэхдээ ч энэ давуу эрхээ эдэлсэн. Өөрөөр хэлвэл, баг хүссэн үедээ түүнийг солилцоонд оруулах эрхтэй бус заавал тоглогчийн саналыг сонсох ёстой байдаг. Өнгөрсөн жил бүтэлгүйтсэн ч довтлогч Пол Жоржтой олон жилийн гэрээ байгуулснаар “Тандер” их хэмжээний мөнгийг татварт төлөх ёстой болсон юм. Тиймээс түүнийг солилцоонд оруулах, боломжгүй бол гэрээг нь худалдаж аваад тавьж явуулах тохиролцоонд хүрчээ. Энэ тохиолдолд тэр ирэх улиралд 2.4 сая ам.долларын албан ёсны цалинтай ч нэмээд 27.9 сая “ногоон”-оо авах эрхтэй гэсэн үг. Харин шинэчлэл хийхийг хүссэн “Атланта Хоукс” түүний өндөр цалинг солилцоогоор аваад багаас чөлөөлөхийг зөвшөөрсөн билээ.

“Майами Хит”-ийн хамгаалагч Дуэйн Уэйд одоогоор чөлөөт агент болоод буй. Өнгөрсөн долдугаар сарын 1-нээс хойш тэр аль багт очих нь тодорхойгүй байгаа. Тэгвэл Д.Уэйд ирэх улиралд NBA-д бус Хятадын лигт тоглож магадгүй бололтой.

“Sportando”-гийн мэдээлснээр бол “Шинжан Флайнг Тайгерс” баг нэрт тоглогчид гэрээний санал тавихаар бэлдэж байгаа аж. Одоогоор үнийн санал нь нийтэд ил болоогүй байгаа юм.

Д.Уэйд Хятадад аялж яваа бөгөөд тус улсын “Li-Ning” компанитай насан туршдаа хамтрах том гэрээ байгуулаад удаагүй байгаа юм. Тиймээс хятадуудтай холбогдсон нь шинэ зүйл биш.

Тэрбээр өөрийн “Way of Wade 7” шинэ пүүзээ зарласан хэвлэлийн бага хурлын үеэр ирээдүйнхээ талаар “Хятадаас буцаж гэртээ очоод ямар шийдвэр гаргахаа шийднэ. Одоогоор бол би амарч байна. Спортод юу ч болж болно. Одоохондоо хэлж мэдэхгүй байна” гэж ярьсан юм.

NBA-гээс бусад лигт тоглогчид өндөр цалин авна гэдэг ховор үзэгдэл. 2015 онд цагтаа NBA-д данстай явсан орос тоглогч Алексей Швед нутгийнхаа “Химки” клубтэй гурван жилийн 10.2 сая “ногоон”-ы цалин авахаар тохиролцсон нь хамгийн өндөр цалин аж.  Мөн 2011 оны драфтын №10-аар сонгогдож байсан АНУ-ын Жиммер Фредетт өнгөрсөн улиралд “Шанхай Шаркс” багтайгаа гэрээгээ сунгахдаа жилийн 1.8 сая ам.долларын цалин авахаар болж байв. Ж.Фредитт өнгөрсөн улиралд Хятадын лигийн үнэ цэнэтэй тоглогчоор тодорсон билээ.

“Лос Анжелес Лэйкерс” багийн довтлогч Лэброн Жэймс болон түүний бизнес хамтрагч Маверик Картер нар нэрт тоглогчийг зодог тайлсан хойно юу хийхээ хэдийнэ төлөвлөсөн байна. М.Картерын ярьснаар бол ирээдүйд Лэброн NBA-гийн аль нэг багийн эзэн болох хүсэлтэй байгаа аж. Энэ талаар тэрбээр “Одоогоос 10 жилийн дараа Лэброн сагсан бөмбөгийн аль нэг багийн эсвэл америк хөлбөмбөгийн багийн эзэн болох байх. Тэр америк хөлбөмбөгт хайртай. Тиймээс энэ хоёр спортын аль боломжтойг нь худалдаж авахаар бизнес төлөвлөгөө гаргасан” гэж ярьжээ.

Лэброн “Лэйкерс”-тэй энэ зун дөрвөн жилийн 154 сая “ногоон”-ы гэрээнд гарын үсэг зурсан. Ингэснээр тэр энэ улирлыг оролцуулаад зөвхөн цалингаас 237 сая ам.доллар олсон аж.

“Forbes” сэтгүүлээс зарласнаар бол Лэброн хамгийн өндөр орлоготой тамирчдын жагсаалтад зургадугаарт бичигдэж буй. Түүний жилийн орлого 85.5 сая “ногоон”-д хүрсэн. Гэхдээ энэ мөнгөний дийлэнх буюу 52 сая нь ивээн тэтгэгч болон бусад байгууллагаас олсон мөнгө. Талбайн теннисний шилдэг тамирчин Рожер Федерер л түүнээс ивээн тэтгэгчээс олсон мөнгөөр илүү гардаг гэнэ.

Сонирхуулахад, Лэброн Жэймс “Ливерпуль” багийн хувьцааны хоёр хувийг эзэмшдэг. Долоон жилийн өмнө 6.5 сая ам.доллароор авч байсан бол өдгөө энэ хувьцааны үнэ 32.5 саяд хүрээд буй.

NBA-гийн тоглогчдоос Майкл Жордан “Чарлотт Хорнетс” багийн эзэн бол “Шидэт” Жонсон “Лос Анжелес Доджерс” багийн хувьцаа эзэмшигч юм.

“Сан Антонио Спэрс” болон Кавай Леонардын бүтэн жил үргэлжилсэн драм төгсөв. Гэхдээ Холливудын өлгий Лос Анжелес руу бус “Торонто Рэпторс” руу сольчихов. Энэ солилцоогоор К.Леонард, Дэнни Грин нар “Торонто”-д очиж, ДеМарр Дерозан, Жакоб Потелтл болон 2019 оны нэгдүгээр тойргийн эрхийн хамт “Спэрс” авлаа.

Кавайг “Лос Анжелес Лэйкерс”-т очно гэх яриа өнгөрсөн жилээс тархсан. Сүүлд нь “Филадельфи” нэмэгдэж, “Клипперс” ч энэ ярианаас хоцроогүй. Аваргын төлөө өрсөлдөх боломжтой баг бүр л түүнийг хүсч байгаа мэтээр цуурхал тарсан. “Лэйкерс” рүү л явуулахгүй бол өөр багт тоглохгүй гэж хошуугаа унжуулж байгаа мэтээр хэвлэлд бичсэн.

Харин “Торонто”-д очно гэж таамагласан хүн байгаагүй. Ийм яриа ч бүр гараагүй юм. Учир нь үйл явдал тун богино хугацаанд өрнөж, хэдхэн цагийн дотор л наймаа хийснээ зарлав.

“Рэпторс”-ын сагсан бөмбөг хариуцсан ерөнхийлөгч Масай Үжири олон зүйлээр мөрий тавив. Д.Дерозангаа сольсон, солихдоо түүнд худлаа хэлсэн нь тодорхой болжээ. Тэд гол довтлогчоо солилцоонд оруулахгүй гэж ярьсан гэдгийг Дерозан баталж буй.

Түүнчлэн ирэх улиралд “Торонто” Кавайд таван жилийн 190 сая “ногоон” санал болгох боломжтой. Харин бусад багууд дөрвөн жилийн 141 саяыг өгнө. М.Үжири ирэх улирлын өдийд Кавайтай гэрээгээ сунгана гэдэгт итгэлтэй байгаагаа ярьсан. Хэрвээ түүний хүслээр болохгүй бол К.Леонардгүй, Д.Дерозангүй баг том асуудалд унах болно.

Д.Дерозанд энэ солилцоо таалагдаагүй гэдгээ цахим хуудсаар дамжуулан мэдэгдсэн бөгөөд гол нь багийн удирдлагууд түүнийг солихгүй гэсэн амлалт өгсөн гэж мэдэгдсэн ч гэнэтийн зүйл болов.

Ямартай ч түүнийг Өрнөдийн баг руу явуулахгүй гэсэн зорилгодоо Грэгг Попович хүрлээ. Д.Дерозан энэ багт гурван жил зүтгэнэ. Г.Поповичийн удирдлага дор тэр хэрхэн тоглох нь олны анхаарлыг татаж байна.